Read kutep Yohana 5 Bible Online

Yohana 5 - kutep bible

Yohana 5

¹Isim ayine, Yesu tso kyi yi Urushelima ikyaen ukwab iki ti Mbayawuda site atang.

²Urushelima atang ambyi iki ta atang fer ti uwog ti ande ku sang uwae uka ti a ku kunn wu baa, Ufu Mbawen. A ku kunn uwog ambyi wune ti unju Mbaibrane baa, Betisaida. Unju ambyi atang a sim afug itsong.

³Ande ti acaeb yang-ba akwen ku nae uwae afug yine, ande ti mbub ayib ti ande ti pxib afxen ti ande ti wam afxen ti ajwo.[10]

⁴

⁵Unde iki ta atang ti nae kicaeb ka pu wu asang rijwe ita asu itsongta.

⁶Ti Yesu ru ba sang uwog-wu, awu nung unde wune nae atang. Awu nungye pu wu baa, unde wune na nae rwen pu wu ti uwae kicaeb-wu ayine. Awu rang unde wu baa, “Afu ku sha ti fu na nwangru uwae kicaeb a?”

⁷Unde ti kicaeb awune ri te Yesu baa, “Unde ti uwe, ame site-m unde iki ti u ye m si uwae ambyi wune kiye ti awu a ku kyi ijwe be. Kiye ti ame a ku kwab ti m na u si, unde iki ter bibir u si uwe-m.”

⁸Yesu ri te wu baa, “Sunwunn ritsen ti fur kucwo-fu ti kyang ikyin-fu ru.”

⁹Ti ritsen unde wu tu ribom ijwe. Awu fur kucwo-wu u kyang ikyin ara. Usir ti iken yine nde si usir ikyinn.

¹⁰Ikyaen yine, ande ndufu Mbayawuda ri te unde wu ti tu kushwur ijwe wune baa, “Yaka ne si usir ikyinn. Icwe cwe-wu ti afu su kucwo-fu be. Ayi si riraen.”

¹¹Awu ri te ba baa, “Unde wu ti nwangru m uwae kicaeb-m ri te me baa, ame na fur kucwo-m ti m na kyang ikyin.”

¹²Aba rang wu baa, “Unde ti ri te fu baa, afu na fur kucwo-fu ti afu na kyang ikyin si aye wu?”

¹³Awu unde ti tu ribom ijwe-wu nungye-wu unde ti nwangru wu be, ikyaen ti, Yesu nwunn ruye kutampwa ande yang-ba ti munn atang.

¹⁴Isim yine Yesu ru ka tu unde wu Kusog Rimam tiyang u ri te wu baa, “Nung! Tine afu tu pu fu kushwur ijwe. Ya ikentitibi-fu ta tiri, be ira iki ti beb siskeb kicaeb-fu ayi u tu kyi fu cwucwo!”

¹⁵Unde wu nwunn tiri u ru ka ri te ande ndufu Mbayawuda baa, unde ti na nwangru wu na si Yesu.

¹⁶Mbayawuda nwunn ku nde Yesu rikaen, ikyaen ti, awu ku nde itso iken yine usir ikyinn.

¹⁷Ama Yesu ri te ba baa, “Itse-m ku nde wande ko kiye titini, ame ama u nde wande ko kiye titini.”

¹⁸Ira yi ti awu ri ne kunn nwunn rinae ande ndufu Mbayawuda yang-ba akwen skeb ti kucang. Tiri aba nwunn ku pwen ti a na u wen wu wen. Ikyaen ti, isim ti awu nyatsa mam fe icwe-ba na usir ikyinn, awu ru ba ku ri baa, Rimam na si Itse-wu u ku myae risu-wu te Rimam pang atso.

¹⁹Yesu ri te ba baa, “Ame ku ri te ni ira ti kubenti, Umbae Rimam ku nde-wu wande ti risu-wu amam be. Awu ku nde nyáng iken ti awu nung Itse-wu ku nde amam. Iken ti Itse ku nde si iken ti Umbae ku nde ama.

²⁰Ikyaen ti, Rimam site ure ti Umbae-wu timambe. Awu ku tatso tag Umbae-wu iken ti awu ku nde meme. Awu u tatso wu iken ti awu u nde ti ko skeb ayine ama, ti ayi u fur ni ayib.

²¹Pangma ti Rimam ku kunn nwunn ande ti cwucwu u ku nda ba unyang ti atang, ayi si ahan ama Umbae-wu ku nda ande ti nyang uwae-wu unyang.

²²Uwae ira rikwen ti pwen ama, Itse-m ti risu-wu ku pwen-wu ande rikwen be, awu nda Umbae-wu kuko ti wu na pwen ande rikwen,

²³ikyaen ti ande meme na nda Umbae Rimam kuko pangma ti aba ku nda Itse-wu Rimam. Unde ti a ku nda-wu Umbae Rimam kuko be, ye si Itse-wu Rimam ti tom wu ba.

²⁴“Ame ku ri te ni ira ti kubenti, unde titini ti a fxen ira-m u ru uwae kinjo uwog Itse-m ti tom m ru ba, awu u site unyang ti tsi kukunn. A u pwen-ba awu rikwen be, ama awu ruye pu wu unju iticwu ru ba pu wu unju unyang.

²⁵Ame ku ri te ni ira ti kubenti, kiye ru ku ba, kiye wu ba mam pu wu, ti ande ti cwucwu u fxen afxenjwin na Umbae Rimam, ama unde titini ti a fxen afxenjwin wune u tu unyang.

²⁶Pangma ti Rimam ti risu-wu ku nda unyang, Umbae-wu ku nda unyang ama.

²⁷Awu sa kuko na pu wu Umbae-wu ti wu na pwen ande rikwen ikyaen ti, awu si Umbae Unde.

²⁸Ira yine fur ni ayib a? Kiye ru ku ba ti ande ti cwucwu ti ta uwae kuskab meme u fxen afxenjwin-wu

²⁹u nwunn uwae askab-ba. Ande ti nde itinyang u nwunn u tu unyang ti tsi kukunn. Ande ti nde ikentitibi ama u nwunn u sang yi rikwen na Rimam.”

³⁰“Ame u nde fob-m iken iki ti risu-m amam be, se ti kuko na Rimam ti tom m ru ba. Ikyaen yine rikwen ti ame ku pwen si kubenti, ikyaen ti, ame ku kwab-m ti m na u nde iken ti m na sha amam be, ame ku nde iken ti Rimam ti tom me tom ku sha.”

³¹“Asiti ame a ku ri ira risu-m ti ajwo-m, ira ti ame ku ri, ande u cwe-ba baa, ira yi na si kubenti be.

³²Amaa unde iki ta atang ti ku ri ira risu-m. Ame nung pu m baa, ira ti awu ku ri risu-m si kubenti.”

³³“Ani tom atom-ni ru ka uwog Yohana, ama ani fxen pu ni ira ti kubenti ti awu ri risu-m.”

³⁴“Ayi si-yi ti ame shanum te unde ti u ri ya m be, amaa ame ri ira yine ikyaen ti ani na tu itinwangru.

³⁵Yohana si pangma urwa fitila ti ku cwe u ku nda uwog saen paenine. Uwae kiye kpang, ani cwe ira-wu u ku tsen utob ti uwog ti saen-wu.”

³⁶Amaa Iken iki ta atang ti ku tso kuko-m, ti rob skeb pu yi ira ti Yohana ri risu-m. Ira yine si wande-m ti ame ku nde. Ayi si wande ti awu Itse-m nda m ti m na nde. Wande yine ku ri ira risu-m u ku tso baa, awu Itse-m ti na tom m ru ba.

³⁷Awu Itse-m ti tom m ba ama ku ri ira risu-m, u ku cwe ira-m. Ani fxen ji-ni afxenjwin-wu be, u nung ji-ni uwe-wu khika be ama.

³⁸Ani sa ira-wu tsi-ni uwae utob-ni be, ikyaen ti, ani ru-ni uwae kinjo uwog unde ti awu tom ba be.

³⁹Ani ku nùng putsa kob atsingken Rimam ikyaen ti, ani tang baa, ayi na u tatso ni fengo na unyang ti tsi kukunn. Ayi atsingken ti risu-yi ku ri ira risu-m.

⁴⁰Amaa ani cwe-ni ti ni u ba uwog-m ti ni ba tu unyang yi be.

⁴¹“Ame ku sha-m ti ande na teb rinyi-m be.

⁴²Ame nung pu m baa, ani na si-ni ti ure te Rimam uwae utob-ni be.

⁴³Ame nung iken yine, ikyaen ti, ame ru ba pu m yi rinyi na Itse-m, ani paembe-ni ame be. Kiye ti unde iki a ru ba ti kuko ti risu-wu ani ku paembe wu.

⁴⁴Ani ku sha ti ni u tu risu tinyang uwog atso, amaa ani ku sha-ni ti ni u tu risu tinyang uwog Rimam be, awu ti si kinjo-wu amam. Né iken ti nde ani ru-ni uwae kinjo uwog-m be.

⁴⁵I si-yi ame ti u kunn ni rikwen be. Awu Musa ti ani sa ijwe-ni konje rimenn-wu, awu ti u kunn ni rikwen uwog Rimam baa, ani na kyangte ni ira-wu be.

⁴⁶A baa, ani na ru uwae kinjo ti kubenti uwog Musa, ani ú ru pu ni uwae kinjo uwog-m ama, ikyaen ti, awu ti risu-wu bae ira risu-m.

⁴⁷Ama ti ani ru-ni uwae kinjo ti iken ti awu Musa bae be, ani u nde rimang titawe ani u ru uwae kinjo ti ira ti ame ku ri?”