Read kutep 2 Korinti 13 Bible Online

2 Korinti 13 - kutep bible

2 Korinti 13

¹Ayine fa ti atsepu ita ti ame ru ku ba yi uwog-ni. Pangma ti a bae uwae Kutsingken Rimam baa, asiti a ku sha riraen uwog unde iki, se ande a ka ifaen ko ita ti nung u cwe baa, ira yi na si kubenti titawe ani u cwe ye unde wu ti riraen.

²Kiye ti ame ru ba uwog-ni ti atsepu ifaen, ame ri ira te ariki ti nde ikentitibi u fwa ba kusen, fa te ande ti tsitsi meme. Tine ame ta rurwen te ni, amaa, ame u fwa kyi ni kusen cwucwo. Kiye ti ame a ru ba ame u nung-m ande ba te ayibrisi cwucwo be.

³Ayine u tatso ni paenine baa, Kristi na ku ri ira tso unju-m, pangma ti ani ku sha. Kristi ti risu-wu nde-wu namtur te ni be. Awu tso kuko-wu kutampwa-ni.

⁴Kubenti, kiye ti a kwer wu risu kutuku ti cice, awu num ijwe. Amaa tine, awu som ti unyang uwae kuko na Rimam. Ati ama, ikyaen ti ati ti Yesu ta tetso, ati bom-ti yi ijwe be pangma awu kiye ti a kwer wu. Amaa, uwae usom ti som-ti te ni, ati te Kristi u nwunn ti unyang uwae kuko na Rimam.

⁵Ni myae ijwe-ni ti ni nung baa, ko ani ku som usom-ni ti uwae kinjo bara. Ni pwen risu-ni rikwen. Ame tang baa, ani nungye pu ni ti Yesu Kristi ta uwae-ni, iki be ani nung-ni ayine be ahoo?

⁶Ame sa uwae tsi baa, ani u ba nungye baa, ati ti risu-ti na jwunnsi-ti uwae itimyae yine be.

⁷Ati ku jwam Rimam ti ani na nde-ni ikentitibi be. Ayi si-yi ikyaen ti ti na u tatso ande baa, ati na ci pu ti itimyae yi be. Iyee! Iken ti ati ku sha si ti ani na nde iken ti pang atang uwe Rimam, ko ti ati ti risu-ti nung pangma ati jwunnsi pu ti.

⁸Ikyaen ti, ati u ta tu-ti rika te ira ti kubenti be, se ti ati u ndeya yi ya amam.

⁹Kiye ti ani site kpakang fengo Rimam, ati ku tsen utob, ko ti a ri baa, ati ti risu-ti na bom-ti be. Ati ku jwam Rimam ti wu na nda ni ser ben tag uwae fengo-wu.

¹⁰Nee iken ti nde ame ku bae ira yine kiye ti ame ta fengo ti rwen te ni, ikyaen ti, ame ku sha-m ti m u ru ba fwan ni kibyag ko ame u byinn ni kimbab kiye ti ame a ru ba be. Ame ku sha ti m sa kuko ti Rimam nda m u ri bom ni ijwe, si-yi ti m shir ni kafe ti isim be.

¹¹Ira ti ricwunnkyi, ameinja-m, ni som-ni nyinyang. Ni kyaenyang usom ti som-ni. Ni kwab uwae ira ti ame ri te ni. Ni ndeya atso ti ni som usom-ni tetso uwae kujimshwur. Rimam, awu ti ku nda ti ure ti kujimshwur u te ni som te atso.

¹²Ni ye atso bur utob uwae itisaenkyag na Rimam.

¹³Meme ande Rimam ti ta ike ku kunnji ni ira atang.

¹⁴Itinyang na Itsekuru-ti Yesu Kristi, ti ure na Rimam, fa ti risu ti ren na Kusung ti Saen Kyag ā te ni som tetso.