Read kutep Wande Atom 14 Bible Online

Wande Atom 14 - kutep bible

Wande Atom 14

¹Yi uwae uten Ikoniyum, Bulus ti Barnaba ru ka kusog Rimam Mbayawuda u ka ri ira. Ande yang-ba ru kubenti. Aba si Mbayawuda ti ande ti si-ba Mbayawuda be.

²Amaa, Mbayawuda ti cwe-ba ira Yesu be shir kufxaen sang kutampwa ande ti tsitsi. Aba sa rinyi ande na Yesu ndembeb uwe ande.

³Bulus ti Barnaba som atang usir yang-yi, ku ri ira Itsekuru-ti Rimam ti ribom-ba. Uwae wande ti ku fur ayib ti iken ti ku kyen ikyenricwu ti aba ku nde, Rimam tatso ande baa, ira tinyang-wu na si kubenti.

⁴Ande ti uten atang kata kumbub ifaen. Ariki ku putsa Mbayawuda, ariki ama ku putsa Bulus ti Barnaba.

⁵Tiri Mbayawuda ti ande ti si-ba Mbayawuda be, fa ti ande ti uwe-ba ku myae ira titibi risu ande ti atom baa, a na u nde ba ira, u jwunnwen ba te atxom.

⁶Kiye ti ande ti atom fxen ira yine, a nwunn ter ru yi uten Likoniya u ka sang yi imbae uten iki ti a ku kunn baa, Lisitira, ti imbae uten iki ti a ku kunn baa Derbe, ti uten tsitsi ti ta fifer ti atang.

⁷Atang a ku ri ira tinyang na Rimam.

⁸Uwae uka ti Lisitira, unde iki ta atang, awu pxib afxen. Awu pxib afxen ti ti a mbae wu u kyang fob-wu ikyin usir iki be.

⁹Awu naa atong ku fxen ira ti Bulus ku ri. Bulus nung ti unde wu ku ru kubenti, ku sha ti a nwangru wu uwae kicaeb-wu. Bulus pu ayib cwu tsa wu piin

¹⁰u ri te wu ti ribom baa, “Sunwunn ritsen!” Unde wu mbyae nwunn u fxen ira ikyin ti kyang.

¹¹Ti ande nung iken yi ti Bulus nde ne, aba nwunn ku nyae ira ti unju uten-ba Likoniya baa, “Apxin kafe pu yi ande, a ru ba pu ba uwog-ti ike!”

¹²A fa Barnaba rinyi apxin-ba baa, Zeyus, u kunn Bulus ama baa, Hermes, ikyaen ti, awu ti ri ira siskeb.

¹³Kufug apxin-ba Zeyus wune ta iyen uka atang. Ama ti Bulus ti Barnaba ka ru ba fob uwog ti a ku sang uten atang, undufu apxin wune tae indag iki ru ba, u pu ajwug ituku ye su.[9] Awu pwen baa, awu ti ande ti uten atang na u yer wen iken yi na Barnaba ti Bulus.

¹⁴Amaa, kiye ti atom bane, Barnaba ti Bulus, nungye iken ti ande ba ku sha ti a na u nde, utob-ba ndembeb, si-yi ti ti ri be[10]. A ter ba tu ande ba, ku nyae ira baa,

¹⁵“Ande-m! Ani nde rimang ku nde iken yine? Ati si ande pangma ani. Ati si-ti apxin be. Ati ba ike ti ti ri te ni Ira Tinyang na Rimam, baa, ani na ya iken ti ukaen yine ta, ti ni ba putsa Rimam ti site unyang, ti kyae apupwen ti riben, ti iyinn, ti iken ti ta uwae-yi meme.

¹⁶Uwae kiye ti wur ru ru Rimam ya ande meme ta ti a na putsa fengo ti nyang utob-ba.

¹⁷Amaa, awu ya ti ta-wu amen be, awu tso risu-wu uwog-ti uwae iken ti tinyang ti awu ku nde. Awu ku sa upwen tswa na ni, ku nda wuci-ni ben ti kiye-yi, ku nda ni rikyaen, ku nda ni ku tsen utob.”

¹⁸Ko tí ira ti ri Bulus ti Barnaba ri ma, aba kwab u nde rikaen, itawe m byang kyi ande ba iken ti twen.

¹⁹Ama Mbayawuda iki ru Antiyok na Bisidiya ti Ikoniyum ru ba Lisitira atang. Isim ti a shir utob ande ba ba uwog-ba, a jwunn Bulus atxom u fam wu ba tika isim uka. Aba ku tang baa, awu na cwu pu wu.

²⁰Amaa, ti ande na Yesu ba byir pakob wu, awu fa sunwunn u kafe sang ti uwae uka. Ucwefam-yi awu ti Barnaba nwunn ru yi uten na Derbe.

²¹Bulus ti Barnaba ri Ira Rimam ti Tinyang te ande ti Derbe, ama ira-ba ayi nda ande yang-ba ru kubenti uwog Yesu. Tiri a kafe ba ti uka na Lisitira. A nwunn Lisitira ba Ikoniyum, ba ru fe yi Antiyok na Pisidiya.

²²A ku kyang ku ri bom ande na Yesu utob baa, aba na tsi ti kubenti uwae fengo Yesu. A ku kwen na ande baa, “Ati na u ngwa kang rikaen ti tsotso itawe ati sang kujwokwe Rimam.”

²³Meme uwog ti aba sang atang, Bulus ti Barnaba tsab na ba ande ti uwe.[11] Isim-yi ti a cwe unju, aba jwam Rimam te ande ti uwe bane baa, Rimam ti aba na ru kubenti uwog-wu nee, awu ā te ba som tetso.

²⁴Isim ti a rutsa uten ti Pisidiya, a nwunn ru ba sang ikyaeb uten ti Pamfiliya.

²⁵Aba ri ira Rimam te ande ti Perga u nwunn si ba Ataliya.

²⁶Aba nwunn atang u sang kuyae u kafe ba uten Antiyok, ti si uwog ti, ti kucang-yi, a pu ba na Rimam kujwo u tom pu ba ru ikyaen wande né a nde tag tine.

²⁷Ti aba sang Antiyok, a kunn byir ande na Yesu ti ta atang meme u ri te ba meme iken ti Rimam nde te ba. A tatso ama baa, Rimam nda ande ti si-ba Mbayawuda be riyae ti a na ru kubenti uwog Yesu ama.

²⁸Bulus ti Barnaba som te ande na Yesu atang fob usir yang-yi.