Read kutep Roma 6 Bible Online

Roma 6 - kutep bible

Roma 6

¹Ti ayi si ahan, ati u ri baa imi tiri? Ati u tsikunn ikentitibi ti ti nde ikyaen ti ayibrisi Rimam uwog-ti ā ko fufa a.

²Iyee! Ati ande ti cwu pu ti yi ikentitibi, u kyang rimang kafe ka som usom na ikentitibi cwucwo?

³Patag-ti ande ti a nde na pu ba ati batisma yi rinyi Kristi Yesu, batisma wune nda ti sang yi risu ti ren te wu uwae iticwu-wu ama.

⁴Batisma ti a nde ti, si pangma ati na te wu cwu tetso, a sa ti nji te wu ama. Ayi nde ikyaen ti pangma ti Itse-ti Rimam, uwae kuko-wu ti riyinn-wu, kunn nwunn umbae-wu Yesu uwae iticwu, ati ama u nwunn, u som usom uwae unyang tishe.

⁵Ikyaen yine, ti ati ren pu ti risu te wu uwae iticwu itso ana-wu ne, ati te wu u ren kang risu te wu yi itinwunn uwae iticwu, itso ana-wu ama.

⁶Ati nung pu ti baa, a na sa utob-ti ti tikyi kwer ren te wu risu kutuku ti cice. A nde ayine ikyaen ti utob-ti, ti ku sha nyáng iken rimenn ijwe, na ā cwu, ti ati na si-ti apyi ikentitibi cwucwo be.

⁷Ikyaen ti, unde a cwu pu wu, a saen wu ta pu ba uwae apyi ikentitibi ti ti nde.

⁸Asiti ati a cwu pu ti te Kristi, ati ru kubenti baa, ati te wu na u som tetso uwae unyang.

⁹Ati nung pu ti baa, a na kunn nwunn pu ba Kristi uwae iticwu, ama awu na u cwu kyi-wu cwucwo be. Iticwu site-yi kuko risu-wu cwucwo be.

¹⁰Ikyaen ti, iticwu ti awu cwu né, si ti awu cwucwu yi ikentitibi ti ti nde. Awu cwu kipaen kinjo, ikyaen meme ande. Usom ti som-wu tine, awu som ikyaen ti Rimam na tu kuko.

¹¹Ikyaen ayine, ni sae risu-ni pangma ande ti cwucwu yi ikentitibi ti ti nde, ama pangma ande ti site unyang tishe yi Rimam uwae risu ti ren te Yesu Kristi.

¹²Ni cwe-ni ti ikentitibi ā nae ukwe risu rimenn ijwe-ni ayine ti ku cwucwu be. Ni nda-ni ikentitibi riyae ti yi shir ni ka putsa ijaen utense be.

¹³Ni cwe-ni ti akyab rimenn-ni ā kafe iken ti Shetann ku nde wande titibi atang be. Ani si ande ti cwucwu, u kafe ba ti unyang. I nyang skeb ti ni sa ijwe-ni meme na Rimam ti wu ā nde wande ti tinyang te yi.

¹⁴Ikentitibi u nae-yi ukwe risu-ni cwucwo be, ikyaen ti, ani si-ni apyi icwe cwucwo be, ani si ande ti tu rinyangwae Rimam.

¹⁵Ati u ri baa imi tine? Ati u ru uwe ti ikentitibi ti ti nde ikyaen ti icwe ta-yi te kuko risu-ti be, ati na ta uwae ayibrisi Rimam a. Iyee.

¹⁶Ani nung-ni ti unde a sa ijwe-wu na unde iki, u nae risu riben te unde wu, awu si pu wu upyi unde wu be a. Asiti ani a si apyi ikentitibi, ani ta fengo iticwu. Amaa ani a si apyi na risu ti nae riben te Rimam, ani u tu risu tinyang uwe-wu usir rikwen.

¹⁷Ati fxaefa te Rimam ti ani ande ti si apyi ikentitibi kucang, kafe pu ni ande ti ku nae risu riben na ira Rimam, u sa utob-ni na iken ti kwen-m ti kubenti ti a kwen na ni.

¹⁸Ama ti a sa ruye pu ba ani uwae ikentitibi, ani kafe apyi na usom ti kubenti.

¹⁹Ame ku ri ira yine, u ku sa ni myae te ande ti kununn te apyi ikyaen ti, ani kwen ben-ni uwae ira Rimam be. Ti kucang, ani si apyi ikentitibi, u sa ijwe-ni na iken ti ku txi iyib, ku nyatsa icwe. Tine, ni sa ijwe-ni kafe apyi usom ti kubenti, u som usom ti saen kyag.

²⁰Kiye ti ani si apyi ikentitibi, usom ti kpang atang si-yi te kuko iki risu-ni be.

²¹Amaa, itinyang imi ti ani ku tu kiye wu, uwae ikentitibi ti ani ku nde, ti ku nda ni rukwae tine? Ricwunnkyi iken yi si iticwu.

²²Amaa tine ti a saen ni ta pu ba uwae apyi ikentitibi ti ti nde, ama ti ani kafe pu ni apyi Rimam, iken ti ani bunn atang si ti a jwosaen utob-ni. Ricwunnkyi wune si unyang ti tsi kukunn.

²³Kujwojang ikentitibi si iticwu, amaa, rinyangwae Rimam si unyang ti tsi yiyer yi uwog Itsekuru-ti Yesu Kristi.