Read kutep 2 Korinti 10 Bible Online

2 Korinti 10 - kutep bible

2 Korinti 10

¹Ame Bulus ku jwam ni ande-m! Ariki uwae-ni ku ri baa, kiye ti ame a te ni ta tetso ame na ku kyen ikyenricwu, amaa, kiye ti ame a ta rurwen te ni ame na ku ri ira ti ribom. Ame ku jwam ni ti kujimshwur, ti utob ti nae riben na Kristi baa,

²ni na nung afxen-ni riben nyinyang ti wande na ariki uwae-ni, ikyaen ti kiye ti ame a ru ba uwog-ni ayi u si-yi ti ame u nde ni ira ti ribom be. Ikyaen ti, ame ku myae baa, iki be ame u nde ti mbwe-yi te ariki uwae-ni ti ku ri baa, ame na ku som usom pangma ande ti utense.

³Ayi si kubenti ti ati ta utense, amaa, rika ti ati ku ta si-yi rika na utense wune be.

⁴Isu rika ti ati ku ta rika te yi ama si-yi isu rika na utense wune be, ayi si isu rika ti site ribom ti ru uwog Rimam ba. Ayi site kuko ti ku nda ti jwunn mbub kusog ti yang na unde ti rika-ti.

⁵Ati ku twenji ira tikong ti ande ku ri risu ira na Rimam, ti meme ira na ande ti ku ndub ijwe u ku nda ande nungye-ba ira Rimam be. Ati ku ye ra meme ira ti kab na ande kafe apyi-ti u ku nda yi nae risu riben te Kristi.

⁶Ama isim yi ti ani a nae pu ni risu riben, ati tsi ku ji ti ti sa kimbab u byinn unde titini ti nae-wu risu riben be.

⁷Ani ku sae iken ti ise amam, si-yi iken ti uwae be. Asiti unde iki uwae-ni a sa ijwe-wu tsi baa, awu na si unde na Kristi, awu ā tangsom baa, ame ama si ana Kristi.

⁸Ko ame a ku ndub pang-m ijwe risu kuko ti Rimam nda m, ame u wae-m rukwae be. Ayi si kuko ti a nda ti ti ti na u ndeya ni, si-yi ti ti u shir ni si yi riben be.

⁹Ame ku sha-m ti ani na sae baa, ame na ku kwab ti m na u nda ni ikyenricwu uwae atsingken-m ti m ku bae na ni be.

¹⁰Ariki ku ri baa, “Ira ti Bulus ku ri uwae atsingken-wu bom u ku ten utob timambe, amaa, kiye ti awu a ta te ti ayib te ayib awu bom-wu be. Ira-wu ku jim timambe!”

¹¹Unde ti a ku kab itso ira yine rishwu-wu, awu ā nungye baa, ira ribom ti ame ku tso uwae atsingken-m kiye ti ati ta rurwen te ni si si ayi ti ame u nde te ni kiye ti ame u ru ba uwog-ni.

¹²Ati ko-ti ti ti sa risu-ti myae te aba ande tiyang tiyang ti ta te ni akwen be. Aba ku ndub ijwe uwae-ni baa, aba na si ande ti rurob. Ati ko-ti ti ti u sang kumbub-ba be! Ana-ba, aba sa ijwe-ba myae te atso u ku sa risu-ba tsi pangma ti utob-ba tatso ba. Aba si ande ti kuskwab!

¹³Ana-ti, asiti ati a ndub ijwe, ati u ndub ijwe nyaetsa-ti icwe ti Rimam nda ti be, uwog wu ne wande-ti tsikunn atang. Ani ande ti Korinti ama fa uwae ice-ti wune.

¹⁴Asiti ati a ri baa, ati na site rurob risu-ni, ati nyaetsa-ti uwog ti rurob-ti tsi atang be. Ikyaen ti, ati ti si ande ti tawe ru ba uwog-ni ti ira tinyang na Kristi.

¹⁵Ariki ku ndub ijwe risu wande ti ayi si-yi aba ti nde yi be. Ana-ti ati ku nyaetsa-ti ice uwog ti Rimam myae tsi na ti atang be. Iken kinjo ti ati sa uwae tsi atang si ti, ani na ser riser u bom ribom ikyaen ti, ice wande-ti kutampwa-ni ā yaen fufa ama.

¹⁶Ayine u nda ti riyae ti ti u ru ka ri ira ti tinyang kyang kwer ice uten ti rwen skeb ni. Ikyaen ti, ati ku sha-ti ti ti u ndub ijwe ikyaen wande ti ariki nde be.

¹⁷Ikyaen ti, a bae uwae Kutsingken Rimam baa, “Asiti unde iki a ku sha ti awu u ndub ijwe, awu ā ndub ijwe uwae iken ti Itsekuru-ti nde.”

¹⁸Unde ti ande cwe ira-wu si unde ti Rimam ri ira ti tinyang risu wu, si-yi unde ti ku kyae nyang risu-wu ti ajwo-wu be.