Read kutep 2 Korinti 11 Bible Online

2 Korinti 11 - kutep bible

2 Korinti 11

¹Ame ku jwam ni, ni ye utob te ira ti kuskwab pang ti ame ku ri ne. Ni ye utob!

²Ame ku tsinn kitsinn risu-ni pangma ti Rimam ku nde ama. Ikyaen ti, ani pangma mbawandab ti nung-wu urom be u yer unju te nyáng unde ti awu ku sha ti awu u baen amam. Unde wu ti ame ku sha ti ani na baen si Kristi.

³Ame ku si anying utob baa, ko iki be, unde iki u sa ni kafe ti isim uwae fengo Rimam, u nda ni ya ure ti ani site ikyaen Kristi ta u putsa-ni awu ti utob kinjo cwucwo be, pangma ti awu ikentibi ru itsab u kyaefa Awa.

⁴Ame ku ri ira yine ikyaen ti, ame nung baa, ariki ku ba ri te ni ira risu Yesu ti txi te ayi ti ati ku ri risu-wu, ama ani ku kyangte yi ti ritsen ti ritsen ti ajwo ifaen. Ani ku paembe kusung iki ti txi te Kusung Rimam ti ani tu kucang. Ani ku fxen ira ti txi ti ira ti ani fxen uwog-ti ti kucang.

⁵Aba ande tiyang tiyang ti ku kunn ijwe-ba baa, ande ti atom, a skeb-ba ame te rurob be.

⁶Ko ti a kwen na-ba ame ira ti ri be, ame nung iken timambe. Ati tatso pu ti ani ira yine paenine, yi fengo ti tsotso ti kucang akwen.

⁷Kiye ti ame ri te ni Ira Tinyang na Rimam, ame mbe-m iken iki kujwo-ni be. Ame sa risu-m nae riben ikyaen ti m nda ni rurob, ti ame nde ahan, ame raen ira a.

⁸Ti kucang kiye ti ame ku nde wande kutampwa-ni, ayi si ande Rimam ti uten uwog iki ti ku pae m. Ayi si pangma ame na ku fxaembe iken kujwo kumbug ande Rimam iki ba ndeya ni.

⁹Isim ayine, kiye ti ame te ni som tetso ame jwam-m ani ko kobo kiye ti ame shanum te aser be, ikyaen ti, ameinja ti ru Makedoniya ba sha na m iken ti ame ku sha kiye wu. Pangma ti ame ku nde te ni ti kucang, uwe ike ama ame u nde-m ani rikaen be.

¹⁰Ame ku ben uben yi kubenti na Kristi ti te m ta tetso, ira ti ame ku ri uwae ijwe ti ndub yine baa, ame na mbe-m kobo uwog unde iki be, ko aka patag uwae uten ti Akaya, unde ta-wu ti u ri baa, ira-m yine na si rifen be.

¹¹Imi ti nde ne ame ri ahan? I si ikyaen ti ame ye ure te-m ani be a? Rimam nung pu wu baa, ame site ure te ni.

¹²Ame u nde iken ti ame ku nde ne ru fife yi uwe ikyaen ti aba ande ti rifen ti ta uwog-ni ne ā ndub-ba ijwe be. Ame ku sha-m ti ande bane na ri baa, aba te ti na pang atso uwae wande be.

¹³Ande bane si-ba atom ti kubenti be. Aba si atom ti rifen ti ku nde wande ti tikong. Aba ku kyang ikyin uwe ande baa, aba na si atom na Yesu Kristi.

¹⁴Ayine si-yi iken ti ku fur ayib uwog-m be, ikyaen ti, Shetann ti risu-wu ku kafe ijwe-wu pangma awu na si atom Rimam ti apupwen ti ku jaen ayib.

¹⁵Ikyaen yine, asiti apyi Shetann iki a kafe ijwe-ba u ku kyang ikyin-ba pangma aba na si apyi Rimam ti ku nde iken ti kubenti, ayi si-yi iken ti ku fur ayib be. Usir ti ricwunnkyi aba u ba tu kujwojang-ba pang ti wande ti aba nde.

¹⁶Cwucwo ame ku ri te ni, ni sa-ni ame pangma unde ti kuskwab be. Ko ani a ku tang baa, ame na si unde ti kuskwab ma, ni nda m kiye pang ti m ndub ijwe pangma unde ti kuskwab ku nde.

¹⁷Ira yine ti ame ku ri ti ijwe ti ndub ne, si-yi Itsekuru ti nda m kuko ti ame ku ri yi be. Ayi si ira ti kuskwab-m ti ame ku ri amam.

¹⁸Ariki ku ndub ijwe risu wande ti aba nde ti ajwo-ba. Ame u ndub ijwe ama.

¹⁹Ani ti risu-ni ben ayib nyang-ni nyang be ahoo! Ani u ye kang utob te kuskwab-m ayine.

²⁰Kubenti, ande ku nda ni kafe apyi-ba ama ani ku ye utob te ba. Ande ku nde ni rikaen u ku ci iken-ni tikong, u ku sae ru ni, u ku tae ni kujwo ti kutapaen, ani ku cwucwé amam.

²¹Ana-ti, ati nde tu-ti iken ti ribom ti ribom pangma ayine be. Ayine nda m rikwae ti wae. Ama asiti aba a ku ndub ijwe, ame u ndub ijwe ama. Ame u ri kyi ira ti kuskwab-m cwucwo.

²²Aba ku ri baa, aba na si Mbaibrane. Ame si urae Mbaibrane ama. Aba ku ri baa, aba na si anyisu Isirela. Ame si umbae Isirela ama. Aba ku ri baa, aba na si rishi Ibrahim. Ame si rishi Ibrahim ama.

²³Aba ku ri baa, aba na si anyisu afxen Kristi. Ame nde wande na umbae kufxen Kristi nyang skeb pu m aba. Ande-m! Ira-m ne si ana unde ti kijaen! Ame nde wande skeb pu m aba. A ye m sang pursuna atsepu yang-yi, skeb pu yi ti a ye ba sang. A byinn m kimbab skeb pu yi aba. Ame sang unju iticwu munnae munnae skeb pu m aba.

²⁴Atsepu itsong ande ndufu Mbayawuda byinn m kimbab ti ana-ba ka rijwe ita asu itsongnje.

²⁵Ande ti Roma ama byinn m ipug atsepu ita. Uwog iki ande kwab ti a jwunn wen m ti atxom. Kuyae-m si yib uwae uyinn tiyang atsepu ita. Kiye iki ame nae uwae uyinn ka usir ti rimunn.

²⁶Ame som-m imbyi riben be. Ame ku kyang ikyin ko kiye titini. Ame yen uyinn ti mumunn u ngwa rikaen atang. Ame ngwa rikaen ikyaen ande ti riyib ti ku byinn fxaembe usu ande fengo. Ame ngwa rikaen kujwo ande-m Mbayawuda fa ti ande ti si-ba Mbayawuda be meme. Ame ngwa rikaen uwae uka tiyang. Ame ngwa rikaen uwae kutur. Ame ngwa rikaen uwae ambyi uyinn. Ame ngwa rikaen uwog ande ti tikong ti ku ri baa, aba na ku putsa Kristi.

²⁷Ame kwab wande ti ti nde. Atsepu yang-yi ame cwag-m kicwag utitang be. Ame fxen ti rimenn ti unwaen. Kiye iki ame ku tu-m wuci ti uwog ti nae ko atupwa ti ame u pu si kyi ijwe be.

²⁸Ame u pwen tag-m iken ti tsitsi be, se ti ame u ri baa, ko usir titini ame ta uwae ira ti kab risu ambub na ande Rimam meme.

²⁹Asiti unde iki uwae-ba a bom-wu bom uwae fengo Rimam be, ayi nda ijwe-m namtur ama. Asiti unde iki a jwunnsi fengo Rimam, ame ku byir utob.

³⁰Ana-m, asiti ame u ndub ijwe, ame u ndub ijwe risu iken ti ku tatso baa, ame bom-m be.

³¹Kuko ā si ana Rimam ti si Itse na Itsekuru-ti Yesu Kristi tsi kunn ike ru fife yi uwe. Awu nung pu wu baa, ame na ku yer-m rifen be.

³²Kiye ti ame ta Damasiku, unde ti uwe ti ta imbyi Ukwe Aretas pu ande tsi kyi unju ufu ti ku sang yi uwae uten ikyaen ti aba na u ye m.

³³Ama ande Yesu ti atang sa m nae si uwae kicika u sa m tam si riye ibaen kupwe na uka wu.