Read kutep 2 Korinti 6 Bible Online

2 Korinti 6 - kutep bible

2 Korinti 6

¹Ikyaen yine, ati ti si ande ti ku nde wande te Rimam tetso, ati ku jwam ni baa, ti ani tu pu ni itinyang Rimam, ni sae ru-ni ayi baa, ayi na si ti ukaen uwog-ni be.

²Rimam ti risu-wu ri baa, “Uwae kiye ti pang atang ame fxen ira ti jwub-ni. Uwae usir itinwangru ame ru ba ndeya ni.” Ame ku ri te ni baa, kiye ti pang atang wu si tine. Usir itinwangru wu si yaka ne.

³Ati ku nde-ti iken ti u nda unde kyen kufxen uwae fengo Rimam be, ikyaen ti ande ā nung-ba ati te riraen u ye ira wande-ti ri ndembeb be.

⁴Ana-ti, ati ku kwab yi fengo meme ku tatso ande baa, ati na si apyi Rimam. Ati ku kwab yi fengo na utob ti ye ti ati tsi ku ye uwae rikaen ti tsotso.

⁵A byinn ti, u ye ti sang pursuna. Ande ti rinae tebshi ti. A nda ti wande ti skeb risu-ti. Ati skang ayib kucwag, rimenn nde ti.

⁶Ati ku tatso ande yi fengo na usom ti som-ti ti saen kyag, u ku nde iken-ti te itinungye, ku ye utob te ande, ku nde itinyang na ande, uwae Kusung ti Saen Kyag, ama te ure ti kubenti.

⁷Ira ti ati kyang ku ri si kubenti, ama kuko na Rimam te ti ku nde wande tetso. Wande ti pang atang si isu rika-ti ti ati ye su kujwo rici ti kujwo ife ikyaen rika ti ta.

⁸Ati ku tu kuko uwog ande u ku tu ira ti unghae ama. Ande iki ku txun ti asu, ariki ku teb ti. Ande sa ti tsi pangma ande ti ku kyaefa ande, ama ati ku ri kubenti.

⁹Ande sae ti pangma ati na si-ti ande be, amaa, ande meme nung ti. Ati ta unju iticwu ko kiye titini, ama ati tsi user ti atang. Ko ti a ku byinn ti kimbab, a wen fob-ba ati be.

¹⁰Ko ti ati ku byir utob, ati ku tsen utob ku kam ashwu ko kiye titini. Ati sae ayib pangma ande ti rikaen, ama ati nda ande yang-ba tu rifunn. Ayi pangma ati na site-ti iken kujwo be, ama ati, uwae kubenti, ati munn ti rifunn.

¹¹Ani arwan-m ti ta Korinti, ati tam-ti ani ira iki be. Ati ku ri te ni iken ti ta utob-ti paenine.

¹²Ati kyangte pu ti ani te utob kinjo, se ani ti kyangte-ni ati te utob kinjo be.

¹³Tine ame ku ri ira te ni pangma ani na si anyisu-m. Ame ku jwam ni, ni kafe uwe tag ti pangma ti ati nde te ni.

¹⁴Ni ren-ni risu te ande ti kufub uwae wande ti ti nde be. Ira tikong ti ira ti kubenti u som usom te atso a? Uwog ti saen kyag ti kufub u som usom te atso a.

¹⁵Imi ti ren Kristi ti Shetann? Imi ti unde ti ru-wu uwae kinjo be site ti awu u nde te unde ti ru uwae kinjo?

¹⁶Imi ti ren kusog Rimam te kufug apxin? Ati ande Rimam si kusog Rimam, awu Rimam ti si Rimam ti site unyang. Pangma ti awu ri baa, “Ame u som usom te ba; ame u kyang ikyin kutampwa-ba. Ame u si Rimam-ba; aba ama u si ande-m.”

¹⁷Ikyaen yine Itsekuru-ti Rimam ri baa, “Ni nwaen ruye risu-ni kutampwa ande bane. Ni ya ba ta! Ni pu ajwo ye-ni iken ti ku txi iyib be, titawe ame u kyangte ni uwog-m.

¹⁸Ame u si Itse-ni, ani ama u si anyisu-m ti arom te ti anda. Ayine si ira Itsekuru-ni Rimam ti kuko ti ri.”