Read kutep 1 Korinti 14 Bible Online

1 Korinti 14 - kutep bible

1 Korinti 14

¹Ikyaen yine, ni kwab ti ni putsa fengo ure. Ni sa utob tsi risu rinyangwae meme ti Kusung Rimam ku nda ande. Ni sa utob tsi skeb risu iskin ti ya ira Rimam.

²Ikyaen ti, unde ti ku ri ira ti unju ti awu kwen ji-wu ayi usir iki be, awu ku ri ira yi te Rimam, si-yi ande be, ikyaen ti ande nung-ba imbyi ira-wu ayi be. Ayi si ira ti rurong na Kusung Rimam ti awu ku ri tso.

³Amaa, unde ti ku ri ira Rimam te ande, awu ku ri yi ikyaen ti wu ndeya ande u ri kpag ba ijwe, u ri jim ba utob.

⁴Unde ti ku ri ira te unju ti Kusung Rimam nda wu ku ndeya nyang ijwe-wu amam, amaa, unde ti ku ri te ande ira ti Rimam tatso wu, awu ku ndeya ande na Yesu meme.

⁵Ame ku sha ti meme-ni na ri ira te unju ti a fxenji-ba yi be. Amaa, á baa, ani na tu kuko ti ni u ri tso ira ti kitam na Rimam, ayi ú nyang siskeb. Ikyaen ti, unde ti ku ya iski ira ti Kusung ti Saen Kyag ku tso wu skeb pu wu unde ti ku ri ira unju ti Kusung Rimam nda wu, se asiti unde a ri tan na ande imbyi ira-wu ayi titawe awu u ndeya ande na Rimam meme.

⁶Ameinja-m, asiti ame a ru ba uwog-ni u ba ri unju ti ani ku fxen-ni be, ayi u ndeya ni a. Amaa, asiti ame a ri tatso ni ira iki tishe ti Rimam tatso m, ko asiti ame a kwen na ni ira iki ti ani nungye-ni khika be, ayine u ndeya ni.

⁷Kufa ti ikob si-yi iken ti site unyang be, amaa ayi ama, asiti ayi a ri ira tso-yi ritsen be, ande u nde rimang u fxen ye afxenjwin na akyang-yi ti a ku yang atang?

⁸Asiti unde ti ku kunn kutumu a kunn-wu nyinyang be, ande u nung-ba ti a ku kunn ba ira rika be.

⁹Ayi si ahan ama uwog-ni. Asiti ani a ku ri ira te ande ti unju ti a ku fxen-ba yi be, awu u nungye-wu imbyi ira-wu ayi be. Ira ti awu ri meme u pangma ufunn ti ku kae amam.

¹⁰Unju ande munnae munnae utense ama, meme-yi site imbyi-yi.

¹¹Amaa, ame a ku fxen-m unju unde be, unde wu si rikyen uwog-m, ame ama si rikyen uwog-wu.

¹²Ayi si ahan ama uwog-ni. Ti ani ku sha ti ni u tu rinyangwae na Kusung Rimam, ni sa uwae tsi siskeb risu rinyangwae yi ti u mbye nyang ande Rimam.

¹³Unde iki a ku ri unju ti ande ti tsitsi ku fxen-ba yi be, awu ā jwam Rimam ti Rimam ā ndeya wu ti wu ri tso imbyi ira yi te ande.

¹⁴Ikyaen ti, asiti ame a ku jwam Kusung Rimam ti unju ti ande ku fxen-ba yi be, kusung-m ku jwam itijwam kubenti, amaa, ame nung-m imbyi ira ti ame ku ri be.

¹⁵Ikyaen yine, ame u nde rimang tiri? Ame u jwam itijwam yi uwae kusung, ame u jwam ti ira ti kab-m ama. Ame u yang akyang uwae kusung, ama ame u yang akyang ti imbyi ira ti ame nunung.

¹⁶Ayi a si-yi ahan be, asiti ani a ku teb Rimam uwae kusung amam, unde ti nung-wu ira yine be u kyang rimang cwe ira u teb Rimam te ni, ti nee awu nungye-wu imbyi ira yi ti ani ku ri be?

¹⁷Iki be kufxaefa ti ani ku nde pang atang, amaa, ayi u ndeya-yi unde ti ku fxen ni be.

¹⁸Ame fxaefa te Rimam ikyaen ti ame ku ri unju ti ame kwén ji-m ayi be skeb pu m meme-ni.

¹⁹Amaa, ko ti ayi si ahan, ame a ta uwog ti ande Rimam funn atang, ayi nyang skeb uwog-m ti m ri ira itsong ti unju ti ande ku fxen ikyaen ti aba ā kwén iken atang, ti ti ame u ri ira kumbub rijwe ti unju ti ande fxen ji-ba ayi usir iki be.

²⁰Ame ku jwam ni, ameinja, ni kab-ni ira pangma anyisu tinying be. Ayi a si ira ikentitibi ti ti nde, ni kwab ti ni si pangma umbae ibyaen. Amaa, ayi a si ira ti myae, ni kwab ti ni myae ira pangma ande ndufu.

²¹A bae uwae Kutsingken baa, “Ame u ri ira te ande-m, ame u ri ira te ba ti unju ande ti rikyen, ame u tom ande ti ise ba ri ira te ba ti unju ti aba ku fxen-ba be. Amaa, ande-m u naa-ba atong fxen m be.”

²²Ayine ku tatso ti baa, kiye ti unde a ri ira ti unju iki ti awu kwen ji-wu be, ayi si iken ti tatso uwog ande ti ru-ba uwae kinjo be. Ayi si-yi ikyaen na ande ti ru pu ba uwae kinjo be. Kiye ti unde a ri tso ira ti jijang na Rimam, ira ti awu ku ri si ikyaen ande ti ru uwae kinjo, i si-yi ikyaen na ande ti ise be.

²³Ikyaen yine, asiti ande ti ise ko ande ti nungye-ba iken yine be a sang ba kusog Rimam ti ani funn atang, ama ku fxen unde titini ku ri ira te unju ti ande ku fxen-ba be, aba u kab baa, ani na si ande ti ku jwub kijaen.

²⁴Amaa, asiti ande na Yesu meme a ku ri ira Rimam, unde ti ise ko unde ti ru-wu uwae kinjo be a sang ba kutampwa-ba, awu u nungye ikentitibi-wu ikyaen ti awu fxen pu wu ira yi ti aba ri. Ira yi u sang utob-wu.

²⁵Ira ti kitam ti ta utob-wu kucang, u ba nae ise, ama aba u ba fen Rimam u nda wu rurob u ri tso ti unju-wu baa, “Kubenti, Rimam te ni ta te atso ike.”

²⁶Ati u ri baa imi tiri ameinja? Kiye ti ani a funn te atso u ku jwam Rimam, unde iki ā yang akyang, unde iki ā kwén na ande iken, unde iki ā ri tso iken ti Rimam tatso wu, unde iki ā ri unju ti Kusung Rimam nda wu, unde iki ama ā ri tso imbyi ira yi te ande. Ni nde iken meme uwae fengo ti u nda ande Rimam tsi ti ribom.

²⁷Asiti ande iki a ku ri ira ti unju ti Kusung Rimam nda ba, ni cwe na ande ifaen amam, ko asiti aba a kuko, ande ita. Aba ā ri-ba ira yi meme-ba ti kiye kinjo be. Aba ā som ji atso ji, se unde iki a ri mam pu wu titawe unde iki ā ri ana-wu. Isim yine, unde iki ā mbubta imbyi ira-ba ayi na ande meme.

²⁸Asiti unde iki a ta-wu atang ti u mbubta imbyi ira yi be, unde ti ku ri unju ne ā som skirr, awu ā ri-wu ira uwae itifunn be. Awu ā jwam Rimam ti uwae utob-wu.

²⁹Ni cwe na ande ifaen ko ande ita uwae ande ti ku ri ira Rimam ti ā ri ira-ba ayi, ande ti tsitsi ā som skirr ti ā myae ira yi.

³⁰Asiti unde a tsi ritsen ku ri ira, ama, Rimam a tatso unde iki ti som atang ira ti ri, awu unde ti kucang ā som riben ti wu ā bwe tag-wu tiri.

³¹Riyae ta atang ti meme-ni u ri ira Rimam ti kinjo ti kinjo ikyaen ti ande meme ā tu ribom utob atang.

³²Ande ti site rinda ira ti Rimam ti ri, aba ā ye su rinda-ba ayi nyinyang.

³³Ikyaen ti Rimam si-wu Rimam ti kukyikab be, awu si Rimam na kujimshwur. Pangma ti ande na Yesu ko aka patag ku nde,

³⁴anda ā som skirr kiye ti ande a funn ku jwam Rimam. Aba ā ri-ba ira be, amaa, aba ā nae risu riben, pangma ti a bae uwae kutsingken na Icwe.

³⁵Asiti aba a ku sha ti a u nung imbyi ira iki ti aba fxen, aba ā ru ka rang abaen-ba kununn. Ayi si iken ti ku wae rukwae asiti unda a sa afxenjwin tso ritsen uwae itifunn ande na Rimam.

³⁶Ko ani ande ti Korinti ku tang baa, iken ti kwen na Rimam na ru uwog-ni ba a. Ko ani ku tang baa, ira Rimam na ru ba ikyaen na ni amam a.

³⁷Asiti unde iki a ku tang baa, awu na ku ri ira na Rimam, ko awu site kuko iki ti Kusung Rimam nda wu, awu ā nung nyinyang baa, ira ti ame bae ku na ani ne na si kusen na Itsekuru.

³⁸Asiti ande a pyir ira yine, Rimam u pyir wu ama.

³⁹Ikyaen yine ahan ameinja-m, ni sa utob-ni tsi ti ni ri tso ira Rimam te ande. Ni byangkyi-ni ande ti ku sha ti a u ri unju ti Kusung Rimam nda ba be.

⁴⁰Amaa, ni nde iken meme sku sku yi fengo ti pang atang.