Read kutep Roma 2 Bible Online

Roma 2 - kutep bible

Roma 2

¹Ikyaen ayine, ani ti ku pwen ande rikwen risu ikentitibi-ba, ani site-ni fífe iki be, ko ani a si aye, ikyaen ti, asiti ani a pwen ande rikwen, u ka nde itso iken-yi ti aba ku nde, ani pwen rikwen ye pu ni ijwe-ni.

²Ati nung pu ti baa, kiye ti Rimam ku pwen rikwen risu ande ti ku nde itso iken yine, awu ku nde iken ti kpang atang.

³Ama afu unde ti ku pwen ariki rikwen risu ikentitibi yine, u ku nde itso iken-yi ti aba ku nde ama, afu tang baa, afu ti risu-fu na u nwangru uwae rikwen Rimam a.

⁴Ko afu ku sa rinyangwae te utob ti ye na Rimam ti ko timambe kafe iken ti fufóg ti ani saeruru, u nung-ni ti rinyangwae Rimam si ikyaen ti awu u tae ni ba ti ni na kafe isim ta ikentitibi-ni be ahoo.

⁵Amaa, afu kwen utob u tsikunn uwae ikentitibi-fu. Ikyaen yine afu nda rinae Rimam ko ku fufa risu-fu. Uwae usir ti Rimam u ba pwen ande rikwen, rikaen-fu u pang atang!

⁶Ikyaen ti, Rimam u nda unde titini kujwojang-wu pang ti wande ti awu nde.

⁷Ariki ye utob, u tsikunn ti ku nde kujwo wande ti tinyang, u ku sha ti Rimam na nda ba kuko ti rurob ti unyang ti tsi kukunn. Rimam u nda ba unyang ti tsi kukunn.

⁸Amaa, ana ariki ti ku sha nyáng risu-ba amam, u ku pyir ira ti kubenti, ku putsa itikong, rinae Rimam ti ku titwen fumfufum, u si risu-ba.

⁹Rikaen ti beb timambe tsi ku ji meme ande ti ku nde ikentitibi, Mbayawuda ti ande ti si-ba Mbayawuda be meme.

¹⁰Amaa ande ti ku nde iken ti tinyang, Rimam u nda ba kuko ti riyinn ti kujimshwur. Awu u nda Mbayawuda titawe, u nda itaen ti tsitsi isim.

¹¹Rimam ku kág wu ande be.

¹²Patag ande ti raen ira kiye ti a si-ba te icwe Rimam be, a u twenji, ko ti aba site-ba icwe Rimam be. Meme ande ti si te icwe, u nyatsa icwe yi, Rimam u pwen ba rikwen yi fengo icwe yi.

¹³Ayi si-yi ande ti fxen icwe amam ti tsi sisaen uwe Rimam be. Unde ti a ye su icwe yi, awu ti u nwangru.

¹⁴Ande ti si-ba Mbayawuda be ama nung-ba icwe Rimam be, asiti aba a nde iken ti Rimam ri uwae icwe ikyaen ti ayi si iken ti pang atang utob-ba, ayi tatso baa, aba ti risu-ba nung iken ti pang atang uwe Rimam. Aba ye su pu ba icwe ko ti aba nung-ba yi be.

¹⁵Usom ti som-ba ku tso baa, icwe Rimam na ta pu-yi riyaen utob-ba. Ira ti kab-ba ama ku tso baa, ayine na si kubenti, ikyaen ti, kiye ti a raen ira, a nungye riraen-ba uwae utob-ba. Kiye ti a nde iken ti tinyang, utob-ba ku cwe ira yi.

¹⁶Usir ti Rimam u pwen ande rikwen, yi uwog Yesu Kristi, u myae ira ti kitam ti ta utob-ba, ayi u si sí ahan, rukwer ti ira tinyang ti ame ku ri te ande.

¹⁷Afu ti ku kunn ijwe-fu baa, urae Yawuda, afu sa ijwe-fu konje icwe Rimam, u ku ndub ijwe yi rinyi Rimam.

¹⁸Afu nung pu fu iken ti Rimam ku sha, u nung pu fu ti fu tsab fengo ti tinyang, ikyaen ti, a kwen na fu icwe Rimam yi.

¹⁹Afu nung ben ben baa, afu na ku tae ande ti mbub ayib fengo, u si ayib uwog ande ti ta uwae kufub.

²⁰Afu si unde ti ku kwen ande ti kuskwab iken, u si unde ti ku kwen na anyisu tinying iken. Afu sa risu-fu tsi baa, afu na nung tag pu fu icwe Rimam, ti ira ti kubenti,

²¹Afu ti ku kwen na ariki, afu ku kwen na-fu risu-fu be a. Afu ku fwa ande kusen risu riyib ti yib, afu ku yib riyib a.

²²Afu ti ku fwa ande kusen baa, “Ni nae-ni amae be.” Afu ku nae amae a. Afu sa ira apxin tsi baa, iken ti ku txi iyib, afu ku yib iken uwae afug apxin a.

²³Afu ti ku ndub ijwe risu icwe Rimam, afu ku ye si Rimam kiye ti afu nyaetsa icwe-wu.

²⁴Ayine si sí ira ti a bae uwae Kutsingken Rimam baa, “Ande ti kufub ku txumbeb rinyi Rimam ikyaen-ni.”

²⁵Ititsen kutxin si iken ti tinyang, asiti ani a putsa Icwe Rimam. Amaa, asiti ani a nyatsa icwe, kutxin ti tsen-ni si ukaen.

²⁶Ama asiti ande ti kufub, ti ku tsen-ba kutxin be a ye su icwe, Rimam u sa ande ba tsi pangma ande ti ku tsen kutxin, be a.

²⁷Ti ayi si ahan ama unde ti tsen-wu kutxin na ijwe be, ama u ye su icwe, u nwunn usir rikwen u rimbeb ni, ani ande ti site Icwe Rimam uwae kutsingken, u site ira kutxin titsen, ama u mbub mbeb icwe Rimam riraen.

²⁸Ayi si-yi ititsen kutxin ko iken iki na rimenn ijwe ahan ti ku nda unde tsi baa awu na si urae Yawuda be. Ititsen kutxin si-yi ira na rimenn ijwe amam be.

²⁹Urae Yawuda ti kubenti si unde ti si urae Yawuda uwae riyaen utob-wu. Awu ā si unde ti ā tsen na wu kutxin riyaen utob-wu tawe. Wande yine, Kusung Rimam ti ku nde yi, si-yi ira icwe iki ti a bae uwae kutsingken be. Cwucwo, ayi si Rimam ti u teb itso unde wune, si-yi ande be.