Read kutep Wande Atom 13 Bible Online

Wande Atom 13 - kutep bible

Wande Atom 13

¹Uwae ande na Yesu ti ta Antiyok, ande ti ku ya iski ira Rimam ti ande ti ku kwen iken ta atang. Aba si Barnaba ti Simeyon ti a kunn wu baa Tibyir, ti Lukiyos unde ti uten Kirene, ti Manayen ti a shi wu te Ukwe Herodus te atso, ti Sawulu.

²Kiye iki ti ande na Yesu som ku fen Itsekuru, ku cwe unju, Kusung ti Saen Kyag ri te ba baa, “Ni tsab Barnaba ti Sawulu tsi iyen kyaeb. Ame site wande ti aba u nde na m nee ame kunn ba.”

³Ikyaen yine, a cwè unju u jwam Rimam u yerkob ba[8] ikyaen wande yine. Isim yine, aba tom ba ru.

⁴Ti Kusung Rimam tom Barnaba ti Sawulu atom ne ahan, aba nwunn si ba uten ti Selukiya. Aba sang kuyae atang, u yen ru uten ti Kuburus.

⁵Ti aba ka sang uka ti Salamis, aba ri ira Rimam uwae asog Rimam na Mbayawuda ti ta atang. Yohana Markus te ba ta te atso, u ku ndeya ba wande.

⁶A kyang kyang ba sang uten ti Pafos ti ta unju uyinn. A ka tu unde ti kimbag iki atang ti rinyi-wu baa Baryesu. Awu si urae Mbayawuda. Awu ku kyaefa ande baa, awu na si unde ti ku ya iskin ira Rimam.

⁷Awu si urwan unde ti uwe uten atang ti rinyi-wu baa Sergiyo Pawulo. Awu unde ti uwe uten si unde ti ben ayib timambe. Awu yae Barnaba ti Sawulu ba uwog-wu ama ku sha ti wu na fxen ira Rimam uwog-ba.

⁸Amaa Baryesu wune (a ku kunn wu ti unju Girik baa, Elimas, ti imbyi-yi si “Unde ti imbag”), awu ku kwab ti wu u shir ra utob unde ti uwe uten ruye uwae ira Rimam ti a ku ri te wu.

⁹Tiri, Sawulu, ti a ku kunn wu baa Bulus ama, kumumunn ti Kusung Rimam utob-wu, pu ayib cwu tsa wu,

¹⁰u ri te wu baa, “Afu umbae Shetann! Afu si unde ti ku ndembeb iken ti pang atang meme. Afu munn ti kukyaefa titibi ti tsotso. Isinn ti afu u fxae wande-fu yine, nee afu ku nda fengo Rimam ti ndabta yinn kafe fengo ti kukwar?

¹¹Rimam u byinn fu kimbab. Afu u mbub ayib, afu u nung-fu uwog cwucwo be, fob usir kpang.” Ti ritsen, kufub si kyi Alimas ayib. Awu ku bo tsotso bo sisi ku sha unde iki ti wu na tae wu kyang.

¹²Kiye ti unde ti uwe uten nung iken yi ti nde ne, awu ru kubenti uwog Yesu. Ayib fur wu risu iken yi ti a ku kwen risu Itsekuru-ti Rimam.

¹³Bulus ti arwan-wu nwunn ya uten Pafos ta u sang kuyae ba uten Perga ti ta uten ti Pamfiliya, ama Yohana Markus ya ba ta ti Pafos u kafe ru-wu iken-wu ti Urushelima.

¹⁴Isim yine, aba nwunn ya Perga ta u ru ba Antiyok na uten ti Pisidiya. Ba ye usir bikyinn a ru ba sang kusog ti Mbayawuda ku jwam Rimam, ba som riben atang.

¹⁵Isim yi ti a nung putsa pu ba ira Rimam ti ta atsinken Musa ti ana ande ti ku ya iskin ira Rimam, ande ndufu yae Bulus ti Barnaba baa, “Ameinja, asiti ani a site ira iki ti ni u ri bom ande ijwe, ni ri yi.”

¹⁶Bulus fa sunwunn u nde ba kujwo ti a na bwe tag, ama bag ku ri baa, “Ande-m ti Isirela ti ande ti tsitsi ti ta ike ku fen Rimam, ni fxen m!

¹⁷Rimam ti ati ande ti Isirela putsa tsab abitse-ti ti kute u nda ba kuko kiye ti aba si ande ti rikyen uwae uten ti Ejib. Ama uwae kuko-wu, awu sa ba ruye uwae uten ti Ejib atang.

¹⁸Uwae asang mae ifaen awu ngwa rikaen te ba uwae kutur.

¹⁹Awu twenji uten itsongfaen uwae riben ti Kanana. Awu sa riben wu na ande-wu, ama ayi kafe kutunn-ba.

²⁰Iken yine nde uwae asang ukob inje ti mae ifaen ka mbe rijwe (450). “Isim yine, Rimam nda ba ande ti ku pwen rikwen ba fob ti kiye na Samuwel unde ti ku ya iskin ira Rimam.

²¹Tiri, aba jwam wu baa, awu na nda ba ukwe. Rimam nda ba Ukwe Sawulu, umbae Kish, urae Benjamin. Sawulu nae ukwe fob asang mae ifaen.

²²Isim ti Rimam sa ra wu ruye, awu nae Dawuda ukwe-ba. Awu ri ira risu Dawuda baa, awu na nung Dawuda umbae Jese na si umbae ti riyaen utob-wu. Awu na si umbae ti u nde meme iken ti awu Rimam na ku sha ti wu na nde.

²³Ayi si sí uwae rishi Ukwe Dawuda ti Rimam pu unde wu ti u nwangru Isirela ne — awu Yesu, pangma ti awu yer unju ti kucang.

²⁴Ti ti Yesu wune ba, Yohana unde ti ku nde batisma ri te ande na Isirela meme baa, a na ya ikentitibi-ba na ta, ti a na nde na ba batisma.

²⁵Ti Yohana mam ku tag wande-wu ayi, awu ri te ande baa, ‘Ani ku tang baa, ame si aye? Ame si-m unde wu ti ani som ku ji wu be. Awu ku ba isim-m, ame ko-m ti m u tunn apwafxen-wu be.’

²⁶“Ameinja-m, ani rishi Ibrahim te ande ti tsitsi ti ku fen Rimam ti ta ike, ira itinwanru yine, a tom yi ba ikyaen-ti meme.

²⁷Ande ti som Urushelima ti ande ti uwe-ba nung-ba ti Yesu ti si unde ti u nwangru ande be, u nungye-ba ira na ande ti ku ya iski ira Rimam be, ko ti a ku nung putsa yi uwae atsingken Rimam usir ikyinn titini uwae asog Rimam-ba. Ama, kiye ti a pwen Yesu rikwen iticwu, aba kumunn ira yi ti ande ti ku ya iskin ri te ba.

²⁸Ko ti ande ti ku pwen rikwen tu-ba ira iki titibi risu-wu ti a nda ba wen wu be, a jwam Ukwe Bilatus ti awu na wen wu.

²⁹Isim ti a wen mam pu ba wu pangma ti a bae uwae Kutsingken Rimam ti kucang, a nwaen rukom-wu si risu kutuku ti cice, u sa wu ba nae uwae kuskab.

³⁰Ama Rimam kunn nwunn wu uwae iticwu.

³¹Uwae usir yang-yi awu tso risu-wu uwog ande ti putsa wu ru Galili ba Urushelima kiye ti awu cwu-wu khika be. Tine aba ti si ande ti u ri kubenti ira-wu uwog ande na Isirela ti tsitsi.

³²Ati ta ike tine, ati sa ira ti tinyang ba ku na ni baa, unju ti yer ti Rimam yer ti abitse-ti,

³³awu kumunn pu wu ayi uwog-ti, ati ti si rishi-ba. Awu kunn nwunn Yesu uwae iticwu. Ira yi ti a bae uwae Kutsingken Akyang ti ifaen sang dede ti ira risu Yesu baa, ‘Afu si Umbae-m. Yaka ne ame mbae pu m afu.’

³⁴Rimam kunn nwunn Yesu uwae kuskab u nda wu awu u kafe ka-wu uwog iticwu cwucwo be. Ayine si sí ira yi ti Rimam ti kucang baa, ‘Ame u nda fu iken ti sisaen ti iken ti kubenti, nee ame yer unju te Ukwe Dawuda.’

³⁵Uwog iki uwae kutsingken akyang, a bae ira risu Rimam baa, ‘Afu u cwe-fu ti ijwe na unde ti ure-fu ti tinyang na rwa mbub uwae kuskab be.’

³⁶Isim ti Dawuda nde tag wande ti Rimam nda wu u cwu, a sa wu nji te abitse-wu, ijwe-wu rwa mbub.

³⁷Amaa ijwe Yesu ti Rimam kunn nwunn uwae iticwu rwa mbub-wu be.

³⁸Ikyaen na yine, ameinja-m, ni fxen nyang ira ti ati ku ri te ni ne, Yesu wune ti si fengo nee ani u tu itiyata na ikentitibi-ni.

³⁹Unde titini ti ru uwae kinjo uwog-wu, a u saen wu ta uwae ikentitibi. Icwe Musa ndetu-yi ayine be.

⁴⁰Ikyaen yine, ni kyang sku sku be iken ti ande ti ku ya iskin ira Rimam ri kucang, ayi u ba tu ni, pangma ti a bae baa,

⁴¹‘ani ande ti saeru ira Rimam! Ni sae iken ti ku fur ayib! Ani u cwu! Ame ku nde wande uwog-ni, ti si iken ti ani u ru-ni kubenti atang be, ko ti unde iki a ri tan yi te ni!’ ”

⁴²Ti Bulus ti Barnaba nwunn ru ku ye kusog Rimam, ande jwam ba baa, aba na kafe ba kyi usir ikyinn ti ku ba uwe, ti a na ba ri te ba cwucwo iken yi ti a ri ne.

⁴³Isim ti ande nwunn ru tag pu ba, Mbayawuda yang-ba ti ande iki ti ku putsa icwe na Mbayawuda nwunn putsa Bulus ti Barnaba. Bulus ti Barnaba ri ira te ba u ri bom ba ijwe baa, aba na som usom-ba ti rinyangwae na Rimam utob-ba ru fe uwe.

⁴⁴Usir ikyinn ti putsa, pangma meme ande ti ta uwae uten atang byir tag atso ti a fxen ira Rimam.

⁴⁵Kiye ti ande ndufu Mbayawuda nung ande munn kusog Rimam, aba tsinn kitsinn. Aba txun Bulus asu, ku shaen ishaen te wu.

⁴⁶Amaa Bulus ti Barnaba tsi kunn ku ri ira ti ribom-ba baa, “Ati sa kang ira Rimam ri te ni Mbayawuda itawe ande ti tsitsi. Amaa ani shaen-ni, ku sae ru yi. Ayine tatso baa, ani pwen pu ni risu-ni rikwen baa, ani ko-ni ti ni na tu unyang ti tsi kukunn be. Ikyaen na yine, ati ya ni ta pu ti. Uwe ike ati u ri ira Rimam te ande ti si-ba Mbayawuda be.”

⁴⁷Ikyaen ti, Itsekuru fa ti kusen baa, “Ame tsab ra ni tsi ti ni si urwa ti ku cwé uwog ande ti kufub, aba ti nung-ba ame be. Uwog-ni, meme ande ti utense u tu itinwangru.”

⁴⁸Kiye yi ti ande ti si-ba Mbayawuda be fxen ira na Bulus yine, aba tsen utob, ku ri baa, ira Rimam na nyang timambe. Ama ariki uwae-ba ru uwae kinjo, aba ti Rimam tsab pu wu aba ikyaen ti a tu unyang ti tsi kukunn.

⁴⁹Ikyaen yine, ira Itsekuru-ti shag kyife uten atang meme.

⁵⁰Amaa, Mbayawuda shir kufxaen sang kutampwa ande ti uwe na uten wu, fa ti anda iki ti site rurob ti ku fen Rimam. Aba nwunn ku nda Bulus ti Barnaba rikaen u rwae ba ruye uwae uten-ba.

⁵¹Bulus ti Barnaba fwer isa afxen-ba si fa ba ti atang u nwunn ru-ba iken-ba yi uten ti Ikoniyum.

⁵²Ande ti putsa ira Yesu ku tsen utob timambe u kumumunn te Kusung ti Saen Kyag.