Read kutep Wande Atom 8 Bible Online

Wande Atom 8 - kutep bible

Wande Atom 8

¹Ama Sawulu ta atang u cwe ira itiwen Stefana. Ti usir wu, ande bag ku caeb shi ande Yesu ti ta Urushelima timambe. Ande na Yesu ter shag tag, ariki ter ru Yawudiya ti Samariya. Kum ande ti atom amam ti som ti isim uwae uka ti Urushelima.

²Ariki ti putsa Rimam ti utob-ba kinjo sa Stefana nji, u jwub ira ko timambe.

³Ama Sawulu ku kwab ti wu u twenji ande na Yesu meme. Awu ku sang kusog wune, nwunn ba sang kusog wune, ku ye ande na Yesu ruye, anda te arom, u ku pu ba ru ka sang pursuna.

⁴Ande na Yesu ba ti ter shag, aba nwunn ku ri ira Rimam meme uwog ti a ku kyang atang.

⁵Filip ru ana-wu uten ti Samariya u ka ri ira Yesu te ande ti atang baa, Yesu na si Unde ti Rimam Tsab Tsi.

⁶Ande ti byir atang naa atong ira ti Filip ri te ba. Meme-ba fxen u sae iken ti ku tso kuko Rimam ti awu nde.

⁷Awu rwae rijwen titibi ruye ijwe ande yang-ba. Ayi ku ruye ijwe ande te ira ti nyae. Ande ti cwu afxen ti ajwo, ti ande ti pxib afxen meme, tu ribom ijwe.

⁸Ande ti uten ti Samariya tsen utob.

⁹Uwae uten wu, unde iki ta atang, a ku kunn wu baa, Siman. Awu som atang fengo rwen pu wu. Awu ku nde iken ti imbag, ama iken ti awu ku nde ku fur ande ayib yang-yi akwen. Awu ku ndub ijwe baa awu na si unde tiyang.

¹⁰Meme-ba uwae uten atang, ande ndufu te anyisu tinying, sa utob-ba tsi uwog-wu. A ku ri baa, “Unde wune si kuko Rimam ti a ku kunn baa, Kuko ti skeb titag.”

¹¹A sa utob na wu ikyaen ti, awu ku nde na ba iken ti imbag ne fengo-yi rwen pu yi.

¹²Amaa kiye ti Filip ru ba ri ira ti tinyang risu Kujwokwe Rimam ti risu Yesu Kristi, aba ru kubenti ama a nde na ba batisma, arom te anda.

¹³Siman ti risu-wu ru kubenti ama. Isim-yi ti a nde na wu batisma, awu ba som te Filip. Ayib fur wu kiye ti awu nung wande ti ku fur ayib ti Filip nde ti ku tatso kuko na Rimam.

¹⁴Ande ti atom ti ta uka na Urushelima fxen baa, ande ti uten ti Samariya na kyangte pu ba ira Rimam. Ikyaen yine, a tom Bitrus ti Yohana ru ka na ba.

¹⁵Ti Bitrus ti Yohana ka atang, aba jwam Rimam ikyaen ti ande ba na u tu Kusung ti Saen Kyag.

¹⁶Ikyaen ti, Kusung ti Saen Kyag si ba-wu risu ko kinjo uwae-ba khika be, si nyáng batisma amam ti a nde uwae rinyi Yesu.

¹⁷Bitrus ti Yohana pu ajwo cwu tsa ba, ama Kusung ti Saen Kyag si ba ye ba.

¹⁸Kiye ti Siman nung ti Kusung Rimam si ba risu ande ba ti ti atom Yesu pu ajwo cwu tsa ba, awu pu aser na Bitrus ti Yohana

¹⁹u jwam ba baa, “Ni nda m kuko ne ama ikyaen ti ame a sa kujwo-m nae tsa ande a u tu Kusung Rimam ama.”

²⁰Bitrus ri te wu baa, “Afu ku tang baa, afu u jaeb rinyangwae Rimam jaeb a? Afu te aser-fu meme ni ru ka twenji!

²¹Afu site-fu ti uwog uwae wande-ti be, ikyaen ti, utob-fu si-yi ti kubenti uwe Rimam be.

²²Ya ikentitibi-fu ayine ta, ti jwam Rimam ti awu na ya ta na fu ira titibi ti afu tang yine.

²³Ame nung afu munn ti rikàen titibi yi utob-fu. Afu si upyi ikentitibi!”

²⁴Siman ri te Bitrus ti Yohana baa, “Ni jwam Rimam ikyaen-m, ti iken ti afu ri ne ā tu-yi ame be.”

²⁵Isim ayine, Bitrus ti Yohana ri tso te ande iken ti Rimam nde te ba u tsag te ba ira na Itsekuru-ti Yesu. Kiye ti a kafe ku ba ti uka na Urushelima, aba ri ira tinyang na Rimam te ande yang akwen ti ta fengo, uwae uten ti Samariya atang.

²⁶Usir iki atom Rimam iki ti apupwen ri te Filip baa, “Nwunn ti putsa fengo ti ku ru Urushelima ku si ka Gaza.” (Tine ande ku putsa-ba fengo wu cwucwo be.)

²⁷Ara Filip nwunn u ru u ka tu unde iki ti som uwae keke kakum ku ru. Unde wu si kinjo uwae ande ti uwe ti uwe na uten ti Etiyopiya. Ukwe-ba si unda ti rinyi-wu si Kandake. Wande na unde wu si ti awu ku nungkyi aser. Awu ru ba Urushelima ti wu ba fen Rimam atang.

²⁸Kiye yine ama, awu kafe ku ru yi uten-wu nee Filip tu wu. Awu ku nung putsa uwae ira ti Ishaya bae uwae kutsingken-wu.

²⁹Kusung Rimam ri te Filip baa, “Nwunn ti ko ka uwog unde wune.”

³⁰Filip nwunn ti ritsen ka fxen wu, awu ku nung putsa uwae ira ti Ishaya bae. Awu rang wu baa, “Afu nungye ira yi ti fu ku pwen ne a?”

³¹Unde wu ri baa, “Unde iki ta tso-wu ame be. Ame u kyang rimang nung tu yi?” Awu jwam Filip baa, awu na ko tso ba som te wu.

³²Uwog ti awu ku sae atang, a bae baa, “Awu pangma mbawen, mbawen ti a sa wu ku ru ti a u wuwen. Pangma umbae mbawen ti a yer asung-wu, awu ku ri-wu ira iki be. Ko unju ama awu mbub-wu be.

³³A nda wu rukwae. A pwen wu rikwen, a ri-ba ayi uwae kubenti be. Umbae ta-wu ti rinyi-wu u kunn be. Unyang-wu utense mam pu wu. Awu ama ya utense ta pu wu.”

³⁴Urae Etiyopiya wu ri te Filip baa, “Ri te m, unde ti ku ya iskin ira Rimam ti bae ira yine, awu bae yi risu-wu ree, re risu unde iki?”

³⁵Filip bag ku ri te wu Ira Tinyang risu Yesu, sa ti uwog wu ti unde wu nung putsa atang.

³⁶Ti a kyang ku ru, a sa sa sa ru ba sang uwog iki ti ambyi ta atang. Unde wu ri baa, “Sae! Ambyi ti ta ri! Imi ti u nde ti afu u nde na-fu ame batisma be?”[4]

³⁸Unde wu nda kakum kya tsi. Awu te Filip ko si yi uwae ambyi atang. Filip nde na wu batisma.

³⁹Kiye ti a tsoye uwae ambyi atang, Kusung ti Saen Kyag ba ye ra Filip ru. Unde wu nung-wu ayib-wu cwucwo be. Awu munn ti utob titsen u fxen ira ti ru uten-wu.

⁴⁰A kya Filip uten ti Azotus. Uwae uten atang meme, awu ku kyang ku ri ira Rimam te ande, ba kwar ti uten ti Kaisariya.