Read kutep Roma 1 Bible Online

Roma 1 - kutep bible

Roma 1

¹Kutsingken wune ru uwog-m Bulus, umbaefxen Yesu Kristi, ame ti Rimam tsab tsi baa, ame na si atom-wu, u tom m ru ti m na ka ri ira-wu ti tinyang.

²Ira ti tinyang yine, Rimam yer unju te ti ti kucang risu-yi, yi fengo na atom-wu ti bae ira-wu si uwae atsingken ti saen kyag.

³Ira yi ta risu Umbae-wu Yesu. Yi rimenn ijwe, a mbae wu fa rishi Ukwe Dawuda.

⁴Ama yi uwae ira kusung, awu si umbae Rimam. Rimam ye ayine tsi uwae kuko-wu kiye ti awu kunn nwunn wu uwae iticwu ti unyang, yi wande na Kusung ti Saen Kyag. Awu ti si itsekuru-ti Yesu Kristi.

⁵Yi uwae wande na Yesu, ame tu ayibrisi, u si atom-wu, ikyaen ti ande ti utense meme na ā ru kubenti uwog-wu, u nae risu riben na wu, u nda rinyi-wu kuko.

⁶Ani fa atang ama, ani ande ti Rimam kunn ni baa, ani na si ana Yesu Kristi.

⁷Ame bae ku na ni, meme ande Rimam ti ta uten Roma, ani ande ti Rimam ye ure te ni, u kunn ni baa, ani na si ande-wu ti saen kyag. Itse-ti Rimam ti Itsekuru-ti Yesu Kristi ā nda ni itinyang ti kujimshwur.

⁸Tawe, ame ku nde fxaefa na Rimam uwae rinyi Yesu Kristi risu-ni meme, ikyaen ti, ko aka uwae utense, ande ku fxen iten uwae kinjo-ni.

⁹Rimam ti risu-wu, ti ame ku fen ti utob-m kinjo, u ku nde na wu wande yi uwae ira ti tinyang na umbae-wu Yesu ti ame ku tswa te ande, nung pu wu baa, ame na ku kunn rinyi ni,

¹⁰ku tangsom te ni ko kiye titini uwae itijwam-m baa, Rimam a cwe ira, awu na nda m riyae ti m u ba uwog-ni.

¹¹Ame sha ti m nung kang ayib-ni, ikyaen ti, uwae itiba-m, ani u tu rinyangwae Kusung Rimam, ti u nda ni ribom utob,

¹²ikyaen ti, ame ti ani meme na u tu ribom utob tetso.

¹³Ameinja, ame ku sha ti ni nung baa, kiye ko pu yi ti ame ku myae ti m na u ba uwog-ni, amaa, ame tu-m riyae be. Ame sa tsi ti m na u ba shir ariki kutampwa-ni na ba fengo Rimam pangma ti ame nde uwog ande ti tsitsi ti si-ba Mbayawuda be.

¹⁴Ikyaen ti, ayi si pangma ame na site ripab ti ame na u pae kang na ande meme, ande ti ta ufang ti ande ti uwae uka, ande ti nung kutsingken ti ande ti nung-ba kutsingken be.

¹⁵Ikyaen ayine, ame tsi utob ti m ka ri kang Ira ti tinyang Rimam te ni ande ti Roma ama.

¹⁶Ame ku wae-m rukwae ti m sa ira ti tinyang na Yesu ri te ande be, ikyaen ti, ayi ti si kpakang Rimam ti ku nwangru meme ande ti ru kubenti uwog Yesu Kristi, Mbayawuda te ande ti si ba Mbayawuda be.

¹⁷Ayi si si ira Yesu yine ti tatso ti usom ti som ti kpang atang uwe Rimam, ti bag te uwae kinjo, u ka cwunnkyi te uwae kinjo, pangma ti a bae uwae Kutsingken Rimam baa, “Unde ti ku nde iken ti kpang atang, ku som usom-wu fengo uwae kinjo.[1]”

¹⁸Rimam tatso pu wu ande fengo ti awu, uwae rinae-wu, u pwen ande rikwen risu kujwo wande titibi ti aba ku nde, ti ira ti kab titibi ti ta utob-ba. Ikentitibi-ba yine ku nda ba a ku cebfur ira ti kubenti.

¹⁹Ikyaen ti, meme iken ti ande u nung risu Rimam, awu tatso pu wu aba paenine.

²⁰Ti ti Rimam mam utense, ande ku nungye baa, awu na site kuko u si Rimam ti kubenti, ko ti aba ku nung-ba awu ti ayib be. Aba nungye iken yine uwae iken ti awu mam tsi. Ikyaen yine, aba ta te-ba ti ira ti aba u ri ti u nwangru ba uwae usir rikwen be.

²¹Ko ti aba nung baa, Rimam na ta atang, kuko ti aba ú nda wu ti awu si Rimam, aba nda-ba wu be, u nda-ba wu fxaefa be. Ira ti kab-ba kafe ira ti ukaen, utob-ba ti kuskwab tsi kufub.

²²A ku ri baa, aba na ben ayib, amaa, aba si ande ti kuskwab.

²³Ti a fen Rimam ti site kuko ti riyinn, u si Rimam ti tsi kukunn, aba ruka ku fen iken ti ku tsi-wu tsi be ku cwu, pangma acwub ituku ti a kyae yi pangma ande, ti inung, ti iken ti ku pang ti rishwu, ti ibye kutur ti tsitsi.

²⁴Nee iken ti nde Rimam ya ba ta, a ku nde iken ti ku txi iyib ti utob-ba ku sha, u ku sa ijwe-ba ku nde iken ti ku wae rukwae tetso.

²⁵Ti aba u fen Rimam u nde na wu wande, aba ku fen iken ti Rimam kyikyae kutunn unju ti a fen Rimam ti mam iken. Itinyang si ana-wu tsikunn ru fe yi uwe! Ayi ā si ahan.

²⁶Né iken ti nde, Rimam ya ba ta ti a na jwunnsi uwae iken ti ku wae rukwae ti ti nde ti ijwe-ba. Anda te anda ku nae tetso, ti si-yi fengo ti Rimam ye tsi be.

²⁷Arom ama ku nde mbwe-yi. Aba ya anda ta u ku nae te-ba arom. Iken ti a ku nde tetso ku wae rukwae. Ama aba ku shir upae na risu-ba ikyaen ikentitibi-ba yi.

²⁸Cwucwo, ti ande pyir ti a u kyangte ira ti kubenti risu Rimam, awu ya ba ta ti a nde iken ti kpang-yi atang be.

²⁹Aba munn te ikentitibi ti ira ti kab titibi ti tsotso, ti ayib ti taen. Aba ku sa ande khika, u ku tsinn kitsinn, u ku wen ande, u ku byinn kutxu, u ku kyaefa atso. Aba ku kab nyáng ira titibi risu ande u ku tsag kitsag

³⁰u ku txunmbeb ande. A ku pyir Rimam, a ku saeru ande, a ku ndub ijwe, u ku pam ipam ikyaen iken ti aba ku nde. A ku myae fengo tishe munnae munnae ti a nde ikentitibi. A ku bom risu te abitse-ba te abiya-ba.

³¹A ku kab-ba ira be, a ku kumunn-ba unju ti yer-ba be. Aba ku kab-ba ira ti tinyang be, u ku nung-ba ayibrisi ande be, ko tikiyib.

³²Ko ti aba nung icwe Rimam ti ri baa, ande ti ku nde itso iken yine u tu kang rikwen iticwu risu-ba. Amaa, a ku nde yi nde se. Ayi si-yi ayine amam be. Kiye ti ariki a ku nde itso iken yine, aba ku ri baa, ayi na nyang.