Read kutep 1 Korinti 11 Bible Online

1 Korinti 11 - kutep bible

1 Korinti 11

¹Ni putsa kufxen-m pangma ti ame ku putsa kufxen na Kristi.

²Ame ku teb ni ikyaen ti, ani ku tangsom te ira-m ko kiye titini, u ku putsa iken ti kwen ti ame nda ni kujwo.

³Amaa, ame ku sha ti ni na nungye baa, unde ti ta risu arom meme si Kristi, unde ti ta risu unda si urom, Rimam ama ti ta risu Kristi.

⁴Ikyaen yine, urom ti a ku jwam itijwam, ko awu a ku nyae iski ira Rimam, asiti awu a bur kubur, awu ku nda-wu Kristi ti si risu-wu, rurob be.

⁵Ama unda ti a ku jwam itijwam, ko awu a ku nyae iski ira Rimam, awu a yirkyi-wu risu-wu be, unda wune ku saeru ubaen-wu ti si risu-wu. Awu ti unda ti pwén risu-wu pwén pang atso.

⁶Unda ti a ku cwe-wu ti wu yirkyi risu-wu be, awu ā pwén risu-wu pwén. Ama ati nung baa, ayi na si iken ti ku wae rukwae asiti unda a pwén risu-wu pwén. Ikyaen yine, ayi nyang skeb ti unda ā yirkyi risu-wu kyi te kutupwa.

⁷Amaa, urom ā burkyi-wu risu-wu kyi be, ikyaen ti, awu si iken ti Rimam kyae ru ijwe-wu. Urom ku tso riyinn na Rimam. Unda ama ku tso riyinn na ubaen-wu.

⁸A kyae urom ruye-ba rimenn unda be, amaa, unda ruye uwog urom.

⁹A kyae-ba urom ikyaen na unda be, amaa, a kyae unda ikyaen na urom.

¹⁰Ikyaen na yine, ti ikyaen na atom Rimam ti apupwen, ayi nyang ti unda ā burkyi risu-wu te kutupwa ti wu tatso baa, unde na ta risu-wu.

¹¹Ama uwae usom ti som-ti fengo na Itsekuru, urom ā ri-wu baa, awu na u som usom ti risu-wu be, unda ama ā ri-wu ahan be.

¹²Ayine si kubenti, ikyaen ti, unda ruye rimenn urom, ama i si unda ti ku mbae urom, Iken meme ru ye uwog Rimam ti mam iken meme.

¹³Ana-ni, ni nung rimang? Ayi nyang ti unda u jwam Rimam ti risu-wu ukaen a.

¹⁴Iken ti Rimam kyae utense ne ku kwen na ti baa, urom ti a ya ikyinn risu-wu ta ti rikob, awu ku shir rikwae ti wae na ijwe-wu.

¹⁵Amaa, ayi si iken ti tinyang uwog unda ti wu ya ikyinn-wu ta ti rikob-yi, ikyaen ti, Rimam nda unda ikyinn ti rikob ti awu ā burkyi risu-wu atang.

¹⁶Asiti unde iki a shaen-wu ira ti m ri ne, awu ā nung nyinyang baa, uwog-ti, fengo iki ta-yi be, si nyang awune amam. Ande na Yesu ko aka patag ku putsa si icwe wune ama.

¹⁷Ira iki ta kyi atang, ame ku teb-m ani atang be, ikyaen ti itifunn-ni ti ani ku funn kusog Rimam pang-yi atang be. Iken ti ani ku nde atang si titibi, i si-yi iken ti tinyang be.

¹⁸Ti kucangtsi, ame fxen baa, uwae itifunn-ni ti ani ku funn kusog Rimam, ani na kata kumbub kumbub u ku fxaen ufxaen tetso. Ame ku tang baa, itikata-ni, ti ishaen ti shaen-ni na si kubenti.

¹⁹Ayi si kang ahan ikyaen ti, itikata-ni u nda ande nungye ande ti ku putsa Rimam ti utob kinjo uwae-ni.

²⁰Uwae itifunn-ni, ayi ku si-yi wuci na Itsekuru ti ani ku ci be.

²¹Ikyaen ti ani ku som ji-ni atso ti ni u ci wuci yi tetso be. Ani ku ci kum usam usam, ariki ku jwub ira rimenn, ariki ama ku ngwa ku shishaen.

²²A'a! Ani site-ni anunn ti ni u ci wuci atang be a. Ko ani ku sha skeb ti ni u saeru ande na Rimam u sa rukwae na ande ti rikaen a. Ani ku kab baa, ame na u ri baa imi risu-yi? Ani ku kab baa, ame na u teb ni teb a. Iyee, ame u teb-m ani be.

²³Ira ti ame kwen na ni ru uwog Itsekuru ba. Awu tatso m baa, utitang wu ti a sa Itsekuru-ti Yesu jabci, ti uwe-yi awu sa kubyi buredi

²⁴u nde fxaefa na Rimam u nyangta buredi wu u ri baa, “Awune si rimenn ijwe-m, awu si ikyaen-ni, ni nde kob yine ikyaen ti ni tangsom te m atang.”

²⁵Awu nde ti mbwe-yi ama te kiticwae ambyi isim ti a ci mam pu ba wuci. Awu ye ra wu fa kujwo u ri baa, “Kiticwae ambyi wune ku tatso unju ti yer tishe ti Rimam ku yer te ni, ti awu yirbom te anying-m. Ko kiye titini ti ani a ku ngwa ambyi wune, ni nde pangma ti ame ku nde ne, ti ni tangsom te m.”

²⁶Ikyaen ti, sa ti kiye wune ru fe yi usir ti Itsekuru-ti Yesu u kafe ba, ko kiye titini ti ani a ku ci buredi wune u ku ngwa ambyi wune, ani ku tatso ande baa, Itsekuru na cwu ricwu ikyaen-ti.

²⁷Ikyaen na yine unde ti a ci wuci na Itsekuru yi fengo ti pang-yi atang be, unde wune ku raen ira yi rimenn ijwe ti anying na Itsekuru.

²⁸Ikyaen na yine, unde ti a ri baa, awu na u ci buredi na Itsekuru u ngwa ambyi ti kiticwae-wu, awu ā myae risu-wu titawe ti awu ā ci.

²⁹Unde ti a ku ci buredi yine u ku ngwa ambyi yine u nungye-wu ti buredi yi si ijwe na Yesu be, ambyi yi ama na si anying Yesu be, unde wune shir rikwen Rimam ru ku ba risu-wu.

³⁰Nee iken ti nde ariki uwae-ni ku nae kob kicaeb u si-ni te ribom be, ariki ama cwu pu ba.

³¹Á baa, ati na ku myae risu-ti uwae kubenti titawe, rikwén Rimam ú ba-yi risu-ti be.

³²Amaa, ayi a si Itsekuru ti ku pwen ti rikwen, ayi si kimbab ti byinn ti awu ku byinn ti, ikyaen ti wu nwangru ti. Awu ku sha-wu ti awu u pwen ti rikwen iticwu ren fa te ande ti utense be.

³³Ikyaen na yine, ameinja, kiye ti ani a ru ba funn tetso ti ni ci wuci, ni somji atso se ani a byir tag pu ni titawe.

³⁴Asiti unde a ku fxen te rimenn, awu ā ci wuci ti uwae kununn titawe ti awu ā ru ba, ikyaen ti uwae itifunn-ni, ani ā shir rikwen Rimam si ba-ni risu-ni be. Ame a ru ba pu m atang titawe ati u ri tag ira ti tsitsi.