Read kutep Wande Atom 19 Bible Online

Wande Atom 19 - kutep bible

Wande Atom 19

¹Kiye ti Apolo ta uten Korinti, Bulus kyang ku ru tsa uwae ikyaeb uten ti Asiya. Awu sa sa sa ba sang Afisa u tu ande na Yesu iki atang

²u rang ba baa, “Ani tu Kusung ti Saen Kyag kiye ti ni ru kubenti a?” A ri te wu baa, “Iyee, ati fxen ji-ti baa, Kusung ti Saen Kyag na ta atang be.”

³Bulus rang ba baa, “Ayi a si ahan, itso batisma titini ti a nde na ni?” A ri te wu baa, “I si itso batisma ti Yohana ku nde.”

⁴Bulus ri baa, “Batisma ti Yohana nde si ikyaen ana ande ti ya ikentitibi-ba ta pu ba u kafe ba uwog Rimam. Yohana ri te ande baa, aba na ru kubenti uwog unde iki ti na ku ba isim-wu, unde wu ti ku ba isim ama si Yesu.”

⁵Ti aba fxen ira ti Bulus ri yine, aba cwe ama a nde na ba batisma uwae rinyi Itsekuru-ti Yesu.

⁶Bulus pu ajwo-wu cwu tsa ba risu, ama Kusung ti Saen Kyag si ba risu-ba u nda ba ri unju iki tishe ti Rimam tatso ba. Aba ku ya iski ira Rimam.

⁷Meme-ba ka ande rijwe asu ifaen.

⁸Uwog ne, Bulus ku ru ka sang kusog Rimam na Mbayawuda ka ishaen ita, ku ri ira te ande ti ribom-wu u ku kwab ti wu tatso ande ira risu Kujwokwe Rimam.

⁹Ariki pyir ira-wu ayi. Aba ru-ba kubenti be. Aba ye ira fengo Yesu rimbeb rimbeb uwog ande ti munn atang. Ikyaen na yine Bulus nwunn u ya ba ta u pu ande ti cwe ira-wu ru yi makanta na Tiranus. Uwog ne awu ru yi uwe ti iken ti kwen-wu ko usir titini.

¹⁰A nde asang ifaen ti iken ti kwen yine. Ikyaen na yine meme ande ti nae uten Asiya, Mbayawuda ti Mbahelene meme, fxen ira Itsekuru-ti.

¹¹Rimam ku nda Bulus ku nde iken ti ku fur ayib.

¹²Ande nung ti a pu atupwa ti Bulus ku fen atsam atang, ko atupwa ti awu ku si, tom ka uwog ande ti kicaeb, ama aba ku nwangru uwae kicaeb-ba. Rijwen titibi-ba ku ruye risu-ba.

¹³Uwae uten atang kumbub Mbayawuda iki ama ku kyang ku rwae ru rijwen titibi risu ande. Aba kwab ti a nde wande ti rinyi Itsekuru-ti Yesu pangma ti aba Bulus ku nde ama. Aba ku ri baa, “Ame ku fa fu kusen uwae rinyi Yesu ti Bulus ku ya iski ira-wu, ruye!”

¹⁴Anyisu Skeva, kinjo uwae akwen tiyang na Mbayawuda, ku nde yi. Aba si ande itsongfaen.

¹⁵Amaa kusung titibi wu ti ta risu unde wu ri te ba baa, “Ame nung pu m Yesu. Ame nung pu m Bulus. Ani ama si aye?”

¹⁶Unde wu ti kusung titibi wune ta uwae-wu ye ba kum u ten ba ifu u shi yaen atupwa-ba. Aba ter ru kununn atang ti imbyi ukaen.

¹⁷Meme Mbayawuda ti Mbahelene ti nae uten Afisa fxen ira yine, ikyenricwu ye ba. Aba sa rurob na rinyi Itsekuru-ti Yesu skeb pu yi ti kucang.

¹⁸Ariki yang-ba uwae ande na Yesu ru ba fxir iken ti kisi-ba ti a ku nde.

¹⁹Ariki yang-ba akwen uwae-ba ama byir atsingken na iken ti kimbag-ba u pu yi twen mbub ayib ande meme. Aser ti a wen risu atsingken yine ka azurfa kumbub mae rikom mbe rijwe.[14]

²⁰Ikyaen itso iken yi ti a ku nde ne, ira Itsekuru-ti Yesu tsi kunn ti ku ru yi uwe ti ribom, u shag kyi fe uwog meme.

²¹Isim ti iken yine nde pu yi, Bulus pwen[15] ti wu ru tsa ikyaeb uten ti Makedoniya ti Akaya u ka ru fe yi Urushelima. Awu ri baa, “Isim ti ame a ka pu m atang, ame ka u nung kang Roma ama.”

²²Awu pu Timoti ti Erasitu, ande ifaen uwae ande ti ku ndeya wu, u tom ba ru Makedoniya baa, awu na u som ti uten Asiya fob usir pang itawe awu na u ba.

²³I si kiye yine ti kibyag nwunn uwae Afisa ikyaen ira Yesu.

²⁴Unde ti ku kwen kufang iki ta atang ti rinyi-wu si Demetiru. Awu ku sa azurfa ku kwen iken ti ru kufug apxin-ba iki ti a ku kunn wu baa Artemis. Ande yang akwen ku ndeya wu wande, aba ku tu rifunn uwae iken yine ti a ku kwen.

²⁵Awu Demetiru kunn byir ba meme, te ariki ti ku nde itso wande wune u ri te ba baa, “Ande-m, ani nung pu ni baa, ati na ku tu rifunn-ti uwae wande yine.

²⁶Tine ani ku nung ku fxen iken ti unde wune Bulus ku nde. Awu ku kyang ku ri te ande baa, apxin ti ande na ku kyae ti ajwo-ba si iken ti ukaen amen. Ande yang-ba uwae uka Afisa ike ti meme uten ti Asiya cwe pu ba ira-wu ayi.

²⁷Rikaen ti ta ti uwe ta ri. Tine wande-ti u ru-yi risu cwucwo be. I si-yi ayine amam be, aba u nda ande sae ru kusog apxin-ti Artemis baa, ayi na si ukaen. Apxin-ti wune ti unde titini uwae uten ti Asiya ti uwae utense meme ku fen wu u jwunnsi.”

²⁸Ti ande ti funn atang fxen ira yine, rinae ye ba, aba nwunn ku taen ira baa, “Artemis ti Afisa ko siskeb!”

²⁹Ama uten wu kyirunn, ande meme nwunn u ka ye ra urae Makedoniya ifaen ti te Bulus ku kyang te atso, ti rinyi-ba si Gayus ti Aristarku. Aba shir ba ti inyae ru fe uwog iki ti ande ku byir kob atang.

³⁰Bulus ku sha ti wu ka tsi uwe ande ba ti wu na ri ira te ba. Amaa ande na Yesu cwe na-ba wu be.

³¹Ande ti uwe uten Asiya ti cwe ira-wu tom atom ba uwog-wu, ku jwam wu ti wu na tso-wu risu-wu uwog ti ande funn atang be.

³²Uwog wune, ande ti byir atang nung-ba iken ti ku nde cwucwo be. Ariki ku nghae ira risu iken iki, ariki ama ku nghae ana-ba risu iken iki txi txi, ikyaen ti ande yang akwen uwae-ba nung-ba imbyi iken ti pu ba ba byir be.

³³Uwog wune, Mbayawuda ti ta atang tur unde iki ti rinyi-wu si Alezanda ka tsi uwe ande ti wu na u ri ira te ba. Isim ti ande iki ri te wu iken ti nde nee a byir atso, awu nde kujwo baa, ande na bwe tag.

³⁴Ama ti a nungye baa, awu na si urae Mbayawuda, meme-ba taen ira ti ritsen ka awa ifaen baa, “Artemis apxin na ande ti Afisa ko siskeb!”

³⁵Ricwunnkyi, unde ti uwe na uka wu nda ande bwe tag, u ku ri te ba baa, “Ani ande ti Afisa! Ande meme nung pu ba baa, ati ande ti uka na Afisa si ande ti ku nungkyi kusog apxin-ti tiyang, Artemis, fa ti kutxom-wu ti ku cwucwe ti jwunnsi apupwen ba.

³⁶Unde iki shaen-wu ishaen risu iken yine be. Ikyaen ayine, ani tsi skirr, ni nde-ni iken iki ti ribom be. Ikyaen ti,

³⁷ani pu ande bane ba ike, ko ti a raen-ba ira iki be. Aba yib-ba iken iki uwae kusog apxin-ti be. A ri-ba ira titibi risu apxin-ti Artemis be.

³⁸Asiti Demetiru ti ande-wu a site ira ti a ri risu unde iki, kusog rikwen ta pu yi atang, ande ti ku pwen rikwen ama ta pu ba atang. A u ndeye ti a kaa kunn rikwen-ba atang.

³⁹Amaa, asiti iken iki a ta atang ti skeb ayine, ti ani ku sha, a u nde yi uwae itifunn tiyang na ande ti uten ti ku funn kob.

⁴⁰Ayi tsitsi kpang ati u sang uwae rikaen u shir ira ba risu-ti uwe gomna, ikyaen ti, asiti aba a byib ti ira risu kibyag ti nwunn yaka ne, ati u shanum ira ti ati u ri.”

⁴¹Isim ti awu ri ira yine, awu tē ba. Aba nwunn ru.