Read kutep Filipi 2 Bible Online

Filipi 2 - kutep bible

Filipi 2

¹Asiti ani si ana Kristi, ani ku tu kpakang utob atang, ure ti awu ye te ni ku nda ni utob ti nae riben, ani ren risu tetso uwae Kusung, ani site-ni ure ti ayibrisi tetso.

²Ti iken yi si ahan, ni kumunn utob ti tsen-m. Ni cwe ira atso, utob-ni ā si kinjo, ira ti kab-ni ā si kinjo.

³Ni si-ni ande ti ku ye ure te risu-ni skeb ariki be. Ni ndub-ni ijwe be. Yi risu ti nae riben, ni sa ariki rob skeb risu-ni. Uwae-ni, unde titini ā nae risu riben u sa risu-wu pangma ande ti tsitsi na skeb pu ba awu.

⁴Ni nde-ni iken ti u ndeya nyang risu-ni amam be. Amaa, ni sa uwae tsi risu iken ti u ndeya ande ti tsitsi ama.

⁵Ni kwab ti ni site itso ira ti kab kutampwa-ni pangma ti Yesu Kristi site yi:

⁶Ana-wu, ko ti awu te Rimam si iken kinjo rikaen, awu cwe-wu ti wu myae risu-wu te Rimam be.

⁷Iyee, awu sae ru risu-wu u kafe upyi. A nda wu ijwe unde u mbae wu pangma ti a mbae ti ama.

⁸Awu sa risu-wu nae riben ka sang ti iticwu, iticwu ti pangma ana unde ti riyib risu kutuku ti cice.

⁹Ikyaen ti awu nae risu riben ne ahan, Rimam ye nwunn wu ritsen, u nda wu kuko, u nda wu rinyi ti skeb rinyi meme.

¹⁰Ikyaen ti, yi rinyi na Yesu, meme ande ti ta apupwen, ti aba ti ta riben ike, ti aba ti ta uwae riben, aba ā jwunn ikyig.

¹¹Ama meme ujaen unju ā ri tso baa, Yesu Kristi na si Itsekuru ikyaen rurob na Rimam Itse.

¹²Arwan-m ti utob-m, ti ani putsa pu ni kusen ti fwa-m kiye ti ame te ni ta tetso, tine ama ti ame te ni ta-m tetso be, ni kwab ti ni ru yi uwe ti ni mam tag wande na itinwangru-ni ti ijwe ti fwer ti ikyenricwu uwe Rimam.

¹³Ikyaen ti, Rimam ti risu-wu ku nde wande uwae utob-ni u ku nda ni sha iken ti ku nyang uwae-wu u ku nda ni kpakang ijwe ti ni na nde yi ama.

¹⁴Uwae iken ti ani ku nde meme, ni nde-ni ayi ti unju ti pwen ti ishaen ti shaen be,

¹⁵ikyaen ti ni si ande ti sisaen, ti ande ti si-ni te riraen be. Ni si anyisu na Rimam ti kubenti, kutampwa ande titibi na utense wune ti ndembeb pu ba. Ni si pangma atitaen ti apupwen ti ku jaen wurwur uwae kufub utense wune,

¹⁶u ku ri Ira Rimam ti ku nda unyang u ku ye su yi ti ajwo ifaen. Asiti ani a ku nde ahan, ame u pam ipam usir ti Kristi a kafe ba, ikyaen ti itikwab-m ti ame kwab, ti wande-m ti ame nde uwog-ni ā si-yi ukaen be.

¹⁷Iki be a u wen m pangma ti a ku yer wen iken na Rimam. Asiti aba a nde ahan u sa anying-m yaen si risu kuta na uwae kinjo-ni, ame ku tsen utob u ku kam ashwu te ni tetso.

¹⁸Ayi si ahan ama, ni kam ashwu ti ni tsen utob te m tetso.

¹⁹Itsekuru-ti Yesu a cwe ira, ame u tsi-m tsi be u tom Timoti ba uwog-ni. Ame ku myae baa, asiti awu a kafe ru ba, awu u ri bom me ijwe ti ira risu usom ti som-ni.

²⁰Unde iki ta fa-wu Timoti ti site ira ti kab risu-ni ti tinyang pangma awu be.

²¹Itaen ti tsitsi meme ku tang kum ira risu iken ti ana-ba ti si-yi ana Yesu Kristi be.

²²Ani nung pu ni awu. Awu site utob ti tinyang u te m nde wande pangma itse ti umbae tetso u ku ri te ande ira tinyang.

²³Ame ku tang baa, ame na u tom wu ru ba tu ni isim ti ame a nung pu m iken ti u tu m uwae pursuna ike.

²⁴Ame sa ijwe-m konje uwog Itsekuru-ti baa, ame ama u tsi m tsi be u ba nung ayib-ni.

²⁵Ame myae baa, ame na u tom kang na ni inja-m Eparfoditu kafe ba na ni. Awu si urwan wande-m u te m ta rika te atso uwae rika Shetann. Awu si pu wu unde ti atom-ni ti kubenti. Awu ndeya pu wu ame uwae rikaen-m si-yi ti ti ri be.

²⁶Ayi tsi wu ti uwae tine ti wu na nung ayib-ni meme. I ndembeb wu utob ti awu fxen baa, ani na fxen ira kicaeb-wu.

²⁷Kubenti, awu pu kicaeb kyang ku yaen ti unju ti cwu. Amaa Rimam nung risi-wu u nung risi-m ama, bara be, ame na u tsikunn-m ti utob ti ndembeb be.

²⁸Né iken ti nde ame ku fifae ti m tom wu ba tu ni, ikyaen ti ayi ā nda ni utob ti tsen kiye ti ani a nung ayib-wu cwucwo. Ayi u ko si m utob-m ti tsi ritsen ikyaen wu ama.

²⁹Ame ku jwam ni baa, ni kyangte wu ti ajwo ifaen ikyaen Itsekuru ti ashwu ti kam ti utob ti tsen. Utso ande bane, ni nda ba kuko.

³⁰Ikyaen ti, awu cwu ku fife ikyaen wande na Kristi u kyen-wu iticwu be ikyaen iken ti ani ú nde na m, ti nee ani nde tu-ni be.