Read kutep Wande Atom 17 Bible Online

Wande Atom 17 - kutep bible

Wande Atom 17

¹A kyang kyikyang ba ru tsa uten ti Amfipoli ti Apoloniya u sa sa sa ba sang uten ti Tesalonika. Uwae uka atang, kusog Rimam Mbayawuda ta atang.

²Bulus ru ka sang itifunn-ba atang, pangma ti awu ku nde kob. Kutsab-wu ita ti awu som atang, ko usir ikyinn titini awu ku ru ka myae ira te ba, u ku tatso ande ira uwae kutsingken na Rimam.

³Awu ku tatso ba ku ri baa, ira yi ti a bae uwae Kutsingken na Rimam ti kucang na sang pu yi kubenti baa, Unde wu ti Rimam Tsab Tsi na u ngwa kang rikaen u cwu, ama awu na u nwunn uwae iticwu. Awu ku ri te ba ama baa, “Yesu wune ti m ku ri ira te ni risu-wu, awu ti si Unde wu ti Rimam Tsab Tsi.”

⁴Ira yi ti Bulus ri ne ten utob ariki uwae-ba. Aba ru kubenti, u ba sang fa Bulus ti Sila. Ariki uwae-ba si Mbahelene ti ku jwam Rimam, ande yang-ba ama si anda ti uwe ti uwe ti ta uwae uka atang.

⁵Ama ande ndufu Mbayawuda ku tsinn kitsinn. Aba kunn byir anyisu ti ufunn ti ku kyang tsotso kyang sisi uwae uka u nda ba kyikab ande meme ti ta uwae uka. Aba nwunn ba sang pakob kununn Jason uwog ti Bulus ti Sila sang rikyen. Aba ku sha ti a ye Bulus ti Sila ba na ande ti funn atang.

⁶Amaa a tu-ba aba be. Ikyaen yine aba shir Jason ti ande na Yesu iki ba na ande ti uwe uka, ku nyae ira baa, “Ande bane nda utense kyikab pu wu. Tine aba ba pu ba uwae uka ike,

⁷Jason pu ba ba som kununn-wu. Meme-ba ku nyaetsa icwe ti Ukwe Kaisar sa tsi. Aba ku ri baa, ukwe iki na ta kyi atang ti rinyi-wu na si Yesu.”

⁸Ti ande ti uten atang, ti andufu-ba fxen ira yine, uten kyirunn tag!

⁹Aba ye Jason ti ariki pae upae, a ya ba ta, a ru.

¹⁰Ti uwog byi kyi, ande na Yesu ti ta atang tam pu Bulus ti Sila ru uten ti Bereya. Ti a ka sang atang, aba nwunn ru kusog Rimam na Mbayawuda.

¹¹Ande ba ti ta atang, a naa atong ira ti aba Bulus ri skeb pu ba ande ti Tesalonika. Aba kyangte ira yi ti utob kinjo. Ti usirsir aba ku putsa ira ti ta uwae Kutsingken Rimam, ku myae baa, ira yi ti Bulus ku ri si kubenti bara.

¹²Ariki uwae-ba yang-ba ru kubenti. Aba si awa ande ti uwe na Mbahelene fa te arom iki ti si Mbahelene ama.

¹³Ti Mbayawuda ti ta uten ti Tesalonika fxen baa, Bulus na ku ri ira Rimam te ande ti uten ti Bereya ama, aba nwunn ru ba atang, u ba shir kufxaen sang kutampwa ande ti uwae uka.

¹⁴Ikyaen yine, ande Yesu pu Bulus ti ritsen si yi unju uyinn. Sila ti Timoti som ti uten ti Bereya atang.

¹⁵Ande ba ti pu Bulus si yi uyinn, aba pu wu ru fe yi uka ti Atena. Ti a ka pu ba atang, Bulus tom ba atom kafe ba Bereya ti a na ri te Sila ti Timoti ti a na ru ka tu wu fife. Aba nwunn.

¹⁶Ti Bulus som ku ji Sila ti Timoti uwae uka na Atena, utob-wu ndembeb ikyaen na apxin ti tsotso ti munnae uwae uka atang.

¹⁷Ikyaen yine, awu ku ru ka sang kusog Rimam na Mbayawuda ku myae ira te ande na Rimam, Mbayawuda te ande ti si-ba Mbayawuda be meme. Uwae ritug-ba ama, ti usir usir awu ku ri ira te ande ti awu tu ba atang.

¹⁸Ande iki ti ku kwen iken ta atang, a ku kunn ba baa, ande ti Epikuriya ti ande ti Sitokiya. A myae ira te Bulus ama. Ariki ri ira baa, “Imi ti unde ti kuskwab wune ku pwen ti wu ri te ti?” Ariki ama ri baa, “Ayi ku nde ma awu na ku ri ira risu apxin iki ti ati nung ji-ti khika be.” A ri ne ikyaen ti, Bulus ku ri ira risu Yesu ti itinwunn-wu uwae iticwu.

¹⁹Ikyaen yine aba ye pu wu ba uwog kusog rikwen iki ti a ku kunn ba baa Areyopagu. A ri te wu baa, “Ati ku sha ti ti fxen nyang ira yi tishe ti afu ku ri ne.

²⁰Uwae iken yi ti ati fxen, uriki si ti tishe uwog-ti. Ati ku sha ti ti nung nyang imbyi-yi.”

²¹Meme ande ti ta uka na Atena ti ande ti ru ise ba ku som atang, aba ku num-ba num ti ira tishe ti fxen be. A ku nde-ba iken iki be, a ku som ku sha ti a u ri ira tishe u fxen ira tishe ti ku nde amam.

²²Bulus fa sunwunn uwae kusog rikwen na Areyopagu atang u ri baa, “Ani ande ti Atena, Ame nung ti ani si ande ti ku sa utob ti kpakang-ni na iken ti ani ku fen.

²³Ikyaen ti, ti m kyang pakob uwae uka wune, ame nung afug apxin yang-yi. Uwog iki, ame tu kuta iki ti a bae atang baa, ANA APXIN TI ANDE NUNG-BA WU BE. Apxin wune ti ani nung-ni awu be, ama ani ku fen wu, si sí awu ti ame ku ri ira te ni risu-wu.

²⁴Rimam ti kyae utense ti iken meme ti ta uwae-wu si Itsekuru apupwen ti riben. Awu ku som-wu uwae asog ti ande ku mbyimbye be.

²⁵Awu shanum-wu iken iki ti nee ati u pu na wu be. Awu ti ku nda ande kusung-ba ti unyang ti nyang-ba, ti meme iken ti aba ku sha.

²⁶Ruye uwae unde kinjo, Rimam kyae utso ande meme u sa ba som ko aka uwae utense. Usir ti ande u som fob utense ike, ti riben uwog ti aba nae atang, awu ti risu-wu ti sa iken yine meme tsi.

²⁷Awu nde iken yine ikyaen ti a na sha rifab-wu tsotso sisi, iki be aba na u tu wu. Amaa Rimam som-wu fengo ti rwen te ti be. Awu ta fifer te unde titini uwae-ti.

²⁸‘Uwae kuko-wu ati site unyang, ati ku kyang ikyin-ti, u ku som usom-ti.’ Ariki ama uwae ande-ni ti ku mam akyang bae baa, ati na si anyisu Rimam.

²⁹Asiti ati a si anyisu Rimam, ati ā tang-ti baa, Rimam na pangma apxin ti ande ku mam ti itsab-ba ti zinariya ko azurfa ko kutxom be.

³⁰Ti kute, ande ta uwae kufub. Rimam sae ru iken ti aba ku nde. Amaa tine, awu ku ri te ande ti ta aka meme baa, aba na kafe isim ta ikentitibi-ba, ti a na kafe ba uwog-wu.

³¹Awu sa usir tsi pu wu ti wu pwen ande ti utense rikwen ti kubenti. Unde ti u pwen rikwen usir wu si unde ti Rimam tsab tsi ti kucang. Meme ande u nungye Unde ti Rimam Tsab Tsi ne ikyaen ti, Rimam kunn nwunn pu wu awu uwae iticwu.”

³²Ti aba fxen Bulus ku ri ira risu itinwunn na ande uwae iticwu, ariki txir wu txir. Amaa ariki ku ri baa, “Ati ku sha ti ti fxen kyi ira risu iken yine usir iki.”

³³Ikyaen yine, Bulus nwunn u ya ba ta.

³⁴Ande yang-ba sang fa wu u ru kubenti uwog Yesu. Diyonisiyo, kinjo uwae ande na kusog rikwen na Areyopagu, ti unda iki ti a ku kunn wu baa Damaris fa uwae ande ti ru kubenti usir ikyinn wu.