Read kutep Roma 10 Bible Online

Roma 10 - kutep bible

Roma 10

¹Ameinja, ayi tsi m ti utob uwae ti ande-m Mbayawuda ā tu itinwangru. Ame ku jwam Rimam risu-ba ti utob-m kinjo.

²Ame sae pu m te ayib-m baa, aba na ku kwab ti a u putsa ira Rimam ti byag kwan timambe, amaa, a ku putsa Rimam uwae kufub. A nung-ba iken ti aba ku nde be.

³A sae ru fengo ti Rimam ye tsi ti ande na tu risu tinyang uwe-wu, u ku kwab ti a na putsa fengo iki ti si ana-ba. Ayi tatso baa, a na nae-ba risu riben fengo ti Rimam kyae tsi ti ande u tu risu tinyang uwe-wu be.

⁴Ikyaen ti, wande na icwe mam pu yi kiye ti Kristi ru ba, ama unde titini ti a ru kubenti uwog-wu, Rimam u sa wu tsi baa, unde ti kubenti.

⁵Musa bae ira baa, asiti unde a ku sha risu tinyang uwe Rimam yi fengo na icwe ti ti putsa, asiti awu a putsa icwe, unde wune u tu unyang ti tsi kukunn.

⁶Amaa unde ti ku sha risu tinyang uwe Rimam yi fengo na uwae kinjo, ana-wu txi. A bae baa, “Ani ku tang baa, se unde a tso fe yi apwa apupwen” (ti wu kaa pu Kristi si atang ba). Iyee!

⁷“Ko ani ku tang baa, se unde a si fe yi kukwae iticwu” (ti wu kaa pu Kristi tso atang ba). Iyee!

⁸A bae baa, “Ira Rimam ta fifer te ni ike. Ayi ta unju-ni u ta utob-ni.” Ira Rimam ti a ri ne si si ira risu uwae kinjo uwog Kristi ti ati ku ri te ni.

⁹Asiti afu a ri tso ti unju-fu baa, Yesu na si Itsekuru-fu, u ru kubenti uwae utob-fu baa, Rimam na kunn nwunn wu uwae iticwu, afu u nwangru.

¹⁰Ikyaen ti, unde ku ru kubenti uwae utob-wu, u ku tu risu tinyang uwe Rimam. Unde ku ri tso ira ti unju-wu u ku tu itinwangru.

¹¹A bae uwae Kutsingken Rimam baa, “Unde titini ti a ru kubenti uwog-wu, awu u tu-wu rikwae ti wae be.”

¹²Uwae ira yine, itikata ta-yi kutampwa Mbayawuda te ande ti ise be. Itsekuru-ba meme si kinjo rikaen. Awu ku yaen rinyangwae si risu meme ande ti ku jwam iken uwog-wu.

¹³Pangma ti a bae uwae Kutsingken Rimam baa, “Unde titini ti a kunn tso rinyi Itsekuru-ti Rimam, awu u tu itinwangru.”

¹⁴Amaa, ande u kyang rimang u kunn tso rinyi Rimam, asiti aba a ru-ba kubenti uwog-wu be? Cwucwo, aba u kyang rimang u ru kubenti uwog unde ti aba fxen ji-ba ira risu-wu usir iki be? Cwucwo aba u kyang rimang u fxen ira risu Rimam asiti unde iki a ru ka ri te-wu aba be?

¹⁵Cwucwo, unde u kyang rimang u nwunn ru ka ri ira Rimam te ande, asiti a tom-ba wu tom be? Pangma ti a bae uwae Kutsingken Rimam baa, “Itiba na ande ti ku ya iskin ira ti tinyang nyang timambe.”

¹⁶Amaa, ayi si-yi ande meme ti kyang te ira ti tinyang na Rimam be. Pangma ti Ishaya unde ti ku ya iskin ira Rimam ri kute baa, “Itsekuru-m, unde iki ru kubenti uwae ira ti ati ri njaa”

¹⁷Ayine tatso baa, ande u fxen kang ira itawe aba u ru uwae kinjo. Ira ti aba ku fxen ama si ira Yesu Kristi ti ande ku ri te ba.

¹⁸Amaa, ame u rang ira iki. Ande ti Isirela fxen-ba ira Rimam be a. Kubenti, aba fxen pu ba. A bae uwae Kutsingken Rimam baa, “Afxenjwin ande ti atom kyang ka sang pu yi uwog ti ta fengo ti rwen. Ira unju-ba shag kyi fe utense meme.”

¹⁹Ame u rang kyi cwucwo, anyisu Isirela fxen nyang-ba imbyi ira yi be a. Aba fxen yi. Rimam ri yi unju Musa ti kucang baa, “Ame u nda ni tsinn kitsinn risu kumbub ande iki ti si-ba iken iki be. Ame u nda ni ani u tso rinae te ande ti ben-ba ayib be.”

²⁰Ishaya ma kyen-wu ikyenricwu be, u ri paenine ira unju Rimam baa, “Ande ti ku sha-ba rifab-m be, a kya pu ba ame. Ame tatso pu m risu-m uwog ande ti rang-ba ame be.”

²¹Ama Rimam ri ira risu anyisu Isirela baa, “Sa ti kiskinn pu usir te ame ku yae ajwo ti ande-m abane na kafe ba ren ure te m, amaa, aba bom risu ku fxen-ba ira be.”