Read kutep 1 Korinti 12 Bible Online

1 Korinti 12 - kutep bible

1 Korinti 12

¹Ameinja, ame ku sha ti ni na nung nyinyang ira risu rinyangwae ti Kusung ti Saen Kyag ku nda ande.

²Ani nung pu ni baa, kute kiye ti ani putsa-ni ira na Yesu khika be, ani jwe byinn u ku putsa apxin, iken ti site-yi unyang be.

³Tine ame ku sha ti ni na nungye baa, asiti ayi a si Kusung ti Saen Kyag ti ta utob unde, unde wu u rimbeb-wu Yesu be. Cwucwo, unde iki u ri tu-wu baa, Yesu na si Itsekuru-wu be, se Kusung Rimam a ndeya pu wu awu.

⁴Ko ti iken ta atang ti tsotso ti Kusung ti Saen Kyag ku nda ande nde, ayi si Kusung kinjo rikaen ti ku nda meme iken yine.

⁵Wande munnae ti tsotso ti ande ku nde ikyaen na Itsekuru, i si nyang Itsekuru-ti kinjo-wu ti a ku nde na wu wande yi.

⁶Fengo ti ande ku nde wande txi txi txi, amaa, ayi si sí Rimam kinjo rikaen ti ku nda ande kuko titawe aba ku nde wande yi.

⁷Kusung ti Saen Kyag ku tso ijwe-wu uwae utob unde titini uwae fengo txi txi ikyaen itindeya ande meme.

⁸Yi kujwo wande na Kusung-wu kinjo, Rimam ku nda unde iki ri ira na ben-ayib, amaa, ana unde iki, awu ku nda wu ri ira ti jijang ti awu tatso wu.

⁹Ayi si ti fengo na Kusung-wu kinjo nee awu ku nda ande iki ru uwae kinjo, u ku nda ande iki kuko ti a na nwangru ande ti nae kicaeb.

¹⁰Awu ku nda ande iki ti a na nde wande ti ku fur ayib u ku nda ariki ti a na ri ira ti Rimam tatso ba, ariki ama, Kusung ku tatso ba ti a na nungye iken ti ru uwog Kusung Rimam ba, ti iken ti ru uwog kusung iki ba. Ariki ama, awu ku nda ba ti a ri ira ti unju iki ti a kwen ji-ba yi usir iki be. Ariki ama awu ku tatso ba fengo ti a u ri tan umbyi ira yi ti abane ku ri.

¹¹Kusung ti Saen Kyag si kinjo amam, amaa, awu ku nda ande na Rimam nde wande txi txi, ti fengo titini ti nyang uwae-wu.

¹²Ijwe unde site akyab txi txi, amaa, awu si rimenn ijwe kinjo. Meme akyab yi ti txi txi ne a ren tetso titawe ijwe unde u ren tag. Ayi si ahan ama ti Yesu Kristi.

¹³Meme-ti Mbayawuda ti ande ti si-ba Mbayawuda be, apyi, ti ande ti si-ba apyi be, ati kafe pu ti ijwe kinjo, ama a nde na ti batisma uwae kuko na Kusung Rimam kinjo-wu. Ayi si uwog Kusung Rimam kinjo-wu ti ati ku ngwa.

¹⁴Ijwe-ti ande si-wu nyang kutsinn kinjo amam be, amaa, awu kata txi txi.

¹⁵Asiti kufxen a ri-wu baa, “Ame si-m kujwo be, ikyaen yine ame fa-m rimenn be,” ira ti awu ri ne byangkyi-yi ti awu si ikyaeb rimenn be.

¹⁶Cwucwo asiti kutong a ri baa, “Ame si-m riyib be, iken ti ren m te rimenn ijwe ti tsitsi si imi?” Ira-wu ayine u byangkyi-yi awu ti wu si ikyaeb rimenn be.

¹⁷Á baa, rimenn unde meme na si nyang riyib amam, unde u fxen ira rimang? Cwucwo, á baa, rimenn unde na si nyang kutong amam, unde u fxen akong iken rimang?

¹⁸Amaa, Rimam kyae iken ti ta rimenn unde meme pangma ti awu ku sha.

¹⁹Á baa, rimenn unde na si nyang ikyaeb kinjo amam, awu u si-wu ijwe cwucwo be.

²⁰Akyab rimenn unde munnae munnae, amaa, awu si ijwe rimenn kinjo.

²¹Ikyaen na yine, riyib u ri te-wu kujwo baa, “Ame ta-m te ira iki te fu be!” Risu ama u ri te-wu afxen baa, “Ame site ira iki te ni a,” be.

²²Iyee, ikyaeb rimenn ti ati ku kab baa, ayi na nam, ati u ya yi ta tu-ti be.

²³Cwucwo ikyab ti ati ku kab baa, wande-yi na pang-yi ma wande ati tsitsi be, si ayi ti ati ku sa yi te rurob siskeb. Akyab ti ati ku tang baa, ayi na nyang-yi ti unde na u pu ayib sae atang be, si ayi ti ati tam yi nyinyang,

²⁴amaa, ikyaeb rimenn ti ati ku tang baa, ayi na nyang siskeb, ati ku ya yi ta ahan amam. Rimam kyae ijwe unde u sa wande tiyang na ikyaeb ti ati ku tang baa, ayi na site-yi rurob be.

²⁵Ikyaen na yine, rimenn unde kata-wu ta be, ama, akyab rimenn yi meme ku ndeya atso.

²⁶Asiti ikyaeb rimenn iki a ku cicaeb, akyab ti tsitsi ku fxen kicaeb yi ama. Asiti a teb ikyaeb iki, ikyaeb ti tsitsi ku tsen utob ama.

²⁷Ani si ijwe na Kristi, unde titini uwae-ni si ikyaeb rimenn-wu.

²⁸Uwae kumbug ande Rimam, Rimam nda unde titini kujwo wande-wu. Awu tsab ariki ti aba na si atom na Yesu Kristi, ariki si ande ti ku ri ira ti awu ku tatso ba, ti ita si ande ti ku kwen iken. Isim yine, awu nda ande iki ku nde iken ti ku fur ayib, u nda ande iki ti aba na nwangru ande ti nae kicaeb. Awu tsab ande ti ku ndeya ande ti rikaen, ti ande ti nung fengo ti a ku ye su ande, ti ande ti ku ri ira ti unju txi txi ti Kusung ti Saen Kyag nda ba ri.

²⁹Ande meme si atom a. Ayi si meme ande ti Rimam ku tso ba ira ti a u ri a. Ande meme si ande ti ku kwen iken a. Ayi si meme ande ti ku nde iken ti ku fur ayib a.

³⁰Meme-ti u nde tu wande ti ti nwangru ande ti acaeb a. Meme-ti ku ri tu unju ti Kusung Rimam nda ariki ti a na ri a. Meme-ti ku kafe tu umbyi ira yi wurr a.

³¹Uwae iken ti Kusung Rimam ku nda ne, ni sa utob-ni tsi skeb risu ayi ti site rurob siskeb. Tine ame u tatso ni fengo ti nyang siskeb meme patag.