Read kutep Roma 12 Bible Online

Roma 12 - kutep bible

Roma 12

¹Ameinja, ti Rimam tatso pu wu ati ayibrisi-wu ti kuko ne ahan, ame ku jwam ni baa, ti ti ani tsi user, ni sa risu-ni na Rimam pangma rinyangwae ti a sa yer na Rimam. Ni fen wu ti usom ti som ti sisaen ti ni nde iken ti ku nyang uwae-wu. Ayine si fengo ti kubenti ti ani u fen Rimam.

²Ni putsa-ni afxen na ande ti utense ne be, amaa ni ya ta ti Rimam ā sa ni kafe ande tishe yi fengo na utob-ni ti awu kyaenyang u sa kafe tishe. Yi fengo yine, ani u ba nungye iken ti Rimam ku sha, u nung iken ti si tinyang, ti iken ti ku nyang uwae-wu, ti iken ti pang atang.

³Ikyaen kuko ti Rimam nda m, ame ku ri te unde titini uwae-ni baa, awu na ā ndub-wu ijwe be. Ni myae ijwe-ni uwae ira ti kab. Unde titini uwae-ni ā myae risu-wu pang ti kuko na uwae kinjo ti Rimam nda wu.

⁴Akyab ijwe munnae rimenn-ti ande, utitini uwae-yi site wande-wu ti awu ku nde.

⁵Ayi si ahan ma, ko ti ati ande ti ren risu te Kristi jwunn timambe, ati si iken kinjo, ama ati ren atso pangma akyab ijwe ti ren atso.

⁶Rimam nda ti ati ku nde tu wande ti tsotso pang ti rinyangwae ti awu nda unde titini uwae-ti. Unde titini uwae-ti ā nde wande ti pang atang te yi. Asiti unde a tu rinyangwae na ira Rimam ti ri te ande, awu ā ri ira yi pang ti uwae kinjo ti awu site yi.

⁷Rimam a nda unde ti wu na si umbae afxen ande iki awu ā ndeya ba. Asiti awu a tu rinyangwae na iken ti kwen, awu ā kwen na ande.

⁸Asiti Rimam a nda wu ti wu na ri bom ande utob, awu ā nde wande ti rinda Rimam wune u ri bom ande utob. Asiti awu a tu rinda na rifunn-wu ti ti ka na ande, awu ā nde yi ti utob ti tsen. Asiti Rimam a nda wu ti wu na si unde ti uwe, awu a nde wande-wu ti ribom-wu meme. Ande ti ku ndeya ande ti ta uwae rikaen, ā nde yi ti utob ti tsen.

⁹Ni kwab ti ni ye ure tetso ti ure ti kubenti, si-yi ti unju amam be. Ni kafe isim ta ikentitibi ti ni ti ye su ira ti tinyang te ajwo ifaen.

¹⁰Ni ye ure tetso te utob kinjo pangma ti ameinja ku nde. Ni kwab ti ni nda atso rurob skeb ti risu-ni.

¹¹Ni nde wande ti ribom-ni, ni nde-ni uyáng be. Ni sa utob-ni ti ijwe-ni meme na wande na Rimam.

¹²Ni yata ti uwae ti tsi-ni ā nda ni tsen utob. Ni ye utob uwae rikaen ti ani ku ngwa, ti ni jwam Rimam ko kiye titini.

¹³Ni ndeya ameinja-ni ande Rimam ti shanum te iken, ti ni kyangte ande ti rikyen yi uwae anunn-ni.

¹⁴Ni jwam itinyang na Rimam risu ande ti ku nde ni rikaen. Een, ni wae na ba ira, si-yi ti ni rimbeb ba be.

¹⁵Ni tsen utob te ande ti ku tsen utob, ama jwub ira te ande ti ku jwub ira.

¹⁶Ni som usom-ni uwae kujimshwur tetso. Ni ndub-ni ijwe be, amaa ni ye arwan te ande ti si-ba iken iki be. Ni sa-ni risu-ni tsi baa, ani na si ande ti nung iken be.

¹⁷Asiti unde iki a nde ni ira titibi, ni nde-ni awu ira titibi ama be. Ni kwab ti ni nde iken ti ande meme u cwe baa, ayi na si iken ti tinyang.

¹⁸Ni kwab ti ribom-ni meme ti ni som uwae kujimshwur te ande meme.

¹⁹Arwan-m ti ayib ricwu-m, asiti unde iki a raen ni ira, ni pae na-ni awu ripab ikentitibi be. Ni ya iken meme ta ti Rimam ā pae ripab-yi uwae rikwen-wu. Ikyaen ti, a bae uwae Kutsingken Rimam baa, “Ame ti u byib aku ikyaen-fu, Rimam ti ri. Ame ti u pae ripab ikentitibi ti a nde fu.”

²⁰Ni nde pangma ti a bae uwae Kutsingken Rimam baa, “Asiti unde ti rika-fu a ku fxen ti rimenn, sha na wu wuci. Asiti awu a ku fxen ti unwaen, txi na wu ambyi ti wu ngwa. Ikyaen ti, afu a nde ayine afu ku wen akyáen urwa ti ku cwucwé si wu risu.[10]”

²¹Ni cwe-ni ti iken titibi ā ci rika risu-ni be, amaa, ni ci rika risu iken titibi yi fengo na iken ti tinyang ti ti nde.