Read kutep Wande Atom 4 Bible Online

Wande Atom 4 - kutep bible

Wande Atom 4

¹Kiye ti Bitrus ti Yohana ku ri ira te ande, ande iki ru ba uwog-ba. Aba si akwen Rimam, ti unde ti uwe na akyirten ti ku som kyi Kusog Rimam Tiyang, ti ande iki ti kumbub Saduke.

²Ande bane tso rinae ikyaen ti, a cwe-ba ira yi ti Bitrus ti Yohana ku kwen na ande be. Aba ku ri baa, itinwunn Yesu uwae iticwu tatso paenine baa, ande na ku nwunn uwae kukwae cwucwo.

³Ikyaen yine, a ye Bitrus ti Yohana ru ka kwer pursuna, se ucwe fam-yi, ikyaen ti, uwog byikyi pu wu, ti a u pwen rikwen-ba usir wu ta-yi be.

⁴Amaa ande yang akwen ru uwae kinjo uwae ira ti Bitrus ti Yohana ri. Ande na Yesu fob kumbub itsong kiye wu.

⁵Ucwefam-yi, ande ti uwe na Mbayawuda, ti ande ndufu, ti ande ti ku kwen na ande Icwe Rimam funn uwae uka ti Urushelima.

⁶Ande ndufu iki ta atang ama, aba Anas ti si kukwen Rimam tiyang, ti ameinja-wu, ti Kayafas ti Yohana ti Alezanda.

⁷A pu Bitrus ti Yohana tsi kutampwa-ba, ku byib ba baa, “Ani tu kuko-ni aka nee ani nwangru unde wune ti site-wu afxen be? Yi rinyi aye ti ani nde iken yine?”

⁸Uwog wune, Bitrus kumumunn te Kusung ti Saen Kyag utob-wu, ama u ri te ba baa, “Ani ande ndufu ti ande ti tsitsi! Ni fxen!

⁹Ani ku byib ti ira risu iken ti tinyang ti ati nde na unde ti kicaeb wune, ti iken ti nde itawe awu tu ribom ijwe-wu.

¹⁰To, ame ku ri te ni ande ti uwe meme ti ande ti Isirela meme, ni nung baa, iken ti sa unde wune tsi uwe ni ike ti ribom ijwe-wu si kuko na Yesu Kristi. Yesu, unde ti Nazareti, unde ti ani wen ra wu, amaa Rimam kunn nwunn wu uwae iticwu. Ayi si kuko na rinyi-wu ti nde iken yine!

¹¹Pangma ti a bae uwae Kutsingken Rimam, Yesu wune si Kutxom wu ti ani ande ti ku mbye kusog shaen wu shaen, amaa, kafe pu wu kutxom ti a u mbye rikwerfe kusog atang,

¹²Unde iki ta-wu uwae utense ti wu u nde tu ti wu nwangru ti be, se Yesu amam, ikyaen ti, Rimam nda-wu ati rinyi unde iki utense ike ti u nwangru ande be, se rinyi Yesu amam.”

¹³Ti Bitrus ri mam pu wu ira yine, ande ndufu ba ti ku pwen rikwen, ayib fur ba timambe, ikyaen ti, a nung Bitrus ti Yohana ku ri ira-ba ti ribom, ko ti a si ande ti kutur ti tu-ba iken ti kwen yang-yi be. A kab ira tiri baa, Bitrus ti Yohana na si ande ti som te Yesu ti kucang.

¹⁴A shanum ira ti a u ri ikyaen ti, unde wu ti Bitrus ti Yohana nwangru tsi te ba atang ama.

¹⁵Ikyaen yine, a tē ba kusog atang baa, a na ruye ise. Ti a ruye pu ba ise, ande ndufu ri ira te atso.

¹⁶A ri baa, “Ati u nde rimang te ande bane? Ande ti Urushelima meme nung pu ba ti ande bane nde wande tiyang ti ku tso kuko Rimam. Ati u shaen tu-ti ayi be.

¹⁷Amaa i nyang skeb ti ti fa ba kusen baa, a na ri-ba ira te ande yi rinyi Yesu cwucwo be, be ande meme u fxen ira yi.”

¹⁸Ikyaen na yine, a kunn Bitrus ti Yohana kafe sang ba kusog rikwen atang. A fwa ba kusen baa, “Ni fxae iken ti kwen yi rinyi Yesu wune! Ni ri-ni ira yi rinyi-wu cwucwo be!”

¹⁹Amaa Bitrus ti Yohana ri te ba baa, “Ni ri te ti! Ayi nyang skeb ti ti fxen ira na Rimam ree, re ana-ni?

²⁰Ikyaen ti, ira yi ti ati nung, ku fxen, ati u nde tu-ti ti ti fxae ira yi be.”

²¹Ande ba ti ku pwen rikwen fwan ba kibyag ti ribom, ama ya ba ta. A byinn-ba aba kimbab be, ikyaen ti, a tu-ba ira titibi iki risu-ba be. Ande meme ku teb rinyi Rimam ikyaen iken ti nde uwog unde ti wam afxen.

²²Unde ti a nwangru wu ne, asang-wu skeb pu yi mae ifaen.

²³Kiye ti a ya Bitrus ti Yohana ta, aba ru ka tu ande na Yesu ti tsitsi. A tsag te ba ira yi ti akwen Rimam tiyang ti ande ndufu ti tsitsi ri te ba kusog rikwen.

²⁴Ti ande na Yesu fxen ira yi, a byir atso ti uwog kinjo ku jwam Rimam. A jwam Rimam baa, “Itsekuru-ti Rimam, afu kyae apupwen ti riben, ti uyinn, ti iken ti ta uwae-yi meme.

²⁵Yi uwae kuko na Kusung-fu ti Saen Kyag, afu ri ira yi unju na itse-ti Ukwe Dawuda, upyi-fu. Afu nda wu ri ira baa, ‘Imi ti nde ande ti nung-ba Rimam be ku si unju tetso? Imi ti nde aba ku myae kumyae ti ukaen? Aba u nde num ti risu-ba.

²⁶Akwe ti utense kyae ijwe-ba tsi, ande ti uwe utense byir atso, ikyaen ti a tsi ukub te Itsekuru ti Unde wu ti Awu Tsab Tsi.’

²⁷Ara kubenti, Itsekuru-ti Rimam, Ukwe Herodus ti Bilatus Buntus ti Mbayawuda ti ande ti nung-ba Rimam be byir risu-ba. Aba tsi ukub te Yesu, Umbae-fu ti Saen Kyag, Unde wu ti afu Tsab Tsi.

²⁸Iken ti ande bane nde te Yesu ne, si sí ayi ti afu sa tsi uwae kuko-fu ti kucang baa, ayi na u nde.

²⁹Itsekuru-ti Rimam, fxen ti jwub-ti. Sae ikentitibi meme ti a ku pwen ti a nde te ti. Ati si apyi-fu. Nda ti ti ti ri ira-fu ti ribom utob.

³⁰Nda ti kuko ti ti nwangru ande uwae kicaeb-ba. Nda ti ti ti nde wande ti ku fur ayib, ti wande ti ku tso kuko-fu uwae rinyi Yesu, upyi-fu ti saen kyag. Ayi ā si ahan.”

³¹Isim-yi ti a jwam pu ba Rimam, kusog wu ti aba ta atang kyi ijwe. Meme-ba atang munn ti Kusung ti Saen Kyag Rimam utob-ba. Ama aba nwunn ku ri ira Rimam te ande ti ribom utob.

³²Ande na Yesu pu meme rifunn-ba, ku ndeya atso ti utob-ba kinjo ti uwae-ba kinjo. Uwae-ba, unde iki ta-wu ti ri baa, iken ti awu site si ana-wu be.

³³Ande ti atom ama ku ri ira te ande ti ribom-ba meme risu itinwunn na Yesu uwae itikicwu. Rimam sa rinyangwae-wu yaen si risu-ba meme.

³⁴Uwae-ba unde ti shanum iken ta-wu be, ikyaen ti, ande ti site rifunn pangma asog, ti risaen ufang, a sa yi jabci

³⁵u pu aser yi ba na ande ti atom. Aba pu aser-yi kan na ande ti shanum iken yi.

³⁶Uwog ne, unde iki ta atang ama, rinyi-wu baa, Yusufu. Ande ti atom ku kunn wu baa, Barnaba. (Imbyi yi baa, unde ti ku ri jim ande utob.) Awu si Mbalawi, a mbae wu uten Kuburus.

³⁷Awu sa risaen ufang-wu iki jabci u pu aser-yi ba na ande ti atom.