Read kutep Roma 9 Bible Online

Roma 9 - kutep bible

Roma 9

¹Ame ku ri kubenti uwae rinyi Kristi, ayi si-yi rifen ti ame ku ri be. Kusung Rimam ti ta riyaen utob-m cwe ira yine ama,

²ti ame ku caeb uwae, ku byir utob timambe

³risu ande-m. A baa, ayi na u ndeya, ame ú jwam Rimam ti wu rimbeb m, u kata m te Kristi ikyaen ameinja-m na rimenn ijwe.

⁴Aba ti si anyisu Isirela, u si ande Rimam, ti Rimam nda ba kafe anyisu-wu, u tatso ba riyinn ti ana-wu ti nyang nyae tsitsa. Aba ti awu yer unju te ba, u nda ba icwe-wu. Aba ti ku fen wu yi fengo ti kubenti. Aba ti tu iken ti Rimam sa tsi na ba.

⁵Aba ti si rishi abitsekam-ti ti kute.[7] Kristi[8] ti risu-wu fa rishi-ba ama, kiye ti a mbae wu sang utense ne. Ande meme ā teb rinyi Rimam, awu ti ta risu iken meme ru fife yi uwe. Ayi ā si ahan!

⁶Ayi si-yi ti itimyae Rimam na nde nunum be. Ayi si-yi Isirela meme ti si Isirela ti kubenti be.

⁷Cwucwo, ayi si-yi ande ti rishi Ibrahim meme ti si anyisu-wu ti kubenti be. Rimam ri te Ibrahim baa, “Ayi si anyisu umbae-fu Ishaku ti ame u pwen ba baa, aba na si ana-fu.”

⁸Ayine ku tso baa, rishi Ibrahim ti kubenti si aba ti awu tu ruye unju ti yer na Rimam, si-yi anyisu-wu na rimenn ijwe be.

⁹Ikyaen ti, Rimam yer unju te Ibrahim baa, “A ba kpang ti kiye wune, kusang ti ku ba, ame u ka kafe ba, ama uwa-fu Saraya u mbae umbae ti urom.”

¹⁰Isim yine cwucwo Rimam ri ira te Rebeka uwa itse-ti Ishaku kiye ti awu kyaen rishwu anyisu ishe.

¹¹Ti ti anyisu aba ta ti uwae rishwu, ama a nde-ba iken iki be, ko itinyang ko ititibi, ti ayi ā kumunn utob Rimam, ama ikyaen ti ititsab-wu ā ru yi uwe, Rimam ri ira te wu ti wu tatso baa, ititsab-wu na si-yi ikyaen kujwo wande unde iki be, amaa, ikyaen itikunn-wu, ti awu ku tsab ande ti awu ku sha.

¹²Rimam ri te wu baa, umbae ti ndufu na u ba ta imbyi awu ti kitinying.

¹³Pangma ti a bae uwae Kutsingken Rimam baa, “Ame site ure ti Yakubu, amaa, ame pyir Esuwa.”

¹⁴Ati u ri baa imi tine? Rimam na nde-wu iken ti kpang atang be a. Iyee, ko tikiyib!

¹⁵Rimam ri te Musa baa, “Ame u tso ayibrisi-m ba uwog unde ti ame u tso ayibrisi, u nung risi unde titini ti ame u nung risi wu.”[9]

¹⁶Wande Rimam konje-yi iken ti utob unde ku sha, ko kujwo wande na unde iki be, amaa, yi ayibrisi Rimam.

¹⁷Uwae kutsingken-wu, awu ri te ukwe ti Ejib baa, “Ame nda fu nae ukwe ikyaen ti m tso kujwo wande-m ti kuko-m risu-fu, ikyaen ti rinyi-m ā pu iten kyi fe utense meme.”

¹⁸Ikyaen yine, ati nung baa, Rimam na site ayibrisi risu unde ti awu ku sha uwae-wu, u yirkyi utob ariki ti aba ā fxen-ba ira-wu be.

¹⁹Unde u ndeye ti wu rang ira baa, ayi a si ahan ama, Rimam kyang rimang ku ye kyi ande ti ikentitibi? Ikyaen ti, aye ti ko ti wu tsi ukub te iken ti Rimam myae tsi?

²⁰Afu unde si aye ti ko ti fu shaen ishaen te Rimam? Kitutong u shaen-wu ishaen te unde ti mbye wu baa, “Afu kyang rimang u mbye m ahan” a.

²¹Awu unde ti ku mbye kitutong site-wu kuko risu ariben be. Awu site kuko ti wu sa kubyi ariben kinjo, u kata wu, u mbye atutong, ti kinjo ā si iken ti a u nde wande tiyang atang, kinjo ama ā si iken ti a u nde wande ti ko sisi atang.

²²Awu Rimam ama re? Iki be awu pwen ti wu tatso utob ti ndembeb-wu te ande, u tso kuko-wu, u twenji ba, amaa, awu ye utob te ba.

²³Awu ku sha ti wu na u tso rifunn na riyinn-wu te itinyang-wu ba uwog ande ti awu nung ba ti ayibrisi, aba ti awu myae tsi ti kucang ti a na kyangte riyinn.

²⁴Ati ti awu kukunn, fa ti atang ama, si-yi kum Mbayawuda amam be, amaa, ande ti nung-ba Rimam be ama meme.

²⁵Pangma ti awu Rimam ri uwae kutsingken na Hoseya baa, “Ande ti si-ba ande-m be, ame u kunn ba baa, ande-m. Ambukwen ti m site-m ure te ba be, ame u kunn ba baa, ande ti ure-m.

²⁶Uwog ti a ku ri te ba baa, ‘Ani si-ni ande-m be,’ si si uwog ti a u kunn ba baa, anyisu Rimam, awu Rimam ti site unyang.”

²⁷Ishaya ri ira risu ande ti Isirela ti kucang baa, “Ko asiti anyisu Isirela a jwinn pangma isabung ti ta unju uyinn, ande ti u tu itinwangru uwae-ba u ko-ba ko be,

²⁸ikyaen ti, Itsekuru u nde-wu kukyib be, u pwen ande ti utense rikwen, u byinn ba kimbab.”

²⁹Pangma ti awu Ishaya ri ti kucang, “Itsekuru ti si ukwe rika, á baa, awu na ya itso-ti iki na ta-wu ti a u kunn rinyi-ti ru yi uwe be, tine ati ú twenji pu ti pangma ande ti uten ti Sodom ti Gomora.”

³⁰Ati u ri baa imi? Ande ti si-ba Mbayawuda be, ko ti aba kwab-ba ti a tu risu tinyang uwe Rimam be, aba tu pu ba yi, ikyaen uwae kinjo-ba.

³¹Amaa ande ti Isirela, ti Rimam tsab sa kucang, tu-ba risu tinyang uwe Rimam be, ko ti aba ku kwab.

³²Imi ti nde nee aba shanum te itinyang Rimam? A shanum ikyaen ti, aba sa ijwe-ba konje uwog wande ti tinyang ti ti nde, ti si-yi te uwae kinjo be. Aba kyen kufxen ijwe kutxom nee a bae uwae Kutsingken Rimam risu-wu baa,

³³“Ni sae, ame sa kutxom tsi uwae uten ti Siyon ti u nda ande kyen kufxen. Unde ti a ru kubenti uwog-wu awu u wae-wu rukwae ama be.”