Read kutep Roma 14 Bible Online

Roma 14 - kutep bible

Roma 14

¹Unde ti a bom-wu uwae Ira Yesu be, ni kyangte wu ti ajwo ifaen, ama ni shaen-ni ishaen te wu risu fengo ti awu ku nde iken-wu be.

²Ande iki ku ci itso wuci titini ti a pu na ba meme, a ku kab-ba ira iki atang be, amaa, ande iki ti bom-wu uwae Ira Rimam be, si nyáng atsing utong ti awaen iken amam ti a ku ci.

³Unde ti ku ci itso wuci meme ā saeru-wu unde ti ku ci nyáng afub amam be. Unde ti ku ci nyáng atsing iken ti awaen iken amam ama ā saeru-wu unde ti ku kub ibye be, ikyaen ti, Rimam cwe pu wu ira unde wu.

⁴Afu si aye ti u ye upyi unde iki ti riraen? Se unde ti kununn-wu amam ti site rurob ti wu myae wande upyi-wu baa, awu na nde wande-wu pang atang ree, re ti awu nde pang-wu atang be. Ande bane ama u jwunnsi-ba uwae itimyae be, ikyaen ti Itsekuru-ba Rimam site kuko ti wu sa ba tsi ting ting.

⁵Ande iki ku sa usir iki tsi baa, awu na skeb pu wu usir ti tsitsi, amaa, ariki ku kab ana-ba baa, meme usir na pang atso. Unde titini ā kab ira-wu risu ira yine u tsi ting ting uwae ira ti awu myae baa, ayi na pang atang.

⁶Unde ti ku sa usir iki tsi baa, awu na si usir tiyang, ku nde yi ikyaen ti, awu ku sha ti wu sa kuko na Rimam. Unde ti ku ci itso wuci meme ama ku nde yi ikyaen ti wu sa kuko na Rimam, nee iken ti nde awu ku nde fxaefa na Rimam ikyaen wuci yi. Unde ti ku tsab wuci tsab titawe ku nde ayine ikyaen ti wu na sa kuko na Rimam ama, ikyaen ti, awu ama ku nde fxaefa na Rimam.

⁷Ayi si-yi ikyaen risu-ti amam ti ati ande ku som ti unyang be. Ayi si-yi ikyaen risu-ti amam ti ati ku cwucwu be ama.

⁸Asiti ati a som ti unyang, ayi si ikyaen Itsekuru-ti. Asiti ati a cwucwu ama, ayi si ikyaen-wu. Ikyaen yine ko ati a som ti unyang ko ati a cwucwu, ati si ana Rimam.

⁹Iken ti nde nee Yesu Kristi cwu ricwu u ba nwunn ti unyang, si ikyaen ti, awu ā si Itsekuru na ande ti tsi ti unyang, ti ande ti cwucwu meme.

¹⁰Ikyaen yine, imi ti nde nee afu unde ku jwin ti fu ye inja-fu ti riraen? Afu ama, imi ti nde ne afu ku txi inja-fu iki txi? Ni tangsom baa, meme-ti u ka som ushi rikwen Rimam usir ti ricwunnkyi.

¹¹Pangma ti a bae uwae Kutsingken ti kucang baa, “Rimam ku ri baa, Kubenti, ande meme u ba ku riben uwe-m. Unde titini u ri tso ti unju-wu baa, ame na si Rimam.”

¹²Ayine ku tatso baa, unde titini uwae-ti u ka tsi kang uwe Rimam u ri tso ti unju-wu iken ti awu nde.

¹³Ikyaen yine, ti ya rikwen ti ati ku pwen atso ta. Iken ti ati u nde, si ti ati u sa utob-ti tsi baa, ati na u nde-ti iken iki ti u nda inja-ti iki kyen kufxen fengo Rimam, ko ti awu u sang uwae ikentitibi be.

¹⁴Ikyaen usom ti som-m te Itsekuru-m Yesu Kristi, ame nungye pu m uwae utob-m baa, wuci iki na si-yi iken ti ku cwucwe be, amaa asiti unde a tang uwae utob-wu baa, iken yi na si iken ti ku cwucwe, ayi kafe pu yi iken ti cwucwe uwog-wu.

¹⁵Asiti afu a ku ci wuci ti u ndembeb inja-fu utob, ayi ku tso baa, ure na ta-yi kutampwa-ni cwucwo be. Iken ti ci-fu ā kafe-yi iken ti u twenji unde ti Kristi cwu ricwu risu-wu be.

¹⁶Asiti afu a ku kab baa, iken ti afu ku nde na pang atang, amaa, asiti ayi a nda ande rimbeb yi, nde-fu ayi be.

¹⁷Ikyaen ti, kujwokwe Rimam si-yi ira na iken ti ci ti iken ti ngwa be. Kujwokwe Rimam si ira risu usom ti kpang atang, ti utob ti nae riben, ti utob ti tsen uwog Kusung Rimam.

¹⁸Unde ti a putsa iken yine u ku nde na Kristi wande ti utob kinjo, Rimam u tsen utob te wu. Ande ama u cwe ira wu.

¹⁹Ikyaen na yine, ti sa utob-ti tsi risu iken ti ku shir kujimshwur ba, ti iken ti u nda ande meme uwae-ti siser fengo Yesu.

²⁰Ira wuci ā twenji-yi wande ti Rimam ku nde uwae-ni be. Itso wuci meme nyang ti ci, amaa ayi nyang-yi ti ni ci iken iki ti u shir inja-ni iki si uwae ikentitibi be.

²¹Asiti afu a nung baa, inja-fu iki na u jwunnsi u nde ikentitibi ikyaen ibye ti afu ku kub, ko ujwab ti afu ku ngwa, ko iken iki ti afu ku nde, ayi nyang skeb ti fu nwaen ru risu-fu uwae iken yi.

²²Ira ti afu ku kab risu iken yine si ira-fu te Rimam. Unde ti utob-wu a cwe te-wu baa, iken ti awu nde na si iken ti kpang atang, ana-wu nyang!

²³Amaa, unde ti a ku kab ira risu wuci iki, u kafe ka ci kyi wuci yi, awu nde pu wu ikentitibi uwog Rimam ikyaen ti, iken ti awu ci ne, awu ci-wu ayi ti uwae kinjo be. Meme iken ti ati ku nde, asiti ati a ku nde-ti ayi ti uwae kinjo be, ayi si ikentitibi.