Read kutep Yohana 6 Bible Online

Yohana 6 - kutep bible

Yohana 6

¹Isim yine Yesu yen ru yi ukunn uyinn ti Galili ti uwe akwen. (Uyinn wune, ariki ku kunn wu baa, uyinn ti Tiberiya.)

²Ande jwunn ba putsa wu ikyaen ti, aba nung pu ba iken ti ku fur ayib ti awu nde uwog ande ti acaeb ti ru ba uwog-wu.

³Yesu ti ande ti imbyi-wu tso kubab rikwen iki u ru ka som atang.

⁴Kiye wu, ayi tsitsi kiye kpang ti Mbayawuda u nde ukwab tiyang-ba ti si Ukwab Itiyafe.

⁵Ti Yesu pu ayib tso ritsen u nungye ande ti ru ku ba yi uwog-wu, awu rang Filip baa, “Aka ti ati u jab wuci ti u ko ande abane meme-ba?”

⁶Awu ri ira yine ikyaen ti wu u myae Filip myae amam, ikyaen ti, awu ti risu-wu nung pu wu iken ti awu u nde.

⁷Filip ri te wu baa, “Ko ati a wen skeb dinari ukob ifaen, unde titini uwae-ba u tu wuci kpang amam.”

⁸Unde kinjo uwae ande ti ku putsa Yesu, ti rinyi-wu si Andarawu, inja Siman Bitrus, ri te wu baa,

⁹“Umbae iki ta ike ti site abyi buredi itsong ti iwag ifaen, amaa ayi ko ti ande yang-ba ne u ci u kyaen njaa?”

¹⁰Irum shab uwog-wu timambe, ikyaen yine Yesu ri baa, “Ni ri te ande ba ti a som riben.” Ande ba som riben. Arom amam uwae-ba ka kumbub itsong.

¹¹Ama Yesu sa wuci yi u nde na Rimam fxaefa u kan na ande ti som riben atang, u nde ti mbwe-yi ti iwag yi meme. Unde titini ci u kyaen.

¹²Kiye ti aba ci kyaen pu ba awu ri te ande-wu baa, “Ni byir amumunn ti tsitsi byir ikyaen ti ayi ā ndembeb-yi ti ukaen amen be.”

¹³Aba byir amumunn buredi yi ti ande bane ci ne, ayi munn atyika rijwe asu ifaen.

¹⁴Kiye ti ande nung iken yi ti ku fur ayib ti awu nde ne aba ri baa, “Kubenti, awune ti si Unde wu ti ku ya iskin ira Rimam ti kubenti ti a ri baa, awu na u sang ba utense[11].”

¹⁵Yesu nungye pu wu ti aba ku sha ti a na u ba ye wu ti ribom ti a na u nae wu ukwe. Ikyaen yine awu nwunn u ya ba ta atang u tso yi kitaen rikwen.

¹⁶Usir pang kujwo ureb, ande na Yesu si yi unju uyinn

¹⁷u ru ka sang kuyae u kafe yen ku ruru yi uka ti Kaparnawum. Uwog byi kyi, ama Yesu ru ba tu-wu aba khika be.

¹⁸Kiye wune ufunn iki ti ribom ku kae u ku tur ambyi ru uwe u ku tur ambyi ru isim.

¹⁹Ti ande na Yesu jwo kuyae ru ka sang pangma lamba ita ko inje ahan, aba nung Yesu ku kyang ikyin risu ambyi u ru ku ba ku fer kuyae, ama ikyenricwu ye ba.

²⁰Yesu kunn ira baa, “Ni kyen-ni ikyenricwu be, i si ame Yesu!”

²¹Aba tsen utob u ye wu sang uwae kuyae amam. Ti ritsen kuyae ru ka sang pu wu ukunn uyinn uwog ti aba ku sha.

²²Ucwefam-yi ande ti nae ti ukunn uyinn akwen ku sha rifab Yesu, ikyaen ti, aba nung baa, kuyae kinjo amam ti ta atang, ama Yesu na sang-wu uwae kuyae wu ti ande ti imbyi-wu sang atang be. Nyáng aba amam uwae kuyae wu.

²³Ama ayae iki ru uten ti Tiberiya ba fer uwog wu ti aba ci pu ba wuci pu atang kucang, isim-yi ti Yesu tso pu wu fxaefa risu-yi na Rimam.

²⁴Kiye ti ande ba nungye baa, Yesu ti ande imbyi-wu meme na ta-ba atang be, aba sang kuyae yine u yen ku sha rifab Yesu ku ru yi Kaparnawum.

²⁵Kiye ti aba ru ka sang pu ba ukunn uyinn akwen, aba tu wu u rang wu baa, “Unde ti uwe, afu ru ba ike isinn?”

²⁶Yesu cwe ba unju baa, “Ame ku ri te ni kubenti, iken ti nde nee ani ku sha rifab-m si ikyaen ti, ani ci u kyaen ti buredi yi kiye wu, si-yi ikyaen ti ani nung iken ti tatso kuko Rimam be.

²⁷Ni nung! Ni nde-ni wande ikyaen wuci ti ku mamam be. Ni kwab ti ni tu itso wuci ti ku nda ande unyang ti tsi kukunn, ayi itso wuci wune Umbae Unde u nda ni. Ayi si si awu ti Rimam Itse cwe pu wu ira-wu[12].”

²⁸Ama aba rang wu baa, “Ati u nde rimang titawe ati u nde iken ti ku nyang uwae Rimam?”

²⁹Yesu ri te ba baa, “Wande ti ku nyang uwae Rimam si ti ni ru uwae kinjo uwog unde ti awu tom ba.”

³⁰Aba ama jwam wu baa, “Nde wande ti kuko ti ati u sae u ru uwae kinjo uwog-fu! Tatso ti iken ti afu u ndetu.

³¹Kiye ti abitse-ti som uwae kutur ti kute, Musa nda ba ‘mánna.’[13] Pangma ti a bae uwae Kutsingken Rimam baa, ‘Awu nda ba wuci ti si apupwen ba.’ ”

³²Yesu ri te ba baa, “Ame ku ri te ni kubenti, unde ti nda ni wuci yi si-yi Musa be, i si Itse-m. Cwucwo, buredi ti kubenti ti ku si apupwen ba, Itse-m ti ku nda yi si ba na ni tine.

³³Ikyaen ti, buredi ti Rimam ku nda ande si unde wu ti si apupwen ba u ku nda utense unyang.”

³⁴Aba ri te wu baa, “Itsekuru-ti, nda ti itso wuci yine ko kiye titini.”

³⁵Yesu ri te ba baa, “Ame ti si buredi ti ku nda unyang. Unde titini ti awu a ru ba uwog-m, awu u fxen-wu rimenn be. Unde titini ti awu a ru uwae kinjo uwog-m ama u fxen-wu unwaen cwucwo be.

³⁶Amaa, pangma ti ame ri te ni kucang, ko ti ani nung me ti ayib, ani ru-ni uwae kinjo uwog-m kihka be.

³⁷Ande meme ti Itse-m a sa ba na m kujwo, aba u ba yi uwog-m. Ama unde titini ti a ba uwog-m, ame u rwae-m awu rwae be.

³⁸Ame si apupwen ba ikyaen ti m na u nde iken ti awu ti tom m tom ku sha, i si-yi ti m na u nde iken ti utob-m ku sha be.

³⁹Iken ti Itse-m Rimam ku sha si ti m na u nungkyi ande ti awu nda m meme, ti ko kinjo na yag ta-wu ta be, ikyaen ti m na kunn nwunn ba uwae iticwu usir ti ricwunnkyi.

⁴⁰Iken ti Itse-m ku sha si ti unde titini ti a sae Umbae-wu u ru uwae kinjo uwog-wu, unde wu na tu unyang ti tsi kukunn. Ame ama u kunn nwunn wu uwae iticwu uwae usir ti ricwunnkyi.”

⁴¹Kiye ti awu ri ira yine Mbayawuda nwunn ku pwen unju ikyaen ti, awu ri baa, awu ti si buredi ti si apupwen ba.

⁴²Aba ku ri baa, “Awune si-wu Yesu umbae Yusufu be a. Itse-wu ti iya-wu ama si-ba ande ti ati nunung be a. Awu nde rimang ku ri baa, awu na si apupwen ba?”

⁴³Yesu ri te ba baa, “Ni fxae kitsag ti tsag ti unju ti pwen-ni.

⁴⁴Unde iki u ru ba fob-wu uwog-m be, se unde ti Itse-m ti tom me ru ba a shir wu ru ba pu wu. Unde titini ti ru ba uwog-m ama, ame u nda wu nwunn uwae iticwu usir ti ricwunnkyi.

⁴⁵Ti kute ande ti ku ya iskin ira Rimam bae baa, ‘Rimam ti u kwen na ba meme.’ Ande meme ti fxen ira Itse-m u kwen ye ira-wu, awu u ru ba uwog-m.

⁴⁶Unde iki nung ji-wu Itse khika be, nyang awu unde ti ru uwog Rimam ba amam ti nung pu wu Itse.

⁴⁷Ame ku ri te ni kubenti, unde ti a ru uwae kinjo uwog-m, awu site pu wu unyang ti tsi kukunn.

⁴⁸Ame ti si buredi ti ku nda ande unyang.

⁴⁹Kiye ti abitse-ni ta uwae kutur, aba ku ci mánna[14], amaa aba cwu pu ba.

⁵⁰Ama wuci ti ku si apupwen ba, unde titini ti a ci wu, awu u cwu-wu cwu cwucwo be.

⁵¹Ame ti risu-m ti si wuci yi ti si apupwen ba, awu ti ku nda unde unyang. Unde titini ti a ci wuci yine, awu u som yiyer. Wuci ti ame u nda ande ti utense ti a na tu unyang si ibye rimenn-m.”

⁵²Ira ti awu ri ne nda ande ndufu Mbayawuda shaen ishaen te atso. Aba ku rang atso baa, “Unde wune u nde rimang u sa ibye rimenn-wu na ti, ti na kub?”

⁵³Yesu ri te ba baa, “Ame ku ri te ni kubenti, asiti ani a u kub-ni ibye rimenn na Umbae Unde be, u ngwa-ni anying-wu be, ani u site-ni ti unyang be.

⁵⁴Ama unde titini ti a kub ibye rimenn-m u ngwa anying-m site pu wu unyang ti tsi kukunn, ama ame u kunn nwunn wu ti unyang usir ti ricwunnkyi.

⁵⁵Ikyaen ti, ibye rimenn-m ti si wuci ti kubenti, anying-m ama ti si iken ti ngwa ti kubenti.

⁵⁶Unde titini ti a kub ibye rimenn-m, u ngwa anying-m, awu baefa te m, ame ama baefa te wu.

⁵⁷Itse-m ti tom me ru ba. Ame site unyang ikyaen ti, awu site unyang. Ayi si ahan ama uwog unde ti a kub ibye rimenn-m, awu u som ti unyang ikyaen-m.

⁵⁸I si ijwe-m wune ti si wuci ti si apupwen ba. Awu si-wu pangma itso wuci ti abitse-ni ci kucang u cwucwu ne be. Unde titini ti awu a ci wuci ti kubenti ti ame ku nda ande, awu u tu unyang ti tsi kukunn.”

⁵⁹Yesu ku ri ira yine kiye ti awu ta kusog Rimam na Mbayawuda uwae uten ti Kaparnawum.

⁶⁰Ande-wu fxen ira yine u ri baa, “Iken ti kwen ayine bom pang-yi. Aye ti u kyangte ira yine?”

⁶¹Yesu nungye pu wu baa, ande ti putsa-wu na ku pwen unju risu ira yine riyaen utob-ba. Awu rang ba baa, “Ko ira-m yine nda ni ku sha ti ni u ter saen m ta-ni ahoo?

⁶²A baa, ani na nung Umbae Unde kafe tso ti uwog ti awu ru atang ba, ani ú kab rimang?

⁶³I si Kusung Rimam ti ku nda ande unyang ti tsi kukunn. Unde u tu-wu ayi ti ajwo-wu amam be. Ira ti ame ri te ni ne, si ira Kusung, u si ira unyang.

⁶⁴Amaa ariki uwae-ni ru-ni uwae kinjo uwog-m be.” Yesu ri ira yine ikyaen ti, ti kucang-yi, awu nung pu wu ande ti u ru-ba uwae kinjo uwog-wu be, u nung pu wu unde ti u sa wu jabci ama.

⁶⁵Awu ri ira iki baa, “Ayine ti si iken ti nde tawe ame ri te ni baa, unde iki na u ru ba fob-wu uwog-m amen be, se unde ti Itse-m Rimam a cwe na wu.”

⁶⁶Ikyaen ira ti awu ri ne, ande ti ku putsa-wu yang-ba akwen kafe ti isim u putsa-ba awu cwucwo be.

⁶⁷Ama Yesu ri te ande rijwe asu ifaen ti awu tsab ba tsi baa, “Ani ama re? Ani u ya m ta ama a.”

⁶⁸Siman Bitrus ri te wu baa, “Itsekuru-m, Ati u ru ka tu-ti aye? Afu ti site ira ti ku nda ande unyang ti tsi kukunn.

⁶⁹Ati ru uwae kinjo u nung pu ti baa, afu ti na si Unde ti Saen kyag ti Rimam Tsab Tsi.”

⁷⁰Yesu ri te ba baa, “Unde ti tsab ni rijwe asu ifaen si-yi ame be a? Ama kinjo uwae-ni si-wu umbae Shetann.”

⁷¹Yesu ri ira yine risu Yawuda umbae Siman Iskariyoti, ikyaen ti ko ti awu Yawuda si kinjo uwae ande ti Yesu tsab ba, awu ku kwab ti awu na u ye Yesu jabci.