Read kutep Roma 3 Bible Online

Roma 3 - kutep bible

Roma 3

¹Rinyang-yi ti unde u si urae Yawuda si imi? Itinyang kutxin titsen si imi?

²Itinyang ta atang ko timambe. Ti kucangtsi, Rimam sa ira-wu na Mbayawuda kujwo.

³Asiti ariki a ye su-ba ira yi nyinyang be ama re? Ti aba ye su-ba kubenti be ne, ayi u fxae mbeb kubenti Rimam a.

⁴Iyee. Ko asiti ande meme a si ande ti tikong, Rimam tsi yiyer Rimam ti kubenti. Pangma ti a bae uwae Kutsingken baa, “Kiye ti afu a ri ira, ande u nung kang baa, afu na si Rimam ti ku ri kubenti. Kiye ti a myae ira-fu, afu u ci rikwén.[2]”

⁵Á baa, ikentitibi ti ati ku nde na nda ande nung itisaen kyag na Rimam, ayi ú tatso baa imi? Ko Rimam ku raen ira kiye ti awu ku tso rinae risu ikentitibi-ti ahoo? Unde ti ukaen u ri ahan.

⁶Iyee, ayi si-yi ahan be. A baa, Rimam na si-wu Rimam ti kubenti be, awu ú kyang rimang u pwen utense rikwen?

⁷Amaa, asiti ame a sa kuko na Rimam yi fengo na ira tikong ti ame nde, Rimam kyang rimang ku pwen kyi m rikwen risu ikentitibi-m?

⁸Ama imi ti byangkyi ti unde u nde ikentitibi, asiti ayi a u sa ba ira ti tinyang? Ariki ku rimbeb-ti baa, ayine na si iken ti ame ku ri te ande. Rikwen iticwu ti a ku pwen ba, pang atang!

⁹Ira yi tsi-yi aka tiri? Ati Mbayawuda skeb ande ti si-ba Mbayawuda be te iken iki a. Iyee, ko ti kpang. Ikyaen ti, ame tatso pu m ani baa, meme Mbayawuda te ande ti si-ba Mbayawuda be na si apyi ikentitibi.

¹⁰Pangma ti a bae uwae Kutsingken Rimam baa, “Unde iki ta-wu ti som usom ti kpang atang be ko ti kinjo.

¹¹Unde iki ta-wu ti ku kab ye ira be. Unde ta-wu ti ku sha fengo Rimam be.

¹²Meme ande kafe isim ta pu ba Rimam. Patag-ba fa-ba ukwab be, u kafe ande ti ukaen. Unde iki ti ku nde iken ti tinyang ta-wu be ko ti kinjo rikaen.

¹³Unju-ba si kuskab ti tsi rubwen. A ku kyaefa ande te ira tikong ti munn unju-ba. Ira ti ku tso unju-ba si rikàen ukob.

¹⁴Unju-ba munn te ira titibi ti ti ri, ti ku ndembeb ande.

¹⁵Afxen-ba bir timambe ti ku tub anying ande yaen mbub,

¹⁶Ayae te ititwenji ku putswa rifab-ba.

¹⁷A nung-ba fengo kujimshwur be.

¹⁸A nung-ba ikyenricwu Rimam be.”

¹⁹Tine, ati nung pu ti baa, meme ira ti a bae uwae Icwe Rimam, a bae yi ikyaen ande ti Icwe yi ta risu-ba. Ayine si ikyaen ti a u byangkyi fífe meme ande. Ayine ku tso baa, meme ande utense na si anyisu riraen, rikwen Rimam ama ta risu ko aye.

²⁰Ikyaen ayine, unde u tu-wu risu tinyang uwe Rimam ikyaen icwe ti putsa be. Iken ti icwe ku nde si ti ayi ku tatso unde ikentitibi-wu.

²¹Amaa, tine, Rimam tatso pu wu ati fengo iki tishe ti ande u som usom ti kpang atang uwe-wu. Ayi txi ra te fengo na icwe ti putsa, ko ti icwe yi, te ira atom ti ya iskin ira Rimam kute cwé te yi.

²²Tine, ati u tu usom ti kpang atang uwe Rimam yi fengo na uwae kinjo uwog Yesu Kristi. Fengo yi si kinjo ikyaen meme ande ti ru kubenti. Rimam kata-wu ande ta be.

²³Ikyaen ti, meme ande raen ira, u jwunnsi pu ba, u ko si pu ba uwae riyinn ti Rimam sa na ba.[3]

²⁴Amaa, ande tu risu tinyang uwe Rimam uwae ayibrisi-wu, ti si rinyangwae, ikyaen wande itinwangru ti Kristi nde.

²⁵Rimam sa Yesu Kristi tsi baa, yi fengo anying-wu, unde ti a paembe Yesu ti uwae kinjo, awu u tu itiyata ikentitibi-wu. Ayine ku tatso kubenti na Rimam, ikyaen ti, uwae kiye ti wur ru ru, Rimam ye utob te ande, u sae ru ikentitibi-ba.

²⁶Ayine si ikyaen ti wu tatso ande uwae kiye wune baa, awu na si Rimam ti kubenti, ikyaen ti, awu tsi ti kubenti, u si Rimam ti u nwangru unde titini ti a ru uwae kinjo uwog Yesu Kristi.

²⁷Ikyaen ayine, imi ti ati u ndub ijwe risu-yi? Ko iken iki be! Imi ti nde ati site-ti iken ti ti ndub ijwe risu-yi be? Ikyaen icwe ti putsa a. Iyee, ikyaen uwae kinjo.[4]

²⁸Ikyaen ti, ati myae tsi baa unde na u tu risu tinyang uwe Rimam, si-yi ikyaen Icwe ti putsa be, amaa, ikyaen uwae kinjo.

²⁹Rimam si Rimam na Mbayawuda amam a. Awu si-wu Rimam na ande meme be a? Een, awu si Rimam ande ti nung-ba Rimam be ama.

³⁰Kubenti, Rimam si kinjo. Awu u kyangte ande ti tsen kutxin ikyaen uwae kinjo-ba, u kyangte ande ti tsen-ba kutxin be ikyaen uwae kinjo-ba.

³¹Ama ati u yerwen-ti icwe ikyaen uwae kinjo a. Iyee! Ko ti kpang, ati ye su icwe ting ting ting, ti atang.