Read kutep Roma 11 Bible Online

Roma 11 - kutep bible

Roma 11

¹Ame u rang kyi ira iki cwucwo. Tine ayi ku tatso baa, Rimam na pyir pu wu ande-wu Isirela a. Iyee. Ame ti risu-m ame si urae Isirela, rishi Ibrahim, ame fa uwae ande umbyi na Benjamin.

²Rimam pyir-wu ande-wu ti awu tsab tsi kucang be. Ani nung pu ni ira ti a bae uwae Kutsingken Rimam risu Eliya, kiye ti awu jwub ira uwog Rimam risu ande ti Isirela baa,

³“Itsekuru, a wen pu ba ande ti ku ya iskin ira-fu. A byinn mbub pu ba kuta ti a ku fen fu atang, nyáng ame kinjo rikaen amam ti tsitsi, ti ku putsa ira-fu. Tine ama a ku sha rifab-m ti wen.”

⁴Amaa, imi ti Rimam ri te wu? Awu ri baa, “Ame pu ande kumbub itsongfaen tsi ti ku fen-ba apxin Baal wune be.”

⁵Ayi si ahan ama tine, ariki ta atang kpang ti Rimam tsab sa pu wu aba uwae ayibrisi ti ana-wu.

⁶Amaa, asiti ayi a si uwae rinyangwae ti Rimam ku tsab ande, ayi ku tso baa, ayi si-yi ikyaen itikwab wande iki ti ande ku nde be. A baa, Rimam na putsa kujwo wande ande, ayi ú si-yi rinyangwae-wu cwucwo be.

⁷Ira yi si rimang tiri? Ande ti Isirela shanum te iken ti a ku sha, amaa, ande iki uwae-ba ti ko-ba be ti Rimam tsab tsi, aba tu yi. Ande ti tsitsi yir kyi utob-ba.

⁸Pangma ti a bae uwae Kutsingken Rimam baa, Rimam nda ba rob risu, aba sae tu-ba uwog be. Aba fxen tu-ba ira be, ba ku sang ti usir ti yaka ne.

⁹Ukwe Dawuda ama ri ira risu-ba baa, “Rimam ā sa ukwab-ba kafe kubim ti u ye ba. Wuci-ba ā kafe kutxae uwog-ba, u si kukwae itijwunnsi-ba. Ayi ā si kimbab ti Rimam byinn ba.

¹⁰Ayib-ba ā byi kyi. Aba ā sae tu-ba uwog be. Ukyàng-ba ā fur kyi tsikunn ike ru fife yi uwe!”

¹¹Ame u rang kyi ira iki cwucwo baa, ti aba ande ti Isirela jwunnsi pu ba ne, aba twenji a? Iyee. I si ikyaen itijwunnsi-ba yine ti ande ti si-ba Mbayawuda be tu fengo itinwangru. Rimam nde ayine ikyaen ti wu na nda Mbayawuda tsinn kitsinn risu-ba.

¹²Itijwunnsi Mbayawuda shir itinyang ba risu utense. Rikaen-ba ama kafe pu yi rifunn uwog ande ti si-ba Mbayawuda be. Ti ayi si ahan, uwe ike kiye ti Mbayawuda meme a nae pu ba risu riben te Rimam, ayi u shir kang itinyang ba ti skeb kyi yine cwucwo ti yang-yi akwen.

¹³Tine ame ku ri ira te ni ande ti si-ni Mbayawuda be. Rimam sa me tsi unde ti atom ti ku sa ira-wu tsag te ni. Ame ku pam ipam risu wande-m ayine

¹⁴ikyaen ti, iki be yi fengo wune ande-m u tsinn kitsinn risu-ni, ama ariki uwae-ba u nwangru uwae ikentitibi-ba.

¹⁵Ikyaen ti, pangma kiye ti Rimam pyir ba, ama ayi kafe fengo ti ande ti tsitsi meme kafe arwan-wu, ayi u si ahan ama, kiye ti awu a kyangte ba, ayi u kafe iken ti nyang ya tsitsa. Ayi u si pangma atikicwu na ru kinjag ba.

¹⁶Asiti unde a sa usen wuci na Rimam, ayi ku tatso baa, wuci ti tsitsi ama si ana Rimam. Asiti ipab kutuku a si ti saen kyag, ayi ku tatso baa, meme akyikya kutuku wu ama si ti saen kyag.

¹⁷Unde u ndeye ti wu pye pu akyikya kutuku zetunn ti a yiyen si riben, u sa akyikya na zetunn ti kutur ba yir iben atang. Ani ande ti ise si akyikya zetunn ti kutur wune. Tine ani ku tu kutunn-ni ijwe ipab zetunn wu pangma ti Mbayawuda tu kucang. Itinyang ipab wu si ana-ni ama.

¹⁸Amaa, ni ndub-ni ijwe risu akyikya ti a pyipye be. Ni tangsom baa, i si-yi ani ti ku nda ipab tsi ti ribom be, ipab ti ku nda ni tsi ti ribom.

¹⁹Iki be ani u ndub ijwe baa, a na mber ceb ajwo kutuku wu ru ikyaen ti a na sa ni yir iben atang.

²⁰Kubenti, a mber ceb pu yi ru, ikyaen ti a ru-ba kubenti be, ama ani tsi ti atang ikyaen ti ani ku ru kubenti uwog Rimam. Amaa, ni ndub-ni ijwe be! Ni som usom-ni uwae ikyenricwu Rimam.

²¹Ikyaen ti, awu sae ayibrisi ba-wu risu akyikya ti kucang be. Ani akyikya kutuku ti uwae kutur, asiti ani a ru-ni uwae kinjo be, awu u sae ayib ba-wu risu-ni be ama.

²²Ni tangsom baa, Rimam na site ayibrisi u fwan timambe ama. Uwog ande ti jwunnsi uwae ikentitibi awu fwan timambe, amaa, uwog-ni awu ku tso itinyang-wu. Amaa ni som usom-ni uwae itinyang-wu ru yi uwe, be awu u yer ra ni ama tika.

²³Mbayawuda ama, asiti aba a fxae bom risu-ba, awu u kyangte ba u sa ba bae fwa rimenn kutuku wu cwucwo. Ikyaen ti, Rimam site kuko ti wu sa ba kafe ba sang kyi.

²⁴Ani akyikya kutuku ti kutur ti a yer u sa yir iben ijwe kutuku ti a yiyen, asiti Rimam a ku nde itso iken yine ti ande ku nde-ba yi be, ayi u bir skeb uwog-wu ti awu u sa akyikya kutuku ti a yiyen bae fa ti atang ama.

²⁵Ameinja, ira ti kitam iki ta atang ti ame ku sha ti ni na nung nyinyang, ikyaen ti ni na ndub pang-ni ijwe uwae ben-ayib-ni be. Ripye ande ti Isirela kwen kyi utob-ba, amaa, ayine u ka-yi uwe be, se kiye ti ujwunn ande ti Rimam ku sha uwae ande ti si-ba Mbayawuda be a sang ba pu ba.

²⁶Ayine si fengo ti ande ti Isirela meme u nwangru, pangma ti a bae uwae Kutsingken Rimam baa, “Unde ti u nwangru ande u ru Siyon ba. Awu u rwae ruye ikentitibi uwae rishi Yakubu.

²⁷Ayine u kumunn unju ti yer-m te ba baa, ame na u yata na ba ikentitibi-ba.”

²⁸Tine Mbayawuda kafe ande ti rika na Rimam ikyaen na ni ande ti tsitsi, kiye ti aba pyir ira tinyang-wu. Amaa aba si ande ti ure Rimam ikyaen na abitse-ba ti kute, ikyaen ti Rimam tsab ba tsi ti kucang baa, aba na u si ande ti ana-wu.

²⁹Ikyaen ti, asiti Rimam a kunn ande ira u nda ba rinda, awu ku kafe-wu utob atang be.

³⁰Ani ande ti si-ni Mbayawuda be, ani bom risu te Rimam ti kucang, amaa, tine Rimam sae ni te ayibrisi ikyaen bom risu na Mbayawuda.

³¹Ti mbwe-yi ama, tine Mbayawuda ku bom risu te Rimam ikyaen ti, awu ku nung ni te ayibrisi, amaa, ayi u shir ayibrisi Rimam ba risu-ba ama uwe ike.

³²Ayine tatso baa, Rimam na kwer ande meme kupong, ikyaen bom risu-ba. Awu nde ahan ikyaen ti awu na tso ayibrisi-wu ka risu ande meme ama tine.

³³Kubenti, rifunn Rimam ko skeb tag iken meme! Ben-ayib-wu ti itsab-wu jang nyang-yi nyang be. Aye ti u kab ye ira ti awu myae tsi? Aye ti u nungye fengo ti awu ku nde wande-wu?

³⁴Pangma ti a bae uwae Kutsingken baa, “Aye ti nung riyaen utob Itsekuru? Unde iki ko ti wu si unde ti ku myae kumyae te Rimam a.

³⁵Unde ta atang ti Rimam ci ripab uwog-wu a?”

³⁶Rimam kyae iken ti ta uwae utense meme. Awu ti ku nde fengo nee iken meme ku kyang ikyin. A sa meme-yi tsi ikyaen na wu. Itinyang ā si ana-wu tsikunn ike ru fife yi uwe. Ayi ā si ahan.