Read kutep Filipi 3 Bible Online

Filipi 3 - kutep bible

Filipi 3

¹Ti ricwunnkyi, ameinja, ame ku ri te ni baa, ni tsen utob ikyaen ti ani si ana Itsekuru-ti. Ame ku bae shem iken ti ame bae na pu me ani kucang. Ayine caeb-yi ame be; ayi u byangkyi titibi uwog-ni ama.

²Ni tsi ti ujwin ti ni nungye aba ande titibi ti ku yer ru kupwa rimenn, aba ande titibi ti ku ri baa, ati na tsen kang ande kutxin. Aba si ipxu ti anyi!

³Ati ti si ande ti tsen kutxin ti kubenti, ati ande ti ku fen Rimam yi fengo na Kusung-wu. Ati ku ndub ijwe yi Yesu Kristi u sa uwae tsi-ti risu iken na rimenn ijwe be.

⁴A baa, itso iken na ijwe yine na si iken iki ti tinyang, ame ú sa ijwe-m konje pu m atang ama, ikyaen ti, iken na ijwe ti aba sa ijwe-ba konje atang ne, ame nde yi skeb pu m aba meme.

⁵Ayi a si ana kutxin ti tsen, a tsen na m kutxin kiye ti ame site usir itsongta. Ame si urae Isirela yi utso Benjamin. Ame si anying na Mbaibrane ti kubenti. Ayi a si ana iken ti kwen na Icwe, ame ta kumbub na Farisi, ti skeb tag.

⁶Ayi a si ira na itikwab uwae ira Rimam, ame kwab si-yi ti ti ri be, u ku nde ande na Yesu rikaen. Ayi a si icwe ti putsa, ame ri baa, iken ti m kyen kufxen atang ta-yi be.

⁷Amaa, meme iken yine ti si iken ti tinyang ti ame nde, ame sa yi tsi baa, ayi na si iken ti ukaen uwog-m ikyaen Kristi.

⁸Ayi si-yi iken yine amam be. Iken meme pab ti ame site yi, ame pwen yi baa, ayi na si iken ti ukaen ikyaen ti, ayi nyang skeb tag ti m nung Yesu Kristi Itsekuru-m. Ame ya iken meme ta ikyaen ti m tu Yesu. Iken na ijwe yine, ame sa yi tsi pangma iken ti isor ikyaen ti ame na u tu Kristi,

⁹u som te wu. Ayi si-yi ikyaen itikwab-m uwae icwe ti ye su ti ame si unde ti kubenti uwe Rimam be. Ayi si ikyaen ti ame ru uwae kinjo uwog Yesu Kristi. Iken ti nde nee Rimam sa m tsi baa, ame na si unde ti kubenti si ikyaen uwae kinjo-m uwog Yesu Kristi amam.

¹⁰Iken kinjo ti ame ku sha si ti m nung Kristi, fa ti kuko ti ana-wu ti nda wu nwunn uwae kuskab ti unyang. Ame ku sha ti m tu kutunn-m uwae rikaen ti awu ngwa. Ame ku sha ti m putsa afxen-wu yi iticwu-wu,

¹¹ikyaen ti ko ayi a si rimang, ame na u nwunn kang uwae iticwu.

¹²Ame ku ri-m baa, ame na tu mam pu m iken yine be. Ame shanum-m te riraen be. Iyee! Ame ku kwab ti m sa kujwojang na inyae ti ter yine kafe ana-m pangma ti Yesu, Unde ti Rimam Tsab Tsi, sa m kafe pu wu ana-wu.

¹³Ameinja-m ti ambakaya, ame nung pu m baa, ame na tu-m iken yi ti ame sa tsi uwe-m ne khika be. Amaa, iken kinjo ti ame sa utob tsi atang tine si ti ame u munnji iken ti yafe isim u sa ayib tsi iken ti ku ba uwe.

¹⁴Ame ku kwab ku ru yi uwe uwe ti m ka uwog ti ame pu ayib tsi atang tine, ti m na tu kujwojang-m. Ayi si kujwojang ti Rimam kunn me baa, awu na u nda m apupwen akwen.

¹⁵Ati itaen ti kwen ben pu ti yi fengo Kristi, ayi nyang ti ti sa utob tsi ahan ama. Asiti ariki uwae-ni a ku kab ira txi ti ayine, Rimam u mbubta na ni ti ni u nungye.

¹⁶Iken ti skeb si ti ti putsa iken ti ati ku putsa ne ru fife yi uwe.

¹⁷Ameinja-m ti ambakaya, ame ku jwam baa, ni putsa kufxen-m, ti ana itaen ti ku som usom yi fengo ti ana-ti,

¹⁸ikyaen ti, ariki yang-ba akwen ta kutampwa-ni ti ame ri te pu m ani ira risu-ba kute. Ame ku shem yi shem na ni ti aten ayib tine baa, aba ku som usom-ba pangma aba na si ande ti rika iticwu Kristi risu kutuku ti ta cice.

¹⁹A u twenji ba. Rishwu-ba ti si Rimam-ba. Aba ku ndub ijwe uwae iken ti ku wae rukwae ti aba ku nde. Aba ku tang kum ira risu iken ti utense ike amam.

²⁰Ana-ti, ati si ande ti uten ti apupwen. Ati som ku sae usir ti unde ti nwangru-ti, awu Itsekuru-ti Yesu Kristi, u si apupwen ba tu ti.

²¹Kiye ti awu a ru ba, awu u sa ijwe-ti ti si ti ukaen kafe pangma ana wu ti nyang siskeb meme. Awu u nde wande ne ti kuko ti awu site yi nee iken meme ku nae risu riben te wu.