Read kutep 1 Korinti 13 Bible Online

1 Korinti 13 - kutep bible

1 Korinti 13

¹Asiti ame a ri tu tag unju ande ti utense meme ko ana atom Rimam ti apupwen, amaa, ame a site-m ure be, ira-m ayi si ukaen pangma kububong ko kyangkóng ti ku ri nyang ira amam.

²Ko ame a ri tu ira Rimam te ande, ko ame a nung tag iken meme u nungye imbyi ira ti ti tam meme, ko uwae kinjo-m a pang pu yi ti m mbub rikwen nwunn uwog ti awu tsi atang, asiti ame a site-m ure be, ame si ukaen.

³A baa, ame na pu iken ti ame site meme na ande, ko ame a sa ijwe-m na ande ti a na twen mbub, amaa, ame a site-m ure be, ayi u ndeya-yi ame be.

⁴Ure ku ye utob u site itindeya. Awu ku tsinn-wu kitsinn be u ku ndub-wu ijwe be. Awu ku teb-wu risu-wu be.

⁵Ure ku nde-wu iken ti unghae be. Awu ku sha-wu nyang iken na risu-wu amam be. Awu ku tso-wu rinae fife be, u ku ye su-wu riraen utob be.

⁶Ure ku tsen-wu utob ti ikentitibi be, awu ku tsen utob te wande ti kubenti.

⁷Ure ku ye utob uwae iken meme. Awu ku tsikunn ti ku ru kubenti, u ku tsikunn ti ku sa uwae tsi ama ku kaen kutxom sur utob uwae iken meme.

⁸Ure ku mam-wu mam ama be. Kiye ku ba ti ande u ri-ba ira ti Rimam tatso ba cwucwo be. Kiye ku ba ti ande ti ku ri unju txi txi ti a fxenji-ba khika be u ba wur ru. Ira ti nung ande u ba wur ruru.

⁹Uwae kiye wune ira ti ati nung si ripye ira amam. Ira ti Rimam ku nda ande ri tso te ande, ayi ama si ripye ira amam.

¹⁰Amaa, usir wu ti Rimam u kumunn tag iken meme, ayi iken ti si ripye u yagta.

¹¹Kiye ti ame si umbae ti tinying ti atang, ira ti kab-m si ana umbae kitinying. Ira ti kab-m si ana umbae kitinying. Ame ku myae ira pangma umbae kitinying. Ama, isim ti ame ser ben pu m, ame ku nde-m iken anyisu tinying cwucwo be.

¹²Uwae kiye wune, iken ti ati ku sae si pangma kusung ti unde ku sae uwae iken ti ku sae ayib. Amaa, uwe ike ati u ru ba sae meme iken yi ayib ti ayib. Iken ti ame nung uwae kiye wune si ripye, amaa, uwe ike, ayi u ba kumunn. Uwe ike, ame u nungye tag iken pangma ti, tine, Rimam nungye ira ti kab-m meme.

¹³Iken ita ta atang ti u tsi kukunn. Ayi si uwae kinjo, ti uwaetsi, ti ure. Uwae iken ita yine, iken ti ko siskeb si ure.