Read kutep Roma 5 Bible Online

Roma 5 - kutep bible

Roma 5

¹Ikyaen yine, ti Rimam kyaenyang pu wu utob-ti yi fengo uwae kinjo-ti, ati site kujimshwur te Rimam rutsa uwog Itsekuru-ti Yesu Kristi.

²Awu ti nde fengo, nee ati sang ka tu rinyangwae Rimam, yi fengo uwae kinjo-ti. Ati ku kam ashwu ku pam ipam ikyaen riyinn Rimam ti tsi ku ji ti uwe.

³Ti siskeb meme, ati ku kam ashwu uwae rikaen-ti, u nungye baa, rikaen na ku nda ti utob ti ye.

⁴Utob ti ye wune ku nda ti tu utob ti kpang atang uwe Rimam. Ti ati site utob ti kpang atang uwe Rimam ama, ayine ku nda ti sa uwae tsi uwog Rimam.

⁵Uwaetsi wune u nda-wu ati wae rukwae be, ikyaen ti, Rimam yaen ure-wu si munn uwae utob-ti, uwae wande Kusung ti saen kyag ti awu nda ti.

⁶Ti ti ati namtur ti atang, Kristi ru ba cwu ricwu ikyaen-ti, ati ande ti ku nde ikentitibi, uwae kiye ti kpang atang.

⁷Ayi caeb timambe ti unde u cwe, u cwu ricwu kutunn unju unde ti ku nde iken ti kpang atang. Ko iki be unde iki u cwe iticwu kutunn unju unde ti ku nde iken ti tinyang.

⁸Amaa, Rimam tatso ure-wu ba uwog-ti, ikyaen ti, ti ti ati ta uwae ikentitibi ti ti nde, Kristi cwu ricwu ikyaen-ti.

⁹Ama tine ti ati tu pu ti risu tinyang uwe Rimam ikyaen anying-wu, ti mbwe-yi ama, awu u nwangru kang ti uwae rinae Rimam ti ku ba.

¹⁰Ati si ande rika Rimam, amaa, a pu ti kafe ba ren ure ti Rimam uwae iticwu na Umbae-wu, m baa tine ti ati ren pu ti ure te wu, ati u nwangru kang yi fengo na unyang na Umbae-wu.

¹¹Ayi si-yi nyáng ayine amam be, Rimam nda ti ku kam ashwu tine ikyaen ti, uwae wande na Itsekuru-ti Yesu Kristi ati ren ure te Rimam.

¹²Ikyaen ayine, ikentitibi sang ba uwae utense yi riraen unde kinjo, ama iticwu putsa afxen ikentitibi wune ba. Isim ayine, iticwu shag kyi fe risu ande ti utense meme ikyaen ti, patag ande nde ikentitibi.

¹³Kubenti, ikentitibi ta uwae utense ti uwe-yi, titawe ti a nda icwe, amaa, uwog ti icwe a ta-yi atang be, a ku pwen-ba ikentitibi be.

¹⁴Amaa, iticwu ta risu ande, sa ti kiye Adamu ba kiye Musa, fa ti aba ti riraen-ba si-yi pangma itinyatsa icwe ti Adamu nyatsa be. Ayine tatso baa, aba ama na nde ikentitibi, ko ti ikentitibi-ba txi ra ti ana Adamu. Adamu ama si pangma kubyung unde wu ti ku ba uwe, ti si Unde ti Rimam Tsab Tsi.

¹⁵Amaa, rinda Rimam ti ati tu uwog Kristi txi ra ti ikentibi ti Adamu nde. Ande yang-ba cwu ricwu ikyaen ikentitibi unde kinjo. Ayibrisi Rimam ti rinda-wu nyang siskeb, rinyangwae ti wu nda ti yi uwae wande Yesu Kristi shag kyife risu ande yang-ba akwen.

¹⁶Wande na rinyangwae Rimam txi te wande na kujwojang ti putswa ikentitibi Adamu. Ikyaen ti, ikentitibi Adamu kinjo rikaen wune shir rikwen iticwu ba risu-ti. Amaa, isim ti ande yang-ba nde ikentitibi, rinyangwae Rimam ama ru ba, ti nda ba tu risu tinyang uwe-wu.

¹⁷Ikentitibi unde kinjo wune nda iticwu ta risu ande meme ikyaen riraen unde wu, ayi u nyang siskeb uwog itaen ti tu ayibrisi na Rimam, u nung rinyangwae-wu, u paembe rinda-wu, ti si usom ti kpang atang uwe-wu. Aba u nae ukwe uwae kiye ti aba som ti unyang utense wune, ikyaen itinyang unde kinjo wune, Yesu Kristi.

¹⁸Ikyaen ayine, pangma ti kujwo wande ti titibi kinjo na Adamu, tae meme ande si rikwen iticwu, ti mbwe-yi ama, wande ti tinyang kinjo na Kristi nwangru ande meme uwae rikwen iticwu, u nda ba unyang ti tsi kukunn.

¹⁹Pangma ti risu ti kpag unde kinjo nda ande yang-ba kafe ande titibi uwe Rimam, ti mbwe-yi ama, ande yang-ba u kafe ande ti tinyang uwe Rimam ikyaen risu ti nae riben unde kinjo.

²⁰Icwe sang ba ti wu u nda ikentitibi mbae nghinghae, amaa, uwog ti ikentitibi a ko ku fufa, ayibrisi Rimam ama ko ku fufa.

²¹Pangma ti, ti kucang, ikentitibi nae ukwe uwae iticwu, ti mbwe-yi ama, tine, ayibrisi Rimam u nae ukwe yi fengo usom ti kpang atang, u sa ba unyang ti tsi kukunn ti ati u tu uwog Itsekuru-ti Yesu Kristi.