Read kutep Wande Atom 23 Bible Online

Wande Atom 23 - kutep bible

Wande Atom 23

¹Bulus pu ayib cwu tsa ande ba piin u ri te ba baa, “Ameinja-m! Ba ku fob usir ti yaka, iken ti ame nde meme, ame tu utob ti nae riben uwe Rimam.”

²Kukwen Rimam tiyang ti rinyi-wu baa Ananiya, ri te ande ti tsi fer Bulus baa, aba na tae wu kujwo unju.

³Bulus ri te wu baa, “Rimam u byinn fu ama. Afu si ubaen kupwe ti ajib ti a shen wu penti titsen. Afu putsa icwe u ku pwen m rikwen, amaa, ti afu nda ba byinn me kujwo ne tatso baa, afu ti risu-fu ku putsa-fu Icwe yi be.”

⁴Ande ti ta fer Bulus ri te wu baa, “Afu ku txun kukwen Rimam tiyang asu, afu nung-fu be a!”

⁵Bulus ri te ba baa, “Ameinja, ame nung-m ti awu si kukwen tiyang be. Kubenti, a bae uwae Kutsingken Rimam baa, ati na rimbeb-ti unde ti uwe-ti be.”

⁶Ti Bulus nungye baa, uwae ande ti funn atang ariki na si ande ti kumbub Saduke, ariki ama na si ande ti kumbub Farisi, awu sa ra unju tso u ri te ande ti ku pwen rikwen baa, “Ameinja, ame si Farisi. Itse-m si Farisi. Imbyi ira yi ti a ku pwen me rikwen ike si ikyaen ti, ame ku ru kubenti baa, ande ti cwucwu na u nwunn uwae iticwu!”

⁷Ti a fxen ira yi ti awu ri ne, kumbub ande ti Farisi ti Saduke nwunn ti ishaen ti shaen kutampwa-ba, a kata kumbub ifaen.

⁸Ikyaen ti, aba Saduke ku ru-ba kubenti uwae itinwunn na unde uwae iticwu be. A ru kubenti ama baa, atom Rimam ti apupwen na ta-yi be, kusung na ta-yi be. Amaa aba ti kumbub Farisi ku ru kubenti uwae iken yine meme.

⁹Ama ira ti nghae-ba ko ra fufa. Ariki uwae-ba Farisi ti si ande ti ku kwen na ande Icwe Rimam nwunn ritsen ku ri tan baa, “Ati tu-ti riraen iki risu unde wune be. Iki be, atom Rimam iki, ko kusung iki, ba ri ira te wu.”

¹⁰Ishaen ti shaen yi skeb pu yi, ama ukwe akyirten wu ku kyen ikyenricwu baa, iki be aba na u shi yaen Bulus tika pu ba. Ikyaen yine awu nda akyirten-wu si ka pu ra Bulus ti ribom ruye uwae ande ba, u pu wu na ba ti kusog akyirten.

¹¹Utitang usir wu, Itsekuru-ti Yesu ru ba tsi fer Bulus u ri te wu baa, “Yer-fu anying utob be. Pangma ti afu ri ira risu-m Urushelima ike, i si ahan ama afu u ri ira te ande ti Roma.”

¹²Ti uwog yae, Mbayawuda byir atso u myae ira titibi risu Bulus. A ben uben baa, aba na u ci-ba wuci be, u ngwa-ba iken iki be, se ti a wen pu ba Bulus titawe.

¹³Aba ande ti myae kumyae u ben uben yine skeb pu ba mae ifaen.

¹⁴A ru ka uwog akwen Rimam tiyang ti ande ndufu u ka ri baa, “Ati meme ben pu ti uben baa, ati na u ci-ti wuci be, ati na u ngwa-ti iken iki be se ti ati a wen pu ti Bulus.

¹⁵Tine, ati ku sha ti ani te ande ti ku pwen rikwen na tom atom ru ka uwog ukwe akyirten Mbaroma ikyaen ti wu pu Bulus na si ba na ani. Ni nde yi pangma ani na ku sha ti ni nung nyang imbyi ira yi nyinyang risu-wu. Ana-ti, ati myae mam pu ti ti ti wen wu itawe awu ba sang ike.”

¹⁶Umbae kaya Bulus iki fxen kumyae-ba ayi ti aba ku myae. Ikyaen yine, awu nwunn ru, u sang ka tu Bulus kusog akyirten u ri te wu iken yi ti a ku myae risu-wu.

¹⁷Bulus kunn ra kinjo uwae ande ba ti uwe u ri te wu baa, “Pu utaen unde wune ru ka uwog ukwe akyirten. Awu site ira ti awu u ri te wu.”

¹⁸Unde wu pu wu ru ka tu ukwe akyirten u ka ri baa, “Bulus unde ti ta pursuna kunn me ira u jwam me baa, ame na pu utaen unde wune na ba uwog-fu. Awu na site ira ti awu na ri te fu.”

¹⁹Ukwe akyirten wu tae umbae wu ru iyen kyaeb u ka rang wu baa, “Imi ti afu ku sha ti fu ri te m?”

²⁰Umbae wu ri baa, “Mbayawuda yer unju baa, aba na u jwam fu ti fu na pu Bulus si ba na ande ti a ku pwen rikwen ucwe. A ku pwen ti a kyaefa fu baa, ande ndufu na ku sha ti a na nung nyang ira Bulus yi nyinyang.

²¹Amaa cwe na-fu aba be, ikyaen ti, aba skeb pu ba ande mae ifaen ti a sī kubwa fengo u som ku ji wu. Meme-ba ben pu ba uben baa, aba na u ci-ba wuci be, na u ngwa-ba iken iki be, se ti a wen pu ba Bulus titawe. Tine, a kyae mam pu ba ijwe-ba, a som ku ji ti afu na cwe.”

²²Ukwe akyirten wu ri baa, “Ri te-fu unde iki baa, afu na ri te m ira yine be.” Awu tē ra umbae wu ru.

²³Uwog wune ukwe akyirten wu kunn ande ti uwe ifaen ti ta imbyi-wu u ri te ba baa, “Ni kunn byir akyirten ukob ifaen, te ande mae ita mbe rijwe ti ku tso kakum, te ande ukob ifaen cwucwo ti ku jwunn tu uti. Ni kyae ijwe-ni tsi ku ji ti ni nwunn aser itsongnje ti ureb ne ru yi Kaisariya.

²⁴Ni sha na Bulus kakum ti ni pu wu ru ka na gomna Felis. Nungkyi wu nyinyang.”

²⁵Awu nda ba kutsingken ti aba na sa ru ka na unde ti uwe uten wu. Uwae kutsingken wu awu bae baa,

²⁶“Ame Kalodiyu Lisiya ku bae kutsingken wune ku na fu Gomna Felis, unde ti rurob.” “Usuko-fu.”

²⁷“Unde wune ti ame tom ba ku na fu, Mbayawuda ye wu u ku pwen ti a wen wu wen. Ti ame fxen baa, awu na site kati na Kaisar ame nwunn ti akyirten-m, ati ka shir ra wu ruye uwae iticwu.

²⁸Ame sha ti m u nung imbyi iken ti nde nee a ku pwen ti a wen wu, ikyaen yine, ame ye pura wu si ba uwog ande-ba ti ku pwen rikwen.

²⁹Ame nungye baa, unde wune na raen-wu ira iki ti u nda ba a u wen wu ko a u sa wu sang pursuna ikyaen-yi be. Ira yi ta risu icwe-ba.

³⁰Isim yine tiri, ame fxen baa, Mbayawuda na ku myae ti a na wen wu, nee iken ti nde ame ye pura wu ba ku na fu. Ame ri te ba baa, a na ba pwen rikwen-ba ayi uwe-fu.”

³¹Akyirten ba fxen ira yi ti unde ti uwe-ba ri ne. A pu Bulus ru ti utitang, ba sang uten ti Antipatiru.

³²Ucwefam-yi akyirten ti ku kyang afxen kafe ti isim ru-ba kusog-ba Urushelima. Aba ti ku tso kakum pu Bulus ru fe.

³³Ti aba ka sang pu ba Kaisariya, aba sa kutsingken na Gomna Felis, u pu Bulus sang kujwo-wu.

³⁴Isim ti gomna sae kutsingken wu, awu byib Bulus baa, awu na si unde ti ikyaeb uten titini? Bulus ri baa, awu na si unde ti ikyaeb uten Kilikiya.

³⁵Gomna ri te wu baa, “Ame u pwen rikwen-fu isim ti ande ti rikwen-fu a ru ba pu ba.” Tiri awu nda ba nungkyi Bulus uwae kusog Ukwe Herodus.