Read kutep 1 Korinti 6 Bible Online

1 Korinti 6 - kutep bible

1 Korinti 6

¹Asiti ande ifaen uwae-ni a ku shaen ishaen te atso, asiti aba a pu atso ru yi kusog rikwén ti ande ti kufub na pwen ba rikwén atang, ayine nyang njwaa? Ayi nyang skeb ti ni u pu ande ba ba uwe na ande Rimam ti aba ā kyaenyang ira yi.

²Ani nung-ni ti uwe ike, ande na Rimam u pwen ande ti utense rikwén be a. Asiti ani si ande ti u pwen rikwén risu utense usir ti ucwe, imi ti nde nee ani pwen tu-ni rikwén risu ira ti pang pang ti ku nwunn kutampwa-ni be?

³Ani nung-ni ti ati u pwen atom Rimam ti apupwen rikwén usir ti ucwe be a. Ti ayi si ahan ra, imi ti nde ati pwen tu-ti rikwen risu ira ti pang pang ana utense wune be?

⁴Asiti itso ira yine a nwunn kutampwa-ni, ani u nde rimang u sa ru ka uwog ande ti ukaen ti nung-ba ira Rimam be ti a ka pwen yi?

⁵Ayae ni! Kiye ti ameinja atso a ku shaen ishaen tetso, ani shanum unde ti ben ayib kinjo rikaen uwae-ni ti u ri jim ira yi a,

⁶ti ani ku pu atso ru ba uwog ande ti nung-ba ira Rimam be ti aba na pwen ni rikwén.

⁷Itso ishaen ti shaen kutampwa-ni ne ku tatso baa, ani na jwunnsi pu ni. Á baa, ani na yata ti unde na raen ni ira, ayi ú nyang skeb-yi be a. Ande a cishi-ni, ayine u nyang skeb-yi ti ni ú cishi unde be a.

⁸Amaa, ko ti ani si ameinja atso, ani ku raen atso ira ku pu iken atso ci ti tikong.

⁹Unde ti ku nde ikentitibi u sang-wu Kujwokwe Rimam be, ani nung-ni ayine be a. Ni kyaefa-ni risu-ni be. Ande ti ku nde wande ti isor, ti ande ti ku fen apxin, ti ande ti ku nae amae, ti arom ti te arom ku nae atso,

¹⁰ti ande ti ku yib riyib, ti ande ti ku taen ayib iken ti si-yi ana-ba be, ti ande ti ku ngwa ujwab ku shishaen, ti ande ti ku ri txun mbeb rinyi ariki, ti ande ti ku pu iken ande ci ti tikong, meme ande ti ku nde itso ikentitibi yine u ka-ba Kujwokwe na Rimam be.

¹¹Kute ariki uwae-ni ta uwae utso ande bane. Amaa, Rimam jwosaen pu wu ani uwae ikentitibi-ni u nda ni kafe ande-wu. Ikyaen wande na Itsekuru-ti Yesu Kristi ti kuko na Kusung Rimam, ani kafe ande ti tinyang uwe Rimam.

¹²Iki be ariki uwae-ni ku ri baa, uwog-ti ande Rimam, a cwe na ti ti ti na nde iken meme. Een, amaa, ayi si-yi iken meme ti u ndeya unde be. Kubenti, ame u ndetu ti m nde iken ti ame ku sha, amaa, asiti iken yine a u nda m kafe upyi-yi, ame cwe-m be.

¹³Unde iki ku ri ana-wu ama baa, “Wuci si ikyaen na rishwu, rishwu si ikyaen na wuci.” Een, amaa, Rimam u twenji meme ifaen-yi. Rimam kyae-wu ijwe unde ikyaen ira amae ti nae be, amaa, ikyaen wande-wu Rimam. Cwucwo, ayi si Rimam ti ku nungkyi ijwe-ti ande.

¹⁴Pangma ti Rimam kunn shwur Itsekuru-ti uwae iticwu, awu u kunn nwunn-ti ama ti kuko-wu.

¹⁵Ani nung-ni ti ijwe-ni si akyab rimenn na Kristi be a. Ani kyang rimang u sa akyab rimenn na Kristi ru kaa ku nde iyag atang? Ayi u nde-yi be!

¹⁶Ani nung-ni ti kiye ti unde a nae te iyaen, awu ti unda wu si kinjo be a. A bae baa, “Aba ande ifaen u kafe unde kinjo.”

¹⁷Amaa, unde ti te Itsekuru-ti ren tetso, awu te wu si kinjo uwae kusung.

¹⁸Ikyaen yine, ni ya amae ti nae ta. Meme ikentitibi ti tsitsi ti unde ku nde ku tekunn-yi ijwe-wu be, amaa, unde ti a sa rimenn-wu nde ikentitibi atang, awu ku nde na ijwe-wu ikentitibi.

¹⁹Ni nung nyinyang baa, ijwe rimenn-ni si kusog Kusung ti Saen Kyag! Rimam ti sa wu na ni ti wu na nae uwae utob-ni. Ijwe-ni si-yi ana-ni be,

²⁰a jaeb mbe ni mbe. Ikyaen yine, ni nda Rimam rurob te ijwe-ni.