Read kutep Roma 7 Bible Online

Roma 7 - kutep bible

Roma 7

¹Ameinja-m, ani ti si ande ti nung pu ni icwe Rimam, ani nung-ni ti icwe ku yir unde kiye ti unde wu a ta ti unyang amam be a.

²A bae uwae icwe baa, unda ribaen u som te ubaen-wu se kiye ti ubaen-wu a cwu pu wu. Asiti ubaen-wu a cwu, a saen unda wu ta pu ba uwae icwe ti yir wu te ubaen-wu.

³Ikyaen yine, unda wune a ka nae te unde iki kiye ti ubaen-wu som risu-wu ti atang, a u kunn wu baa iyaen. Amaa asiti ubaen-wu a cwu pu wu, unda wu site riyae ti wu u baen unde tishe, ama uwog icwe ayi si-yi amae ti nae be.

⁴Ayi si ahan te ni ama ameinja-m. Icwe ta-yi ti kuko risu-ni cwucwo be, ikyaen ti, ani cwu pu ni kiye ti Kristi cwu. Ama tine, ani kafe pu yi ana unde tishe, awu unde ti Rimam kunn nwunn uwae iticwu. Ayine si ikyaen ti, ati na nde iken ti tinyang fengo Rimam.

⁵Kiye ti ati som usom rimenn ijwe, ati nae risu riben te iken ti ku taen ti ayib, ti si icwe ti ye nwunn yi uwae utob-ti. Ama ayi nde wande ijwe-ti, u nda ti nde iken ti shir iticwu ba risu-ti.

⁶Ama tine, a saen ti ta pu ba uwae icwe ti ti putsa, ti ku tso baa, ati na cwucwu yi ikentitibi ti ye ti upyi. Ikyaen yine, tine, ati u nde-ti wande nà Rimam yi fengo icwe ti tikyi ti a bae tsi be, amaa, uwae unyang tishe na Kusung.

⁷Tine, ati u ri baa imi? Icwe Rimam ti risu-yi na si titibi a. Iyee, ko tikiyib, ikyaen ti, ayi na si-yi icwe be, ame u nungye m ikentitibi-m be. A baa, icwe na ri-wu baa, “Taen-fu ayib taen be,” ame ú nung-m iken ti a ku kunn baa, ayib ti taen be.

⁸Amaa, ikentitibi tu riyae yi fengo na icwe Rimam, u nda patag itso ijaen ti rimang ti ta utob-m nwunn ritsen. A baa, icwe na ta-yi be, ikentitibi ú si rukom.

⁹Kucang ti icwe ta-yi be, ame som, unyang ku tso m ruwen, amaa, kiye ti icwe ba, ikentitibi gbug nwunn ritsen,

¹⁰u nda m cwu ricwu. Icwe ti ame ku tang baa, ayi na u nda m unyang, shir iticwu ba na m.

¹¹Ikentitibi tu riyae uwae icwe Rimam, u kyaefa m, ama u wen ra m.

¹²Icwe Rimam ti risu-yi si ti saen kyag, kusen ti Rimam ku fwa ti si ti saen kyag ama. Meme-yi si iken ti pang atang, u nyang.

¹³Ko ayine ku tso baa, iken ti tinyang na shir na m iticwu a. Iyee. Ayi si ikentitibi ti nde wande te iken titinyang, u nda imbyi ikentitibi nae ise. Ikyaen itiba icwe Rimam, ikentitibi ru ba beb skeb ti kucang, u beb skeb risu meme.

¹⁴Ati nung pu ti baa, Icwe Rimam na si iken na kusung, amaa, ame si iken na ijwe. A sa m jaebci na ikentitibi, ama ame kafe upyi-wu.

¹⁵Ame nung nyang-m iken ti ame ku nde be. Ikyaen ti, ame ku nde-m iken ti ame ku sha ti m u nde be, ame ku nde iken ti ame ku sha-m be.

¹⁶Ti ame ku nde-m iken ti utob-m ku sha be ne, ayi ku tatso iticwe-m baa, icwe Rimam na nyang.

¹⁷Ikyaen ayine, ayi si-yi ame ti ku nde yi be, ayi si ikentitibi, ti somsi utob-m, ti ku nde yi.

¹⁸Ame nung pu m baa, itinyang iki na ta-yi utob-m be. Ame site utob ti m nde iken ti kpang atang, ama u site-m kpakang itinde-yi be.

¹⁹Ame ku nde-m iken ti tinyang ti ame ku sha ti me nde be, amaa ame ku nde ikentitibi ti ame ku sha-m ti me u nde be.

²⁰Tine, ame a ku nde iken ti utob-m ku sha-wu be, ayi si-yi ame ti ku nde yi cwucwo be, amaa ikentitibi ti ta ijwe-m ti ku nde.

²¹Ikyaen yine, m ba nungye baa, ayi na si icwe iki txi ti na ku kyang ikyin utob-m. Ayi si ti kiye ti ame a ku sha ti m nde iken ti kpang atang, ikentitibi tsi yiyer te m.

²²Uwae riyaen utob-m ame ku tsen utob ti m u putsa icwe Rimam.

²³Amaa iken iki ta kyi rimenn m, ti ku ta rika te icwe Rimam ti ta utob-m. Ayi ye m upyi, u ku nda m nde kob ikentitibi, u kafe upyi-yi.

²⁴Ame si iken ti ku nde risi! Aye ti u nwangru m uwae ijwe wune, ti ku shir me ru yi iticwu?

²⁵Ati fxaefa te Rimam ti nde yi, yi fengo na Itsekuru-ti Yesu Kristi! Ricwunnkyi-yi, uwae riyaen utob-m, ame ku putsa icwe Rimam, ama yi rimenn ijwe, ame ku putsa icwe ikentitibi ti ye m upyi.