Read kutep Wande Atom 1 Bible Online

Wande Atom 1 - kutep bible

Wande Atom 1

¹Teyofilos, uwae kutsingken-m ti kucang, ame bae ira risu iken meme ti Yesu nde, ti iken ti awu kwen na ande, tsi usir ti awu ye wande-wu

²ba sang usir ti awu tso yi apupwen. Ti ti awu tso-wu yi apupwen khika be, Kusung ti Saen Kyag nda wu ri ira te atom-wu iki ti awu tsab tsi. Awu tatso ba iken ti aba u nde.

³Isim yi ti awu cwu u nwunn uwae kuskab, awu tso risu-wu uwog-ba atsepu yang-yi akwen. Ayine nda ba a nungye baa, awu na nwunn pu wu uwae kukwae ara kubenti. Uwae usir mae ifaen aba nung uwe-wu u fxen wu awu ku kwen na ba ira risu Kujwokwe Rimam.

⁴Kiye iki ti awu te ba som te atso, awu ri te ba baa, “Ni nwunn-ni Urushelima be, se ani a tu pu ni rinyangwae ti Itse-m Rimam yer unju te ni baa, awu na ku ba, rinyangwae wu ti ame ri te ni ti kucang baa,

⁵Yohana nde na ande batisma te ambyi, amaa, isim usir kpang a u nde na ni batisma te Kusung ti Saen Kyag.”

⁶Ikyaen na yine, kiye iki ti aba funn, aba rang wu baa, “Itsekuru-ti, usom ti som na ukwe ti ati Isirela som ti kucang, tine afu u sa kafe na ati ti atang a?”

⁷Yesu ri te ba baa, “Rimam ku nde wande-wu ti ajwo-wu. I si-yi ira-ni ti ni u nungye usir wu ti kiye wu ti Rimam sa tsi na wande-wu be.

⁸Ana-ni ta ri. Ani u tu kuko kiye ti Kusung ti Saen Kyag na Rimam a si ba pu wu risu-ni. Ani u ri ira risu-m te ande uwae uka ti Urushelima, ti uten ti Yawudiya, ti uten ti Samariya, ka ti ricwunnkyi utense meme.”

⁹Ti awu ri mam ira yine, Rimam ye ra wu tso yi apupwen uwe-ba. Awu fxen ira ti tso ru ka sang yae yi uwae abyi. Abyi takyi wu. A nung-ba wu cwucwo be.

¹⁰Ti aba tsi ku sae ayib apupwen ku nung wu ti awu ku tso, ti aba u nunung, ande ifaen iki ba tsi te ba atang. Atupwa-ba tsen porr.

¹¹A rang ande na Yesu baa, “Ani ande ti Galili, imi ti nde ani ku sae ayib tso yi apupwen? Yesu wune ti a ye ra wu uwog-ni ku tso pangma ti ani ku sae wu ku tso ne, ayi si ahan ama ti awu u ka kafe si ba cwucwo.”

¹²Atom Yesu nwunn Rikwen Zetunn u kafe si ba yi Urushelima. Fengo rwen-yi be. I ka-yi lamba kinjo be.

¹³Ti aba sang uwae uka, aba ru yi uwog ti aba ku nae atang. Ande ti ta atang kiye wu si Bitrus ti Yohana ti Yakubu ti Andarawu ti Filip ti Toma ti Bartolomu ti Matiyu ti Yakubu umbae Alifas ti Yawuda umbae Yakubu ti Siman ti a ku ri baa, awu na si unde ti kitsinn risu uten-wu, a som uwog kinjo.

¹⁴Ande abane ku byir ko uwog kinjo ku jwam Rimam. Ameinja Yesu ti iya-wu Mberimu, fa ti anda iki ti ku putsa Yesu ti kute fa uwae-ba ama.

¹⁵Kiye iki, ti ande na Yesu iki ka mae ande itsongnjo funn atso uwog iki, Bitrus fa sunwunn ritsen kutampwa-ba u ya iskin baa,

¹⁶“Ameinja, ti kute Kusung ti Saen Kyag nda Ukwe Dawuda ri ira risu Yawuda, unde wu ti pu ande ru ka ye Yesu. Ira yi ti Kusung ti Saen Kyag ri ne, ira yi sang kang pu yi kubenti.

¹⁷Ti kute awu Yawuda te ti si kinjo. A tsab wu ti wu na te ti nde wande tetso.”

¹⁸(Isim yi ti Yawuda sa Yesu jabci, awu pu aser yi ru ka jab riben. Ti awu jab mam riben wu, awu jwunnsi riben atang cwu tika. Rishwu-wu pogta, ishem uwae-wu ru ba tututur tsi.

¹⁹Ande ti Urushelima meme fxen ira yine risu Yawuda. Ikyaen na yine, a kunn rinyi uwog wu ti unju uten-ba baa, Akeledama, imbyi-yi baa, riben anying.)

²⁰“A bae ira uwae kutsingken Akyang ti kumunn pu yi uwog Yawuda baa, ‘Ishi kuru-wu ā ku ukaen! Unde iki ā som-wu atang be!’ A bae kyi ira iki cwucwo baa, ‘Unde iki ā fikyi wande-wu ayi.’

²¹“Ikyaen na yine, ti sha unde iki uwae ande bane ike, ti awu u si kinjo uwae ande ti ku ri ira risu itinwunn na Yesu uwae kuskab.

²²Ti tsab unde iki ti si kinjo uwae-ti kiye ti Yesu te ti ta te atso kucang, tsi kiye ti Yohana ku nde batisma ba sang kiye ti a ye ra Yesu uwog-ti tso yi apupwen.”

²³Isim-yi ti Bitrus ri mam pu wu ira yine, a pu rinyi ande ifaen tsi ikyaen ti a u tsab kinjo uwae-ba. Aba si Yusufu, ti a ku kunn wu baa, Barsaba, ko Jusitu, ti Matiyas.

²⁴Ama aba jwam Rimam baa, “Afu Rimam ti nung riyaen utob ande meme, uwae ande ifaen bane, tatso ti unde wu ti afu tsab

²⁵ti wu na fikyi wande atom ti Yawuda yata u ru uwog ti a tsab tsi ti na wu.”

²⁶Isim ti aba jwam pu ba Rimam, a sha tu rinyi unde kinjo uwae-ba yi fengo na icwe-ba. Rinyi Matiyas ti aba tu. Ikyaen yine, a sa wu sang fa uwae atom na Yesu rijwe asu kinjo ti tsitsi.