Read kutep Kolosi 1 Bible Online

Kolosi 1 - kutep bible

Kolosi 1

¹Kutsingken wune ru uwog-m Bulus, ame ti Rimam cwe u tsab baa, ame na si unde ti atom na Yesu Kristi, ti uwog Timoti, inja-ti.

²Ati bae ira yine ku na ni ande Rimam ti ta uten ti Kolosi, ani ande ti tsikunn ti kubenti u si ameinja-ti yi fengo Kristi. Rimam Itse-ti ā sae ti te ayibrisi, u nda ni kujimshwur.

³Ko kiye titini ati ku jwam Rimam risu-ni, u ku nde fxaefa na Itse na Itsekuru-ti Yesu Kristi,

⁴ikyaen ti, ati fxen baa, ani na tsi kukunn ti uwae kinjo uwog Yesu Kristi ku ru ru yi uwe u site ure uwog ande na Rimam meme.

⁵Ani ku nde iken yine ikyaen ti, ani sa uwae tsi pu ni risu kujwojang ti Rimam sa tsi ka ni uwae kuru wu apupwen. Ayi iken yine, ani fxen pu ni ira risu-yi kiye ti a tsag ira ti kubenti yine te ni, ti si Ira Tinyang na Yesu Kristi.

⁶Ira Yesu ne ru ba uwog-ni u ku ru ko aka uwae utense u ku sa itinyang ku shag kyi fe uwog meme, pangma ti ayi nde kutampwa-ni ama, sa ti usir ti kucang nee ani fxen ira risu rinyangwae na Rimam u ru ba nungye baa, ayi na si kubenti.

⁷Kiye wu, ayi si Epafira ti tawe tatso ni Ira Tinyang yine. Awu si unde ti ure-ti u te ti ku nde wande na Yesu Kristi tetso. Awu ti ku nde wande kutunn unju-ti uwog-ni akwen.

⁸Awu ti tsag te ti ira risu ure ti ani site, ayi ure ti Kusung Rimam ye nwunn uwae-ni.

⁹Né iken ti nde, ti kiye ti ati fxen ira risu-ni, ati tsikunn ti ku jwam Rimam ikyaen-ni baa, awu na u kumunn ni te itinungye iken ti awu ku sha, u nda ni ben-ayib, ti iyii ti si ana kusung

¹⁰ikyaen ti usom ti som-ni uwe ande ā sa kuko na Itsekuru-ti, ti ani na ā nda wu utob ti tsen uwae meme iken ti ani ku nde. Ani u nde wande ti tinyang ti tsotso u nung Rimam ko ku fufa ru fife yi uwe uwe.

¹¹Ati ku jwam baa, ani na u tu kpakang ru ye uwae kuko Rimam ti ko skeb tag, ikyaen ti ni tsi ting ting u ye utob uwae ira titibi ti ku tu ni, ama ti ni tsen utob

¹²u ku nde fxaefa na Itsekuru-ti Rimam. Awu ti nda ni ani pang pu ni ti ni te anyisu-wu ti tsitsi u mbe rifunn ti ana-wu tetso u ku som usom te ba uwog ti paenine.

¹³Ikyaen ti, awu sa ti ru ye pu wu uwae kufub na kujwokwe Shetann u pu ti ru ba sang kujwokwe Umbae-wu ti riyaen utob-wu.

¹⁴Ayi si ikyaen na Umbae-wu nee a saen ti ta u yata na ti ikentitibi-ti.

¹⁵Ande ku nung-ba Rimam te ayib be, a ku nung wu rimenn Kristi. Awu Kristi ti site kuko na umbae ti kucang uwae kununn u skeb tag pu wu meme iken ti a mam yi mam uwae utense.

¹⁶Ikyaen ti, ayi si uwae kujwo wande Kristi ti Rimam mam iken ti ta apupwen ti iken ti ta riben, ayi iken ti a ku sae yi sae ti ayib, ti ayi ti a ku sae-ba yi te ayib be, fa ti atxomkwe, ti kujwokwe, ti abikwe, ti ande ti site kpakang meme. Meme iken ti ta apupwen ti riben, Rimam mam yi ru uwog Yesu Kristi u kyae yi ikyaen-wu.

¹⁷Meme iken patag, a kyae yi ayib Kristi. Ayi si kuko ti ana-wu ti ku nda iken meme ren tetso u kyang ti mbwe-yi.

¹⁸Uwae ande na Rimam, Kristi ti si risu, aba si rimenn. I si awu ti cangtsi kumbub ande Rimam. Awu ti tawe nwunn uwae iticwu. Né iken ti nde awu ta uwe iken meme patag.

¹⁹Ayi nyang uwae Rimam ti awu ti rimunn-wu na u tso ijwe-wu ruye uwog Kristi.

²⁰Ayi si uwog Kristi ti Rimam myae baa, awu na u shir ren iken meme kafe ru ba ti uwog wu, iken ti ta riben ti iken ti ta apupwen meme. Yi uwog anying Kristi ti yaen mbub kiye ti a kwer wu risu kutuku ti cice, Rimam nda iken meme kafe ba uwog-wu. Ayi ku ta-yi rika te-wu cwucwo be.

²¹Ani ama, kucang ani som rurwen te Rimam u si ande ti rika ikyaen ikentitibi ti ani ku kab u ku nde.

²²Amaa tine awu sa ni ren ure ti ijwe-wu yi fengo na iticwu na Umbae-wu Yesu Kristi. Awu nde ahan ikyaen ti kiye ti ani u ku tsi uwe wu, ani u si ande ti sisaen u si-ni ti riraen be. Unde iki u tu-wu iken iki titibi ti awu u ri risu-ni be.

²³Ayine u nde-yi be, se iken ti ani a tsi kunn ku ru uwae kinjo uwog Yesu Kristi ru ku fife yi uwe uwe. Ni tsi ting ting. Ni kab-ni uwae be. Ni sa uwae tsi risu iken ti ani fxen uwae ira tinyang na Yesu. I si ira tinyang wune ti a sa tsag te ande meme uwae utense, u si sí ira tinyang wune ti ame Bulus kafe pu m upyi-wu.

²⁴Rikaen ti ame ku ngwa tine ikyaen-ni ku nda m utob ti tsen, ikyaen ti, ti ame ama ku ngwa rikaen ti ijwe-m awune, ame ngwa ku tag rikaen ana Kristi ti awu ngwa ikyaen kumbub ande-wu, aba ti si ijwe-wu.

²⁵Ame kafe pu m upyi na kumbub ande Rimam. Awu ti sa wande yine na m kujwo ti m na ndeya ba. Wande yine si ti m na sa ira ti ana-wu tsag tag te ande meme.

²⁶Ira yine, ti kute a sa yi tam ande tam. Tine Rimam mbubta pu wu ayi uwe ande ti ana-wu.

²⁷Rimam cwe u tatso ande-wu ira ti kitam wune ti si rifunn ti nyang skeb tag iken patag. Ayi si ira ti tinyang uwog ande ti utense meme. Ira yi si ti Yesu Kristi ku som usom-wu uwae utob-ni u ku nda ni uwae tsi baa, usir iki ani na te wu u som tetso yi riyinn-wu apupwen akwen.

²⁸Ayi si ira Kristi ti ati ku ri te ande u ku fwa ba kusen u ku kwen na ba yi fengo na meme ira ti nung ti Rimam nda ti. Iken ti ati ku sha si ti unde titini uwae-ba ā si unde ti ko ben pu wu yi uwae usom ti som-wu te Yesu Kristi.

²⁹Né iken ti nde ame sa kpakang ti Kristi nda m u ku kwab ti m na u nde tag wande-wu yine.