Read kutep Afisa 3 Bible Online

Afisa 3 - kutep bible

Afisa 3

¹Ikyaen yine, ame Bulus, ti Yesu Kristi ye m kwar uti ikyaen-ni ande ti si-ni Mbayawuda be, ame ku jwam Rimam risu-ni.

²Ame tang baa, ani fxen pu ni ira risu fengo ti Rimam tsab m ti m na sa ira na rinyangwae-wu na tsag te ni.

³Awu mbubta tag ira-wu ti kitam uwog-m, pangma ti ame bae pu m ira pang risu-yi kucang.

⁴Asiti ani a sae ira ti ame bae ne ani u nung baa, ame na nungye pu me umbyi ira ti kitam na Kristi wune.

⁵Kute a tsag te-ba ande ira yi be, amaa tine uwae wande na Kusung Rimam, a mbubta yi uwe ande ti awu tsab ba ti a na si ande ti atom-wu ti ande ti ku ya iskin ira-wu.

⁶Ira yi ti ame ri ne si ti ani ande ti si-ni Mbayawuda be ku ci rifunn na Itse-ti Rimam ama, pangma ti ati Mbayawuda ci. Ani te ti ren atso, pangma akyab na rimenn ijwe kinjo. Ani ama site kutunn-ni uwae iken ti Rimam yer unju baa, ati na u tu yi uwog Yesu Kristi, ira yi nee ani fxen uwae ira tinyang na Rimam.

⁷I si ira tinyang-wu Rimam nee awu tsab me ti m na si umbae afxen-wu ti ku sa ira yi ri te ande. Awu nda m rinyangwae na wande yine yi fengo na wande ti kuko ti awu nde uwae utob-m.

⁸Ko ti ame fa-m ukwab ti a u sa me myae te upyi na Rimam iki be, Rimam nung m ti ayibrisi u tom me ru yi uwog-ni ande ti si-ni Mbayawuda be, ti ame na tsag te ni ira tinyang risu Kristi awu ti si rifunn ti ititsikunn-yi ta-yi be.

⁹Cwucwo ti ame na nda ande meme nungye kumyae Rimam ti awu myae tsi kute, ira yi nee ati ande nung tu-ti be, awu Rimam amam ti nung. Awu Rimam ti mam meme iken patag, sa kumyae-wu ayi tam uwae kiye ti wur ruru,

¹⁰ikyaen ti, uwae wande na kumbub ande ti putsa Yesu Kristi tine, awu na u tatso yi paenine uwog ande ti kuko uwae ande ti atom ti apupwen ti ande ti uwe na asung ti ku kyang apupwen. Yi fengo yine aba ama u nung ben-ayib na Rimam ti awu site yi ti tsotso.

¹¹Iken ti Rimam nde yine, si iken ti awu sa tsi ti kute baa, awu na u nde. Awu ru ba nde yi ara uwae wande na Itsekuru-ti Yesu Kristi.

¹²Ati ande ti te wu som tetso u ru kubenti uwog-wu, ati site fengo ti ati u ru ba uwe na Rimam ti ribom utob; ati u kyen-ti ikyenricwu be.

¹³Ikyaen na yine ame ku jwam ni baa, ni yer-ni anying utob ikyaen rikaen ti ame ku ngwa risu-ni be. Ayi si iken ti u nda ni tu kuko atang uwe ike.

¹⁴Ikyaen yine, ame ku jwunn ikyig uwe Itse-ti Rimam,

¹⁵awu ti meme anyisu-wu ti ta apupwen ti aba ti ta riben tu rinyi-ba uwog-wu.

¹⁶Ame ku jwam wu baa, ti awu site kuko ti ititsikunn-yi ta-yi be, awu ā nda ni kuko yi fengo na Kusung-wu ti ku nde wande uwae utob-ni,

¹⁷ikyaen ti, Yesu Kristi ā ru ba som usom-wu uwae utob-ni yi fengo na uwae kinjo ti ani ru uwog-wu. Ipab-ni ā si fe yi ure Rimam. Ure-wu ā nda ni tsi ting ting.

¹⁸Ayi a si ahan itawe ani te meme ande Rimam ti tsitsi u nde tu ti ni nung ure Kristi. Ani u nung riyaen-yi, ti riwae-yi, ti rikob-yi, ti rijang-yi.

¹⁹Rimam ā nda ni ti ni ba nungye ure na Yesu Kristi wune, ko ti ande nungye tu-ba wu be, ikyaen ti iken ti tinyang meme ti ta uwog Rimam na u ba munn utob-ni.

²⁰Kuko ā si ana-wu Rimam. Yi fengo na kuko ti ku nde wande uwae utob-ti, awu nde tu pu wu wande iki uwog-ti ti skeb itijwam-ti ti ira ti kab-ti.

²¹Kuko ā si ana-wu Rimam uwae kumbub ande ti putsa wu ti uwae Yesu Kristi, tsikunn ike ru fe yi uwe ititsikunn-yi ta-yi be. Ayi ā si ahan.