Read kutep Wande Atom 12 Bible Online

Wande Atom 12 - kutep bible

Wande Atom 12

¹Uwae kiye wune Ukwe Herodus nwunn ku nda ande na Yesu iki rikaen.

²Awu nda akyirten-wu a pyera risu Yakubu inja Yohana.

³Ti awu nung iken yine nyang uwae Mbayawuda, awu nda ba a ye Bitrus ama. Ayine nde kiye Ukwab Itiyafe[6].

⁴A ye Bitrus ru ka sang pursuna u nda kumbub akyirten inje nungkyi wu. Uwae kumbub kinjo akyirten fob inje atang. Herodus ku myae ti wu sa Bitrus na ande ndufu Mbayawuda isim Ukwab Itiyafe.

⁵Ikyaen yine, a ya Bitrus ta ti uwae pursuna, ama ande na Yesu ku jwam Rimam ti utob-ba kinjo ikyaen wu.

⁶Ba ye usir iki Ukwe Herodus ku pwen baa, ucwefam-yi awu na u sa Bitrus na ande ndufu Mbayawuda ti a na pwen wu rikwen. Utitang wu, Bitrus nae kicwag, akyirten tsi kujwo rici-wu ti kujwo ife-wu ti ujwin. A yir wu ti uji aser ifaen. Ariki tsi uwe pursuna ku kyir ufu.

⁷Ti a u nunung, atom Rimam tsi atang. Meme uwae pursuna atang farang. Atom wu ba sa kujwo tur Bitrus u shwu wu u ri baa, “Nwunn ritsen ti kife.” Uji kiser ti a yir Bitrus kujwo tum si riben.

⁸Atom wu ri te wu baa, “Pu atupwa-fu tso, ti pu apwafxen-fu tso.” Bitrus nde pangma ti a ri te wu. Unde wu ri te wu baa, “Yab kutupwa-fu ti putsa m ti ti ru.”

⁹Bitrus putsa wu, a ruye uwae kusog ti uwae. Awu ku tang pangma yi na si kurwa ti ku nde wu.

¹⁰Aba wur yafe akyirten ti kucang ti ku nungkyi wu, u ba yafe ti putsa, u sa sa sa ba sang ufu kusog ti a kyae wu ti aser ti a ku yafe atang itawe u sang yi uwae uka. Ufu kusog wu mbubta na ba ti ajwo-wu, aba ruye. Ti a putsa fengo ko ku ru kpang, atom wu teya wu ta.

¹¹Tiri Bitrus ba nungye iken yi ti nde u ri baa, “Tine ame nungye pu m ti iken ne si kubenti. Itsekuru tom atom-wu ba uwog-m ti wu na ba sa ru me uwae kujwo na Ukwe Herodus ti iken meme ti Mbayawuda ku tang baa, ayi na u tu m.”

¹²Ti Bitrus nungye yine, awu nwunn ru kununn Mberimu iya Yohana Markus. Ande yang-ba byir atang ku jwam Rimam.

¹³Ti Bitrus ba kunn kujwo ufu kusog, mbawandab iki ti rinyi-wu si Ruda ru ba cwe ira.

¹⁴Ti awu fxen ye pu wu afxenjwin Bitrus, utob-wu tsen timambe. Awu mbubta-wu ufu kusog be. Awu kafe ru ka ri te ba baa, Bitrus na tsi ise.

¹⁵Aba rang wu baa, “Afu ku jwub kijaen a?” Amaa, awu tsi kukunn ku ri te ba baa, awu na ri kubenti. Tiri a ri baa, “Ayi a si ahan, ayi si kang kubyung-wu![7]”

¹⁶Bitrus tsi kunn ku kwer kujwo ufu kusog, ama a mbubta ufu kusog wu. Ti a nung, ayi si Bitrus ti tsi, ayib fur ba.

¹⁷Awu nde ba kujwo baa, aba na bwe tag bwe tag u tsag te ba itso fengo ti Itsekuru Yesu nde nee awu sa wu ruye uwae pursuna. Awu ri te ba baa, “Ni ri ira yine te Yakubu ti ande na Yesu ti tsitsi.” Isim yine awu ya ba ta u nwunn ru uwog iki.

¹⁸Ucwefam-yi, ayib fe akyirten ba ti nungkyi Bitrus, a ku sha tsotso sha sisi, ikyaen ti, a nung-ba uwog ti Bitrus ru atang be.

¹⁹Ukwe Herodus nda ariki ti a na sha Bitrus na ru ba. A sha shisha u tu-ba wu be. Ikyaen yine awu byib akyirten ba ira nyinyang, u ri baa, a na pu ba ru ka wen. Isim yine Herodus nwunn u ya uten Yawudiya ta, u si yi Kaisariya, u som atang uwae kiye kpang.

²⁰Uwae kiye wune, Herodus site rinae te ande ti Tiire ti Sidon. Ikyaen yine aba byir atso ti a ka u nung wu. Aba titawe ye urwan te Bilastu unde ti ku nungkyi kununn ukwe. Isim yine, aba nwunn ru ka tu Ukwe Herodus u jwam wu baa, awu na tso rinae te-wu aba cwucwo be, ikyaen ti, uten-ba na ku tu wuci-ba yi uten ukwe.

²¹Usir wu ti a tsab tsi, Herodus pu atupwa ukwe-wu si u ba som uwog ti som ukwe-wu u ri ira te ande.

²²Ira unju-wu nyang ti fxen timambe, ama ande ngháe ira baa, “Ni fxen ira-wu ne! I si-yi ana unde be! Ana Rimam!”

²³Ti ritsen atom Rimam kumra Herodus si, ikyaen ti, awu ye ra kuko ti ande nda wu u nda-wu Rimam be. Kicaeb acwucwug ye wu u kub wen wu, awu sa cwu.

²⁴Isim ayine, ira Rimam shag kyi fe uwog, ande yang-ba ba putsa wu.

²⁵Isim ti Barnaba ti Sawulu pu rinyangwae ti ande ti Antiyok nda ba ru ka na ande na Yesu ti Urushelima, aba kafe ru yi Antiyok, u pu utaen unde iki kyang su. Rinyi-wu baa, Yohana Markus.