Read kutep Wande Atom 3 Bible Online

Wande Atom 3 - kutep bible

Wande Atom 3

¹Usir iki, usir jwo ureb, Bitrus ti Yohana ru yi Kusog Rimam. I si kiye wu ti ande ku funn ku jwam Rimam aser ita ti ureb.

²Uwog wune, a ka tu unde ti wam afxen atang. A mbae wu ti kicaeb yi. Ti usirsir, ande ku su wu ru ka som ufu Kusog Rimam Tiyang, uwog ti a ku kunn wu baa, Ufu ti Tinyang, ikyaen ti wu na jwam iken uwog ande ti ku ba atang.

³Ti unde wu nung Bitrus ti Yohana ku sisang, awu jwam iken uwog-ba.

⁴Bitrus ti Yohana pu ayib cwu tsa unde wu piin. Bitrus ri te wu baa, “Pu ayib sae ti!”

⁵Unde wu pu ayib sae ba u ku tang baa, iki be awu u tu iken iki uwog-ba.

⁶Bitrus ri te wu baa, “M ta-m ti aser iki ti m u nda fu be, amaa iken ti ame site yi, si iken ti ame u nda fu. Yi rinyi na Yesu Kristi unde ti Nazareti, ame ku ri te fu baa, nwunn ti kyang ikyin!”

⁷Bitrus ye unde wu ti kujwo rici u shir wu sunwunn ritsen. Ti ritsen, icwo afxen-wu ti uwae afxen-wu ndab ta, awu tu ribom afxen-wu.

⁸Unde wu fa sunwunn ritsen u fxen ira ikyin ti kyang amam. Tiri, awu te Bitrus ti Yohana sang yi kusog Rimam tetso. Unde wu ku kyang ikyin, ku mbyae tso mbyae tso, ku teb rinyi Rimam.

⁹Ande ti funn atang meme nung wu ti awu ku kyang ikyin ku teb rinyi Rimam,

¹⁰ama aba nungye baa, awu na si unde wu ti ku som ufu Kusog Rimam kute, uwog ti a ku kunn wu baa, Ufu ti Tinyang. Ayib fe ba risu. A som piin ku kab ira risu iken yi ti nde uwog-wu.

¹¹Unde wu ye Bitrus ti Yohana bur utob, ama ande ti ta uwae kusog Rimam meme ter inyae ru ba tu ba uwog iki ti a ku kunn wu baa, Ukag Solomon. Ira yi fur ba ayib.

¹²Ti Bitrus nung ande ti funn atang meme, awu rang ba ira baa, “Ani ande ti Isirela! Imi ti nde nee ira yine fur ni ayib? Imi ti nde ani pu ayib cwu tsa ti piin? Ani ku tang baa, ribom-ti ti itinyang-ti ti nda unde wune ku kyang ikyin a?

¹³Iyee! Rimam na Ibrahim ti Ishaku ti Yakubu, Rimam na abitse-ti ti kute, nda pu wu Umbae-wu Yesu kuko ti rurob. Amaa ani Mbayawuda sa Yesu wune fae si kujwo ande ti uwe uten. Bilatus ti risu-wu pwen ti wu na ya Yesu ta, amaa ani shaen-ni awu uwe Bilatus.

¹⁴Awu Yesu wu si unde ti tinyang, unde ti saen kyag uwe Rimam. Amaa ani shaen-ni awu. Ani jwam Bilatus ti wu na sa ruye na ni unde ti ku wen ande, kutunn unju Yesu.

¹⁵Ani wen unde wu ti ku nda ande unyang, amaa Rimam kunn nwunn wu uwae iticwu. Ati sae pu ti awu ti ayib-ti.

¹⁶Si sí rinyi Yesu wune ti nda ti nwangru unde wune. Iken ti ani ku sae ku nung ne, iken yi nde ikyaen ti, unde wu ru uwae kinjo uwog rinyi Yesu. Rinyi na Yesu ti sa ribom ijwe na wu uwe-ni.”

¹⁷Bitrus ri kyi cwucwo baa, “Ameinja! Ame nungye pu m baa, iken yi ti ani nde ne, ti iken yi ti ande ti uwe-ni nde te Yesu ne, ani nde yi uwae kufub.

¹⁸Amaa, ti kucang akwen, Rimam nda meme ande ti ku ya iskin ira-wu ri te ande baa, Unde wu ti awu Tsab Tsi na u ngwa kang rikaen. Tine Rimam kumunn pu wu ira-wu yine uwae iticwu na Yesu.

¹⁹Ikyaen na yine, ni ya ikentitibi-ni ta! Ni kafe ru ba uwog Rimam ti wu ya ta na ni ikentitibi-ni, ikyaen ti ni tu riyae ti ni kyae nyang utob-ni uwog-wu.

²⁰Asiti ani a nde ayine, awu u tom ba na ni Yesu wune ti si Unde wu ti awu Tsab Tsi na pu wu ani ti kucang akwen.

²¹Yesu u som kang apupwen itawe, se usir ti Rimam a kyae nyang pu wu utense meme titawe, pangma ti ande-wu ti saen kyag ti ku ya iskin ira-wu ri kute.

²²Pangma ti Musa ri te abitse-ti ande ti Isirela baa, ‘Uwe ike Itsekuru-ti Rimam u tom ba na ni unde ti u ya iskin ira Rimam pangma ti awu tom me ba. Unde wu u si kinjo uwae-ni. Ni naa atong ti ni fxen ira meme ti awu u ri te ni.

²³Musa ri baa, asiti unde iki a naa atong fxen-wu ira na unde wu ti ku ya iskin ira Rimam be, aba ā rwae wu ruye uwog ande ti Rimam u wen wu.’ ”

²⁴Bitrus ri kyi cwucwo baa, “Kubenti! Meme ande ti ku ya iskin ira Rimam, Samuwel ti aba ti putsa wu isim meme, aba ri ti unju kinjo baa, kiye na ku ba ti iken yine meme na u nde. Tine ira-ba ayi sang pu yi kubenti.

²⁵Aba ande ti ku ya iskin ira Rimam si abitse-ni. Ikyaen na yine unju ti yer ti Rimam yer te ba si ana-ni ama. Pangma ti Rimam yer unju te Ibrahim baa, ‘Ikyaen na rishi-fu, meme ande ti utense na u tu itinyang.’

²⁶Si si ani Mbayawuda ti Rimam tom Umbae-wu Yesu ba uwog-ni titawe, ikyaen ti wu na nda ni itinyang u kafe utob-ni ba uwog-wu ti ni na ya ikentitibi-ni ta.”