Read kutep Galatiya 6 Bible Online

Galatiya 6 - kutep bible

Galatiya 6

¹Ameinja, asiti ani a nung ti unde iki nde ikentitibi, ani ande ti site Kusung Rimam ni shir wu kafe ru ba ti fengo Rimam. Ni nde yi sku sku uwae kujim. Ni nung ijwe-ni ama ikyaen ti ani ti risu-ni ā pu-ni kutxae iki ama be.

²Ni su ya atso usu na rikaen ti ani ku ngwa. Yi fengo yine ani u kumunn icwe Kristi.

³Asiti unde iki a ku kab baa, awu na si unde ti kuko, amaa awu a si-wu iken iki be, awu ku kyaefa risu-wu amam.

⁴Unde titini ā myae ajwo-wu, asiti wande-wu a nyang pu yi, awu u nde tu ti wu pam ipam risu-yi. Awu ā sa risu-wu myae te-wu unde iki be.

⁵Ikyaen ti, unde titini u su kang isu-wu ti risu-wu.

⁶Ande ti a ku kwen na ba ira Rimam ā ndeya unde ti ku kwen na ba ti iken ti tinyang ti aba site.

⁷Ni kyaefa-ni risu-ni be. Ayi u nde tu-yi ti unde u kyaefa Rimam be. Iken titini ti unde a tso riben, si ayi ti awu u bunn.

⁸Asiti awu a tso uwae risaen na ayib ti taen na ijwe, awu u bunn iticwu. Asiti awu a tso uwae risaen na Kusung ti saen kyag, uwae na Kusung wu awu u bunn unyang ti tsi kukunn.

⁹Ati ā num-ti num uwae wande ti tinyang ti ti nde be. Ikyaen ti, asiti ati a num-ti num be, kiye ru ku ba ti ati u bunn itinyang na wande-ti.

¹⁰Ikyaen yine, ko kiye titini ti ati a tu riyae, ti ndeya ande meme. Ti nde siskeb ru ba uwog ameinja-ti ti ambakaya-ti ande na Yesu.

¹¹Ame ku bae ira yine ti ajwo-m. Ni sae ti ame ku bae yi ti rikem ti rikem.

¹²Aba ande ti ku ri baa, ani na tsen kang kutxin né, aba ku sha nyang ti ande na nung ba baa, a na si ande ti tinyang. A ku kyen ricwu baa, ande ti ise na u nde ba rikaen ikyaen ira iticwu na Yesu Kristi risu kutuku ti cice.

¹³Ko ande bane ti tsi ti ribom risu kutxin ti tsen, aba ti risu-ba ku ye su-ba Icwe Rimam be. Iken ti nde ne aba ku sha ti ni na tsen kutxin si ikyaen ti a na u ndub ijwe baa, ani na nae risu riben te ba na u putsa icwe-ba.

¹⁴Ana-m, ame u ndub-m ijwe risu iken iki be, ame u pam ipam risu iken kinjo amam, ayi si iticwu na Itsekuru-ti Yesu Kristi risu kutuku ti cice. Yi fengo na iticwu-wu ayine, iken na utense kafe pu yi iken ti cwucwu uwog-m. Ame si pangma iken ti cwucwu uwog-yi ama! Ayi ku taen-yi ame ayib cwucwo be.

¹⁵Ko unde a tsen kutxin, ko awu a tsen-wu be, ayi si-yi ira iki be. Iken ti skeb si ti Rimam a kyae unde ti tishe.

¹⁶Ame ku jwam baa, kujimshwur ti ayibrisi na Rimam ā som te ande ti kyang ikyin yi fengo na ira-m ayine. Aba ti si ande ti Isirela ti kubenti.

¹⁷Ira-m ti ricwunnkyi, tsikunn ike ru fe yi uwe, unde iki ā nda-wu ame rikaen cwucwo be, ikyaen ti ayi amimyim ribang ti ta rimenn-m ku tso baa, ame na si upyi na Rimam.

¹⁸Itinyang na Itsekuru-ti Yesu Kristi ā te ni som te atso, ameinja. Ayi ā si ahan.