Read kutep Yohana 9 Bible Online

Yohana 9 - kutep bible

Yohana 9

¹Usir iki ti Yesu kyang pu ikyin-wu ku ru, awu nung unde iki ti mbub ayib ti ti a mbae wu.

²Ande ti putsa Yesu rang wu baa, “Unde ti uwe, ayi si ikentitibi-wu ree, re ana iya-wu ti itse-wu nee awu mbub ayib ti ti a mbae wu?”

³Yesu ri te ba baa, “Ayi si-yi ikyaen riraen-wu be. Ayi si-yi ikyaen riraen itse-wu ko ana iya-wu be. Awu site-wu ayib be ikyaen ti ande na u nung iken ti kuko ti Rimam u nde risu-wu.

⁴Ti ti usir ta ti atang ati u nde kang wande na AWU ti tom me ru ba. Utitang ru ku ba ti unde iki u nde tu-wu wande cwucwo be.

⁵Kiye ti ame ta ti utense ike ame ti si uwog ti saen na utense.”

⁶Ti awu ri fe ira yine, awu tub atsang si riben u pxag yi u sa shin unde wune ayib

⁷u ri te wu baa, “Ru ti ka fu uwe-fu uwae ambyi ti Silowam.” (Imbyi rinyi Silowam yine baa, A Tom wu Tom.) Ama unde wu ru ka fu uwe-wu. Ti awu kafe ru ku ba, awu ku sae uwog tiri.

⁸Ande ice-wu ti ande ti nung wu kucang kiye ti awu si unde ti ku jwam iken ku rang ira baa, “A! A! Awune si-wu unde ti ku som u ku jwam iken be a?”

⁹Ariki cwe baa, “Een. Awu.” Ama ariki ku ri baa, “Iyee, si-yi awu be. Awune si unde iki ti ru wu ru.” Ama awu unde ti mbub ayib wu ti risu-wu tsikunn ti ku ri te ba baa, “Ame.”

¹⁰Aba rang wu baa, “Afu nde rimang titawe ayib-fu mbubta?”

¹¹Unde wu ri te ba baa, “Unde wu ti rinyi-wu si Yesu, awu pxag isa u pu shin m ayib u ri te m baa, ame na ru yi Silowam ka fu uwe-m atang. Ame ru ara kuben u ru ka fu uwe ayi. Ti ti m fu mam uwe ame nung ayib-m mbubta, ame ku sae-m uwog tiri.”

¹²Aba rang wu baa, “Unde wu ta aka?” Awu ri te ba baa, “Ame nung-m be.”

¹³Ande bane pu unde wu ti mbub ayib wune ru ka uwog ande ti kumbub Farisi.

¹⁴Usir ti Yesu pxag isa yi u nwangru unde ti mbub ayib wu, si usir bikyinn.

¹⁵Ikyaen yine ande ti kumbub Farisi aba rang kyi unde wu cwucwo baa, awu na nde rimang titawe u tu uwog ti sae bara. Awu ri te ba baa, “Awu pxag isa u sa shin m ti ayib, ame ama ru ka fu uwe ama tine ame ku sae uwog.”

¹⁶Ariki uwae kumbub Farisi ri baa, “Unde ti nde wande yine, awu ru-wu uwog Rimam ba be, ikyaen ti, awu ye su-wu icwe na usir ikyinn be.” Ama ariki uwae-ba ku ri baa, “Á baa, unde wu na si-wu unde ti ru uwog Rimam ba be, awu ú kyang rimang titawe m ku nde itso wande ti kuko yine?” Ira yi nda ba kata kumbub ifaen.

¹⁷Ama aba kafe ba rang unde wu cwucwo baa, “Afu ama re. Afu ri baa, awu ti na mbubta fu ayib. Afu ri ana-fu baa imi risu-wu?” Awu ri te ba baa, “Awu si unde ti ku ya iskin ira Rimam.”

¹⁸Ko ti awu ku ri ira yine, aba ande ndufu Mbayawuda cwe-ba baa, awu na si unde ti mbub ayib kucang titawe u ba ku sae uwog tine be. Ikyaen yine aba kunn itse-wu ti iya-wu ru ba.

¹⁹Aba rang ba baa, “Unde wune si umbae-ni a? Ani mbae wu awu mbub ayib a? Awu nde rimang titawe awu ku sae uwog tine?”

²⁰Itse-wu ti iya-wu ri baa, “Iken ti ati nung si ti awu si umbae-ti ara. Kiye ti ati mbae wu awu mbub ayib.

²¹Ama ati nung-ti iken ti nde titawe awu ku sae uwog tine be. Ati nung-ti unde ti mbubta na wu ayib be. Ni rang si awu, awu ko pu wu ti wu u ri unju-wu ti ajwo-wu!”

²²Aba ri ira yine ikyaen ti, aba ku kyen ikyenricwu ande ndufu, ikyaen ti, ande ndufu aba yer mam pu ba unju baa, unde titini ti a ri baa, Yesu na si Unde wu ti Rimam na Tsab Tsi, aba na u jae wu ru yiye Kusog Rimam.

²³Nee iken ti nde titawe itse-wu ti iya-wu ri baa, “Awu ko pu wu unde, ni rang si awu!”

²⁴Ikyaen yine aba kunn kyi unde wu ti Yesu nwangru wu kafe ba kyi cwucwo fa ti apu-ifaen u ri te wu baa, ben uben uwe Rimam baa, afu na u ri ira ti kubenti te ti. Ati nung pu ti baa, unde wu ti nwangru fu ne na si unde ti ku nde ikentitibi.

²⁵Unde wu ri te ba baa, “Ko unde wune a si unde ti ku nde ikentitibi ko awu a si-wu unde ti ku nde ikentitibi be, ame nung-m ayi be. Iken kinjo ti ame nung si ti, ti kucang ame mbub ayib ama tine ame ku sae uwog.”

²⁶Aba rang wu baa, “Awu nde fu rimang? Awu nde rimang titawe u mbubta ayib-fu?”

²⁷Awu ri te ba baa, “Ame ri te pu m ani ti kucang, amaa ani ku sha-ni ti ni naa atong u fxen-ni ame be. Imi ti nde titawe ani ku sha ti ni na u fxen kyi cwucwo? Ko ani ama ku sha ti ni na putsa wu ahoo?”

²⁸Ira yine nda ba, aba txun wu asu baa, “Afu ti ku putsa unde wune, ana-ti ati ku putsa Musa.

²⁹Ati nung pu ti baa, Rimam na ri ira te Musa, amaa, ana unde-fu wune, ati nung-ti uwog ti awu ku ru yi atang ba be!”

³⁰Unde wu ri te ba baa, “Ira-ni ne si iken ti ku fur ayib. Unde wu ba mbubta ayib-m! Amaa ani ku ri baa, ani na nung-ni uwog ti awu ru atang ba be.

³¹Ati nung pu ti baa, Rimam ku naa atong ku fxen-wu ira na ande ti ku nde ikentitibi be, amaa asiti unde a ku fen Rimam u ku nde iken ti awu ku sha ama, Rimam ku naa atong ku fxen wu.

³²Ati nung pu ti baa, ti ti Rimam mam utense, unde iki mbubta tu-wu ayib unde ti a mbae wu te ayib ti mbub be. Ayine ati fxen ji-ti usir iki khika be.

³³A baa, unde wune na ru-wu uwog Rimam ba be, awu ú nde fob-wu itso iken yine be.”

³⁴Aba ri te wu baa, “Afu umbae ti a shi fu uwae ikentitibi, afu ku sha ti fu na u kwen na ti iken a” Ama aba rwae ra wu ruye uwae kusog Rimam atang.

³⁵Yesu fxen ye baa, a na jae pu ba unde wu kusog Rimam. Awu sha tu wu u ri te wu baa, “Afu ru uwae kinjo yi uwog na Umbae Unde a?”

³⁶Unde wu ri baa, “Unde Tiyang, afu ti u tatso m unde wu, ikyaen ti m na ru uwae kinjo uwog-wu!”

³⁷Yesu ri te wu baa, “Afu nung mam pu fu awu. Awu si si unde ti ku ri ira te fu ne.”

³⁸Unde wu si ka ku riben u ri te Yesu baa, “Ame ru pu m uwae kinjo, Itsekuru-m.”

³⁹Yesu ri te wu baa, “Iken ti sa m ru ba utense ne si ikyaen m na pwen rikwén u kata ande kumbub ifaen. Ame ba ikyaen ti ande ti mbub ayib na ā sae uwog ama ande ti ku sae uwog ā kafe ande ti mbub ayib.”

⁴⁰Ariki uwae kumbub ande ti Farisi ti ta atang fxen wu ti awu ri ira yine u rang wu baa, “Ira yi ti afu ri ne tatso baa, ati ama na si ande ti mbub ayib a?”

⁴¹Yesu ri te ba baa, “A baa, ani na si ande ti mbub ayib, rikwen ú ye-yi ani cwucwo be. Ti ani ri baa, ani na ku sae uwog, ayine tatso baa, riraen-ni ta ti ukwae-ni.”