Read kutep Wande Atom 25 Bible Online

Wande Atom 25 - kutep bible

Wande Atom 25

¹Isim usir ita ti Festu ye pu wu wande na gomna, awu ru Kaisariya ba Urushelima.

²Ti awu ta atang, akwen Rimam tiyang ti ande ti uwe na Mbayawuda ru ba kunn Bulus rikwen uwe-wu.

³A jwam wu ti wu na nde nyang ba, u nde fengo ti wu na pu Bulus na ru ba Urushelima ikyaen ti, a myae mam pu ba ti a wen wu wen fengo.

⁴Festu ri te ba baa, “Bulus u som ti uwae pursuna uwae Kaisariya. Ayi tsitsi kpang ti ame u kafe ru ti yi atang.

⁵Ande ti uwe-ni ā putsa m ru ti a ka pwen rikwén atang, asiti awu a raen ira.”

⁶Festu som te ba, u nde ka-wu usir itsongta ko rijwe be, u si ba yi Kaisariya. Ucwefam-yi awu ru ba som kusog rikwen u ri te ba baa, a na pu Bulus na sang ba.

⁷Kiye ti Bulus ru ba sang, Mbayawuda ti ru Urushelima ba, fa sunwunn u pakob wu. A ri ira titibi ti tsotso risu-wu, amaa, ira-ba ayi ru-yi risu be.

⁸Bulus tsi kukunn ku ri baa, “Ame nyatsa-m icwe Mbayawuda ko ana kusog Rimam, ko ana uten be.”

⁹Festu ku sha risu ti tinyang uwe Mbayawuda. Ikyaen yine awu rang Bulus baa, “Afu cwe ti fu ru yi Urushelima ti a ka u pwen rikwen yine uwe-m atang a?”

¹⁰Bulus ri baa, “Tine ame tsi uwae kusog rikwén Kaisar, Ukwe Tiyang. Ayi pang atang ti a ku pwen rikwen-m ike. Ame raen-m Mbayawuda ira iki be. Afu ti risu-fu ma nung nyang pu fu ayine.

¹¹Ame a nyaetsa icwe, u nde pu m iken ti a u wen m wen ikyaen-yi, ā wen m! Ame shaen-m ti m u cwu be. Amaa asiti ira ti a ku ri risu-m a si-yi kubenti be, unde iki ken-wu ti wu u sa m fae si kujwo-ba be. Rikwen-m ā ka kang uwe Kaisar!”

¹²Isim ti Festu myae mam pu wu ira te afaen-wu, awu ri baa, “Ti afu ri pu fu baa, a na pwen rikwen yi uwe Ukwe Tiyang, ayi si uwog-wu ti a u pu fu ru.”

¹³Isim usir iki, ukwe iki ti rinyi-wu baa Ageripa ti kaya-wu Bernike si yi Kaisariya ikyaen ti a kunnji Festu ira.

¹⁴Isim ti aba som atang fob usir yang-yi akwen, Festu sa ira rikwen Bulus tsag te Ukwe Ageripa. Awu ri te wu baa, “Unde iki ta ike ti Ukwe Felis teya wu ta ti uwae pursuna.

¹⁵Kiye ti ame tso yi Urushelima, ande ti uwe na akwen Rimam na Mbayawuda ti ande ndufu ti tsitsi sa ira-wu ba tu m. A jwam m ti m na ri baa, rikwen na ye pu unde wu.

¹⁶Amaa, ame ri te ba baa, ‘Ati Mbaroma ku nde-ti ahan be. Ana-ti, ande a ku sha ti a u wen unde ikyaen ikentitibi iki, se ti unde wu a tu riyae u tsi te ande ti kunn wu rikwen u ri unju-wu titawe.’

¹⁷Isim ayine tiri, aba Mbayawuda meme-ba ka ru ba Kaisariya ike. Ucwefam-yi ame nde-m kucib be ame ru ka som kusog rikwen u tom atom baa, a na pu unde wu ba.

¹⁸Ande ti kunn wu rikwen fa sunwunn, amaa a ri-ba ira iki titibi risu-wu pangma ti ame ku kab baa, a na u ri be.

¹⁹“Meme ira-ba yi ta risu ishaen ti shaen ti a ku shaen te wu risu Icwe Rimam-ba, ti risu unde iki ti cwu mam pu wu ti rinyi-wu si Yesu, ti unde wu ku ri ko baa, awu na tsi user.

²⁰Ame shanunm te fengo ti m u nung putsa ira yi nyinyang. Ikyaen yine ame rang unde wu baa, ko awu u cwe ti a u pu wu ru Urushelima ti a ka u pwen rikwen wu atang.

²¹Amaa awu ri baa, a na ya wu ta ti pursuna, awu na u som ji Ukwe ti Kuko ti na pwen rikwen-wu ayi. Ikyaen yine, ame ri te ba baa, a na nungkyi wu nyinyang uwae pursuna atang. Se ti ame a pu wu ka na pu m Ukwe Kaiser.”

²²Ukwe Ageripa ri te Festu baa, “Ame ama ku sha ti m fxen ira unde wune.” Festu ri te wu baa, “Ucwe afu u fxen wu.”

²³Ucwefam-yi Ageripa ti Bernike ka ru ba ti rurob na ukwe-ba, a sang ka kusog rikwen atang ti akwe rika ti ande tiyang na uten. Festu nda Bulus sang ba.

²⁴Festu ri baa, “Ukwe Ageripa ti meme ande ti som ike te ti, ani nung, awune si unde wu ti meme Mbayawuda ti ta uka ike ti ande ti ta Urushelima kunn rikwen-wu uwog-m. A ku nghae kob ira baa, a na wen wu wen.

²⁵Amaa ame nung baa, riraen-wu ko-yi ti a wen wu be. Ama ti awu jwam ti wu na sa rikwen-wu ru uwe Ukwe Tiyang, ame ku tang ti ame u pu wu ru ka u na wu.

²⁶Ame tu-m ira iki risu-wu ti ame bae ru ka na Ukwe Kaisar be. Ikyaen yine ame pu wu ba pu m uwe-fu Ukwe Ageripa, ti uwe-ni ani ande ti tsitsi ti ru ba ike, ikyaen ti ani a nung putsa pu ni ira ayi, iki be ame u tu iken ti ame u bae.

²⁷Uwog-m, i si iken ti kuskwab asiti ame a tom unde ru uwog Ukwe Tiyang u ri te-m awu ira yi ti a ri baa, awu na raen be.”