Read kutep 1 Korinti 8 Bible Online

1 Korinti 8 - kutep bible

1 Korinti 8

¹Tine, yi ira ti ti rang-ni risu wuci ti a pu fen apxin atang, a ku ri baa, meme-ti na site ben-ayib. Ayi si kubenti. Amaa, itso ben-ayib yine ku nda unde ndub ijwe. Iken ti ku ndeya ande siskeb si ure.

²Unde ti a ku tang baa, awu na nung iken timambe, unde wune ben-wu ayib pangma ti awu ku tang be.

³Amaa, ayi si unde ti ye ure te Rimam ti Rimam ku nung wu baa, awu na si unde ti ana-wu.

⁴Yi ira risu wuci ti a pu fen apxin atang, ati nung pu ti baa, apxin na site-yi unyang be. Ati nung pu ti ama baa, Rimam na si kinjo amam.

⁵Iken ta atang kuko uwae apupwen ti riben meme ti ande ku fen yi u ku sa yi tsi baa, ayi na si Itsekuru-ba,

⁶amaa, ati nung pu ti baa, Rimam na si kinjo rikaen. Awu ti si Itse-ti. Awu ti kyae iken ti ta utense meme. Awu kyae ti ti ati na som usom-ti ikyaen-wu. Ati site nyang Itsekuru kinjo ama. Awu si Yesu Kristi. Uwae wande ti ana-wu, Rimam kyae iken meme. Yi uwog-wu ati site unyang.

⁷Amaa, ande iki nung-ba iken yine be. Ariki ta atang uwae-ni ti si ande ti ku fen apxin kute. Aba ci bae pu ba upom apxin. Uwog-ba, aba a ku ci wuci yine, aba ku pwen baa, iki be wuci yi na si ana apxin. Ikyaen yine, kiye ti a ku ci itso wuci yi, aba ku tang baa, aba na ku nde ikentitibi.

⁸Wuci u sa ti ka-yi uwog Rimam be. Ko ati a ci, ko ati a ci-ti be, ayi si iken kinjo.

⁹Amaa, ni nung nyinyang. Iki be afu u nde iken iki baa, afu na si-fu upyi na Icwe be, ama iken yi u ru ka shir ande ti utob-ba kwèn-yi fengo Itsekuru be ru kaa nde ikentitibi.

¹⁰Afu nungye ira wuci ne, amaa, asiti unde ti nungye-wu ira yine be a nung fu som uwog apxin ku ci wuci ti a pu fen apxin atang, ayine u nda-yi unde wu ti wu kaa ci wuci yi ama be a.

¹¹Fengo na itinungye na-fu yine u nda unde ti ru uwae kinjo, ti bom-wu bom be, ti Kristi cwu ricwu ikyaen-wu, u twenji.

¹²Yi fengo ne, ani ku raen ameinja-ni ira, u ku shir ba ru ka nde iken ti aba nung baa, ayi na nyang-yi be. Si-yi aba amam be, ayi si riraen uwog Yesu Kristi ama.

¹³Ikyaen yine, ana-m, asiti ame a nung baa, wuci ti ame ku ci, u shir inja-m iki ka nde ikentitibi, ame ti risu-m u ci-m wuci yi cwucwo be. Ikyaen ti, ame ku sha-m ti inja-m iki na jwunnsi uwae ikentitibi ikyaen-m be.