Read kutep 2 Korinti 5 Bible Online

2 Korinti 5 - kutep bible

2 Korinti 5

¹Ati nung baa, asiti ijwe-ti ayine na u twenji pangma afug ti ku kyaen sisi. Ama ati a cwu, Rimam u nda ti kusog tishe ti si-yi unde iki ti kyae be, si Rimam ti kyae te ajwo-wu. Asog-ti yine u tsi kukunn.

²Uwae utense ike ati ku jwub u ku sae ayib kiye ti Rimam u nda ti ijwe tishe, ti si kusog ti Rimam kyae tsika ikyaen-ti apupwen akwen. Ati ku sha ti wu u burkyi ti te wu pangma kutupwa,

³ikyaen ti kiye ti a burkyi pu ba ati te wu, ande ā nung-ba ati ti ribam be.

⁴Ti ti ati ta ti uwae ijwe-ti ayine, ayi si pangma ti usu ti rurob naetsa ti risu u ku nda ti jwub ira. Ayi si-yi ti ati ku sha ti ti sa ijwe-ti yine jwunn tika be, amaa ati ku sha ti Rimam na sa ijwe ti ana apupwen fen kyi ayi ti si ana utense ne, ikyaen ti unyang ti tsi kukunn ā ru ba fen kyi iticwu ti ta uwae ijwe-ti tine.

⁵Rimam ti risu-wu ti sa tsi baa, iken ayine na u ba tu ti, ama awu nda pu wu ati Kusung-wu ti ku tso baa, meme iken ti awu yer unju baa, awu na u nda ti, ati u tu kang yi.

⁶Ikyaen yine ati tsi kunn ti ribom utob-ti ko kiye titini. Ati nung pu ti baa, kiye ti ati som usom uwae ijwe-ti na utense wune, ati ta riren te Itsekuru-ti.

⁷Ati ku kyang ikyi te uwae kinjo baa, awu na ta atang, si-yi ti ayib ti ati ku nung wu be.

⁸Ikyaen yine, ati ku bom utob. Ayi u nyang skeb uwog-ti ti ti u ya ijwe-ti yine ta u ru ka tu Itsekuru-ti uwae kuru-ti akwen.

⁹Ama, ko ti ati a ta utense ike ko apupwen akwen, ati ku kwab ti ti u nde iken ti nyang uwae-wu.

¹⁰Ikyaen ti, uwe ike meme-ti u tsi kang uwe Kristi. Awu u pwen ti rikwen. Unde titini u tu kujwojang-wu uwae wande ti tinyang ko wande titibi ti awu nde uwae utense ike.

¹¹Ayi si ikyaen ti ati site ikyenricwu Itsekuru-ti uwae utob-ti, né ati ku kwab ti ti u shir ande ba fengo Rimam. Rimam nungye pu wu iken ti ta utob-ti. Ame ku kab baa, uwae utob-ni, ani ama nungye utso ande ti ati si.

¹²Ira ti ame ku ri ne, si-yi ti ati na ku teb ijwe-ti uwog-ni be, ati ku kwab ti ti u nda ni riya ti ni na pam ipam ikyaen ira-ti. Ati ku sha ti ani na site ira ti ani u ri te ande ba ti ku ri ira te ni. Ana-ba, a ndub ijwe risu fengo ti unde ku kyae ijwe-wu, si-yi risu iken ti ta utob unde be.

¹³Asiti ani a ku kab baa, risu-ti na kafife, ira iki ta-yi be. Ayi si ikyaen kuko Rimam. Ama asiti ati a ku jwub-ti kijaen be, itinyang-yi si ikyaen-ni.

¹⁴Iken ti tsi ti uwae akwen si ure ti Kristi ye te ti. Ikyaen ti, ati ba nungye pu ti baa, awu kinjo-wu na cwu ricwu ikyaen ande meme. Ama kiye ti awu cwu, ande meme te wu cwu te atso. Ikyaen iticwu ana-wu meme ande na cwu ricwu yi ama.

¹⁵Awu cwu ti wu u nwangru ande meme, ikyaen ti ande ti som user ā som-ba ikyaen risu-ba amam cwucwo be, amaa, aba ā som usom-ba ikyaen na awu Itsekuru-ba, ikyaen ti, awu cwu a kunn nwunn wu uwae iticwu ikyaen-ba.

¹⁶Ikyaen na yine, ati ku sae-ti unde iki pangma ti ande ti utense ku sae cwucwo be. Ko ti kucang ati sae Yesu Kristi te ayib na ande ti utense, ati ku nde-ti ahan cwucwo be.

¹⁷Asiti unde a si ana Kristi, awu kafe pu wu unde tishe. Iken titikyi wur ru pu yi, itishe ba pu yi.

¹⁸Iken yine meme ru uwog Rimam ba, awu ti sa ti ande ti ku ta rika te wu kafe ande ti ure-wu ikyaen wande na Kristi, u nda ti wande ti ti pu ande ti tsitsi ba uwog-wu.

¹⁹Ati ku ri te ba baa, yi uwae wande na Kristi, Rimam na nde fengo ti ande na kafe ande ti ure-wu. Awu ku pwen-wu ande rikwen kujwo wande-ba ti aba nde uwe-wu cwucwo be. Ama awu sa ira wande-wu ayine na ti kujwo baa, ati na kyang ku ri te ande.

²⁰Ikyaen na yine ati si ande ti tsi risu unju Yesu Kristi u ku ri ira te ni. Ayi si Rimam ti ku jwam ni ti ajwo-wu ruye yi uwae wande-ti. Ati ku jwam ni yi rinyi Yesu Kristi baa, ni ba kyaenyang usom-ni te Rimam.

²¹Ayi si ikyaen-ti ti Rimam sa Yesu Kristi tsi pangma awu na si unde ti nde ikentitibi, ko ti awu ndeji-wu ikentitibi be, ikyaen ti, yi uwae wande-wu, ati u si ande ti kubenti uwe Rimam.