Read kutep Kolosi 2 Bible Online

Kolosi 2 - kutep bible

Kolosi 2

¹Ame ku sha ti ni na nung baa, ame ku kwab timambe ikyaen-ni ti ikyaen aba ti ta Lodikeya. Ame ku kwab ama ikyaen meme ande ti nung ji-ba uwe-m khika be.

²Ame ku sha ti a na tu kpakang utob u ren ure tetso u site rifunn na utob ti nae riben, ayi rifunn ti ruye uwae ira ti nung ti kubenti. Yi fengo yine aba u nung Kristi, awu ti si ira ti kitam na Rimam.

³Yi uwog-wu, a pu rifunn na ben-ayib, ti itinungye tam atang.

⁴Ame ku ri ira yine ikyaen ti unde iki ā kyaefa-wu ani ti rifen be, ko ira-wu ayi a nyang ti fxen timambe.

⁵Ikyaen ti, ko ti ame ta te-m ani atang uwae rimenn ijwe be, utob-m ta te ni atang. Ame ku tsen utob ti m nung baa, ani na tsi ting ting uwae fengo Rimam tetso u ku ru uwae kinjo uwog Kristi ti ribom-ni ti atang.

⁶Pangma ti ani kyangte Yesu Kristi baa, awu na si Itsekuru-ni, ni kyang ikyi-ni te wu ru fife yi uwe.

⁷Ni sim ipab-ni yi ijwe-wu ti ni mbye usom ti som-ni somtsa rimenn-wu. Tiri uwae kinjo-ni ā kpag fufa yi uwae ira ti kubenti ti a kwen na ni, ama ani u tsikunn ti kufxaefa ti tso.

⁸Ni nung nyinyang be, ariki u shir ni sang uwae upyi ira ti kab na ande ti ben ayib ti ku kyaefa ande, ti si ira ti kab utso ande ti putsa ajwo wande asung titibi na utense. Ayi ru-yi uwog Kristi ba be.

⁹Ikyaen ti, ayi si uwae Yesu Kristi ti Rimam ti risu-wu ku som si atang uwae utense ike.

¹⁰Ama uwog na-wu, ani kumunn, u shanum-ni iken iki be. Awu ti ta risu akwe ti asung ti site kuko.

¹¹Yi fengo na Kristi ama a tsen na ni kutxin ti a tatso baa, ani na si ana Rimam. Ayi si-yi kutxin titsen na ijwe be. Ayi si itiyer ru ikentitibi ru ye utob-ni, ti si wande ti Kristi ku nde.

¹²Kiye ti a nde na ni batisma, i si pangma a nji ni te Kristi tetso uwae kuskab kinjo. Kiye ti Rimam kunn nwunn wu ama, awu kunn nwunn ni ikyaen ti, ani ru uwae kinjo baa, Rimam ti kunn nwunn Kristi uwae iticwu na site kuko ti wu na kunn nwunn ni ama.

¹³Ti kute ani si ande ti cwucwu yi kusung ikyaen na ikentitibi ti ani nde, ti ikyaen ti ani si ande ti nung-ni Rimam be. Amaa, Rimam yata na ti ikentitibi-ti u ye nwunn ni uwae iticwu-ni yi fengo na Kristi.

¹⁴Awu fen mbeb pu wu ripab na ikentitibi-ti, ne a ku putsa ti. Icwe yir ti ikyaen riraen-ti, ama awu saen ti ta. Awu pu riraen-ti tso risu Kristi kiye ti a sa wu kwer risu kutuku ti cice.

¹⁵Kiye-wu awu fxaen mbe kuko uwog apxin ti uwog asung titibi ti tsitsi ti site kuko apupwen. Awu nda ba rikwae ti wae uwe ande meme u tum ba pangma apyi uwae ashwu rika ti awu ci risu-ba.

¹⁶Ikyaen yine, ni cwe-ni ti unde iki ā rimbeb ni ikyaen iken ti ani ku ci u ku ngwa be, ko risu fengo ti ani ku ci ukwab na usir tiyang uwae kusang, ko ukwab na ushaen tishe ko ana usir ikyinn.

¹⁷Icwe yine si kusung iken ti ku ba uwe ti ati nung-ti khika be. Kristi ti risu-wu ti si iyang ira wu.

¹⁸Unde iki ā saeru-wu ani ikyaen ti ani pyi icwe-ba be. Aba tsi ti afxen ifaen baa, ni na fen atom ti apupwen. Aba ku ndub ijwe baa, Rimam na ku tatso ba iken uwae kurwa. Ira ti kab-ba si ana utense wune amam.

¹⁹Aba cwe-ba ti a ren risu te Kristi cwucwo be, ko ti Kristi ti si risu ande-wu. Meme ande ti ku putsa wu, awu ti ku shi ba. Awu ti ku ren ba tetso pangma ti indub ku ren akyab ijwe unde tetso. Ama aba ku ser itiser ti ru uwog Rimam ba.

²⁰Kiye ti Kristi cwu, ani cwu ama, u ya iken na utense ta pu ni isim. Ani nwangru pu ni kujwo na asung titibi na utense ne. Ani nde rimang tsikunn ti ku som usom-ni pangma ani na si kyi ana utense wune? Ani nde rimang nae risu riben na icwe-ba ayi?

²¹Pangma ti a ku ri baa, “Ye-fu iken wune be! Ci-fu iken wune be! Sa kujwo tekunn-fu iken wune be!”

²²Itso icwe yine ta risu iken ti ayi u tsi-yi tsi be u mam tag. Ayi si ande amam ti ku mam itso icwe yine u ku kwen na ande.

²³Icwe-ba yine, ande ku sae yi baa, ayi na nyang, ikyaen ti, ayi ku nda ande nae risu riben u ku nda ijwe-ba rikaen. Amaa, ayi si iken ti ukaen, ayi u byangkyi-yi ijaen utense be.