Read kutep 1 Korinti 2 Bible Online

1 Korinti 2 - kutep bible

1 Korinti 2

¹Ameinja-m, kiye ti ame ka uwog-ni ti ame u ri te ni ira ti kitam ti Rimam mbubta na m, ame ri-m ira yi ti unju ti tsab ko ben-ayib ti ana-m be.

²Kiye ti ame te ni ta tetso, ame myae baa, ame na u kab-m ira risu iken iki be, se nyang Yesu Kristi amam, ti iticwu-wu risu kutuku ti cice.

³Kiye wu ti ame te ni ta tetso, ame si-m ti kpakang be. Ikyen ricwu ye m, ijwe-m fwer ken tag.

⁴Ira ti ame ri te ni, ti iken ti kwén ti ame kwén na ni, ame ri-m ira na ben-ayib utense wune ti m shir utob-ni be. I si Kusung ti Saen Kyag na Rimam ti kuko ti ana-wu ti tatso ni baa, ira-m ayi na si kubenti.

⁵Ikyaen na yine, iken ti nda ni ru uwae kinjo uwog Yesu Kristi si-yi ben-ayib na ande be, i si kuko na Rimam.

⁶Ko ti ayi si ahan ira ti ati ku ri ku sa ben-ayib na ande ti serben pu ba uwae fengo Rimam. Ayi si-yi ben-ayib na utense wune be. Ayi ru-yi uwog ande ti site kuko uwae utense be. Ana-ba u tsi-yi tsi be u wur ruru.

⁷Ben-ayib ayi ti ame ku ri te ni ne si ben-ayib na itimyae Rimam ti awu sa tam ande kucang. Ti kucang cang, kiye ti awu kyae-wu apupwen ti riben khika be, awu myae ira yine tsi ikyaen ti ati na ru ba tu kuko ti riyinn atang.

⁸Ko kinjo uwae abikwe ti site kuko uwae utense ta-wu ti nung ira ben-ayib na Rimam yine be. Á baa, aba na nungye yi, aba ú cwe-ba ti a u ye Itsekuru-ti ti site riyinn patag kwer risu kutuku ti cice be.

⁹Amaa, ayi si pangma ti a bae uwae Kutsingken Rimam ti kucang baa, “Iken ti unde iki nung ji-wu te ayib be, ira ti unde iki fxen ji-wu te atong be, iken ti unde iki kab ji-wu ira risu-yi be ama, ayine ti si iken ti Rimam kyae tsi ikyaen ande ti ye ure te wu.”

¹⁰Rimam sa iken yine u tatso ti yi wande Kusung-wu. Kusung Rimam nungye iken meme, fa ti ira ti kitam na Rimam.

¹¹Unde ta-wu ti nung ira ti unde iki ku kab rishwu-wu be, se unde wu ti risu-wu amam. Ayi si ahan ama unde ta-wu ti nung ira ti kab na Rimam be, se Kusung Rimam amam ti nung iken ti ta utob na Rimam.

¹²Kusung ti a nda ti si-yi kusung na utense be. Awu si Kusung ti ru uwog Rimam ba. Rimam tom wu ru ba ikyaen ti ati na nungye iken ti tinyang Rimam ti awu ku nda ti.

¹³Ikyaen ira yine, kiye ti ati ku ri te ande ira yine, ati ku ri-ti ira ti ben-ayib ande ti utense be, amaa, Kusung na Rimam ti kwén tatso ti ayi. Ati ku ri tòm ira risu Kusung Rimam na ande ti site Kusung Rimam uwae utob-ba.

¹⁴Unde ti utob-wu a tsi nyang risu iken ti utense, awu u kyangte tu-wu rinyangwae ti Kusung Rimam ku nda be. Awu u nungye-wu itso iken yine be. Awu ku tang baa, ayi na si iken ti kuskwab, ikyaen ti, itso iken yine, ayi si nyang Kusung Rimam amam ti ku nda unde nungye yi.

¹⁵Unde ti site Kusung Rimam ku pwen rikwén risu iken meme, unde iki ama u pwen-wu awu rikwén be.

¹⁶Ayi si pangma ti a bae uwae Kutsingken Rimam baa, “Aye ti nung ira ti kab Rimam ti awu ku kab? Aye ti u ndeye ti wu kwén na Rimam iken?” Ama ana-ti ande ti site Kusung Rimam, itikab ye na-ti si ana Yesu Kristi.