Read kutep Roma 15 Bible Online

Roma 15 - kutep bible

Roma 15

¹Ati ande ti kwèn ben pu ti uwae uwae kinjo-ti ne, ati ā ndeya ande ti uwae kinjo-ba kpag-yi be, ti ti ye utob te ba. Ti ndeya-ti nyáng ijwe-ti amam be.

²Amaa, unde titini uwae-ti ā kwab ti wu nde iken ti u nyang uwae inja-wu ti iken ti u ndeya wu, ikyaen ti awu ā shir inja-wu nwunn ritsen.

³Yesu Kristi ndeya-wu risu-wu amam be. A bae ira risu-wu uwae Kutsingken Rimam kucang baa, “Aba txun fu asu, ama asu-ba ayi si risu-m.”[11]

⁴Meme ira ti a bae uwae Kutsingken Rimam ti kute, a bae yi ikyaen ti yi kwen na ti iken. A ku sha ti ti na tu utob ti ye ti ribom utob atang. Iken yine ama u nda ti, ati u sa uwae tsi risu iken ti ku ba uwe.

⁵Ame ku jwam Rimam, awu ti ku nda ti utob ti ye u ku ri bom-ti ijwe, ame ku jwam wu baa, awu na nda ni ti ni na cwe ira atso uwae fengo Yesu Kristi ti ani ku putsa,

⁶ikyaen ti meme-ni ti unju kinjo ā teb rinyi Rimam, awu ti si Itse na Itsekuru-ti Yesu Kristi.

⁷Ikyaen na yine, ni paembe atso pangma ti Kristi paembe ni, ikyaen ti ni sa kuko na Rimam.

⁸Ame ku ri te ni baa, Yesu Kristi kafe upyi na Mbayawuda ikyaen ti wu tatso ba baa, Rimam na si Rimam ti kubenti ti ku kumunn unju ti yer ti awu yer te abitse-ti ti kucang.

⁹Cwucwo Yesu ru ba ikyaen ti wu na nda ande ti si-ba Mbayawuda be fengo ti a u nde fxaefa na Rimam ama, ikyaen ayibrisi-wu uwog-ba. Pangma ti a bae uwae Kutsingken Rimam baa, “Ame u nda fu kuko kutampwa ande ti si-ba Mbayawuda be, ame u yang akyang u teb rinyi-fu.”

¹⁰Uwog iki cwucwo a bae baa, “Ani ande ti ise, ni shwu ushwu te ande ti Rimam.”

¹¹Uwog iki cwucwo a bae, “Ni teb rinyi Itsekuru-ti Rimam, meme-ni ande ti ise. Ani ande ti utense meme, ni yang akyang na wu.”

¹²Ishaya ri ti kucang baa, “Unde ti rishi na Jese u ru ba, awu u nwunn u nae ukwe risu ande ti utense. Aba u sa uwae tsi uwog-wu.”

¹³Ame ku jwam Rimam, awu ti nda ti uwae ti tsi, baa, awu na u munn ni munn te utob ti tsen ti kujimshwur ikyaen uwae kinjo ti ani ru uwog-wu, ikyaen ti kuko na Kusung-wu ā nda ijwe-ni konje uwog-wu ko fufa ru yi uwe.

¹⁴Ameinja, ame ku kab-m uwae risu-ni be. Ame nung pu m baa, utob-ni munn pu yi ti itinyang, u site ben-ayib u ku nde tu ti ni myae ya atso ira.

¹⁵Amaa, ira iki ti ame bae na ni uwae kutsingken wune, ame bae yi ti ribom-m na ni ikyaen ti m na u tangsom ni. Ayi si ikyaen wande na atom ti Rimam nda m,

¹⁶nee ame si upyi Yesu Kristi ti ku sa ira tinyang na Rimam ri te ande ti si-ba Mbayawuda be. Ame si kukwen ti ku yer wen iken na Rimam. Wande-m si ti m pu ande ti ise na Rimam ti wu u tsen utob atang. Awu u kyangte ba ikyaen ti Kusung ti saen kyag u kyae nyang utob-ba.

¹⁷Ayi si ikyaen usom ti som-m te Yesu Kristi ti ame ku teb ijwe-m uwae wande Rimam ti ame ku nde ne.

¹⁸Ame u ri-m ira iki be, se ira risu iken ti Kristi nde uwog ande ti ise nee awu shir ba ba fengo-wu yi ajwo wande-m ti ira unju-m.

¹⁹Awu nde yine yi fengo na iken ti fur ayib ti iken ti ku tso kuko Rimam, ti fengo kuko na Kusung Rimam. Uwae ikyin ti kyang-m, sa ti uten Urushelima ru ka sang ti uten ti Ilirikum, ame nde tag pu m wande-m na ira tinyang risu Kristi ti ri te ande.

²⁰Iken kinjo ti ame sa tsi uwe-m ko kiye titini si ti m na u sa ira Kristi ka ri uwog ti a fxen ji-ba ira-wu atang khika be. Ame ku sha-m ti m na u mbye ku tsa umbyi kusog ti unde iki ta be.

²¹Pangma ti a bae uwae Kutsingken Rimam baa, “Ande ti fxen ji-ba ira risu-wu usir iki be a u nung wu ayib-ba, ande ti fxen ji-ba rinyi-wu be u kab ye ira.”

²²Wande-m ne ti si iken ti byang kyi m ti m ba-m uwog-ni be uwae kiye yang-yi.

²³Amaa, tine ti ame mam tag pu m wande-m ike, ama ti ame ku sha uwae asang yang akwen ti wur ru ru ne ti m ba uwog-ni,

²⁴ame sa tsi ti m ru tsa uwog-ni uwae ikyin ti kyang-m ti ame u kyang ru yi uten Sipaniya. Ame u som u pa jaeb te ni uwae kiye kpang titawe ani u ndeya m ti m ru fe.

²⁵Amaa, tine, ame u ka Urushelima ti m ka ndeya ande Rimam ti ta atang.

²⁶Ikyaen ti, ande Rimam ti uten Makedoniya te Akaya nung baa, ayi na nyang uwae-ba ti a na kwer iken ikyaen ti a na ndeya ande na Yesu ti ku ngwa rikaen uwae uka ti Urushelima.

²⁷Ayi si ira ti aba kab rishwu-ba, amaa uwae kubenti i si kang wande-ba ti a ndeya ande ti rikaen ba, ikyaen ti, aba Mbayawuda ndeya pu ba ande ti si-ba Mbayawuda be uwae ira Rimam, ama ayi nyang ti aba ande ti si-ba Mbayawuda be, u ndeya Mbayawuda uwae iken ti si ana rimenn ijwe.

²⁸Kiye ti m a mam pu m wande yine u pu meme aser ti ande kwer ikyaen-ba na pu m aba, ame u ba ru tsa uwog-ni ru yi uten Sipaniya.

²⁹Ame nung pu m baa, kiye ti me a ba, ame na u ba te itinyang na Kristi ken titag ikyaen-ni.

³⁰Ameinja, ikyaen ira Itsekuru-ti Yesu Kristi, fa ti ure ti Kusung Rimam ku nda ti, ame ku mbyae ajwo te ni baa, ani na jwam Rimam risu-m,

³¹ikyaen ti Rimam ā nwangru me kujwo ande ti ta uten Yawudiya ti cwe-ba ira Rimam be. Cwucwo, ni jwam Rimam ikyaen ti ande ti ru uwae kinjo ti ta Urushelima ā cwe u kyangte itindeya ti m sa ba ku na ba.

³²Isim ayine asiti Rimam a cwe ira, ame ku kab baa, ame na u ba uwog-ni ti utob ti tsen ti m ba pu nyang kpang u tu ribom utob uwae usom ti som-ti tetso.

³³Tine, Rimam, awu ti ku nda ti kujimshwur, ā te ni som tetso. Ayi ā si ahan.