Read kutep Kolosi 3 Bible Online

Kolosi 3 - kutep bible

Kolosi 3

¹Ti ani te Kristi nwunn pu ni tetso uwae iticwu, ni sa utob-ni tsi risu iken ti si ana kuru Rimam apupwen, uwog ti Kristi som tsa kutxomkwe-wu, kujwo rici na Rimam.

²Ni tsikunn ti ira ti kab risu iken ti ta apupwen, ni sa utob tsi-ni risu iken na utense wune be.

³Ikyaen ti, yi usom ti som-ni na rimenn ijwe ti kucang, ani cwucwu, ama tine, unyang-ni te Kristi ta tetso uwog Rimam. Awu ti ku kyir yi ikyaen-ni.

⁴I si Kristi ti si unyang-ti ti kubenti. Kiye ti awu a ru ba tso risu-wu, ani ama te wu u tso risu tetso u som usom ukwe ti riyinn.

⁵Ikyaen na yine, ame ku jwam ni, ni twenji meme iken na rimenn ijwe ti si ana utense wune, pangma iyag ko amae ti nae, ijib ti nde, ijaen iyag ti nae, ira ti kab titibi, ti ayib ti taen, ti si apxin ti fen.

⁶I si ikyaen itso ikentitibi yine ti rinae Rimam ru ku ba.

⁷Ti kute ani som itso usom ti som titibi wune. Utob-ni ta risu itso iken yine ko kiye titini.

⁸Amaa tine, ame ku fwa ni kusen baa, ni sa risu-ni ruye uwae meme iken yine. Ni ya rinae ti utob ti byag ta! Ni sa-ni ande iki tsi uwae be. Ni txun-ni ande iki asu be. Ni ri-ni ira ti ku txi iyib be.

⁹Ni yer-ni rifen tetso be. Ni tangsom baa, ani pu utob-ni ti tikyi tika pu ni, awu utob ti ku nda ni nde ikentitibi yine kute.

¹⁰Tine ani sa utob ti tishe ba fenkyi utikyi wu. Awu ti tishe wune, i si Rimam ti kyae wu ti kucang. Ama Rimam tsi kunn ku kyae nyang wu ikyaen ti awu na ā nyang pangma itinyang-wu Rimam ti risu-wu. Awu ku nda ni nungye iken ti ana-wu Rimam ku ru yi uwe uwe.

¹¹Ikyaen na yine, uwog-ni ande ti site utob tishe, itikanta ta-yi kutampwa-ni cwucwo be. Ko unde a si unde ti Yawudiya ko awu a si unde ti ise, ko awu a tsen kutxin, ko awu a tsen-wu be, ko awu a si unde ti rikyen ko unde ti kutur, ko awu a si upyi ko awu a si unde ti ku som usom ti risu-wu, ayi si iken kinjo. Ikyaen ti, Kristi amam ti si iken tiyang. Awu ta uwae-ni meme.

¹²Ikyaen yine, ti Rimam tsab pu wu ani ti ni si ande-wu ti sisaen, ni si ande ti utob uwae-wu, ni nung atso ti ayibrisi u nde na atso iken ti tinyang. Ni sa risu nae riben na atso ti ni nde iken-ni sku sku. Ni ye utob tetso

¹³ti ni ndembeb-ni utob tetso be. Asiti unde iki uwae-ni a nda inja-wu ndembeb utob, aba ā yata na atso ikentitibi-ba. Itsekuru-ti yata na pu wu ani ikentitibi-ni, ani ama ā yata na atso ikentitibi-ni.

¹⁴Iken ti skeb tag si ti ni na ye ure tetso. Ikyaen ti, ure si iken ti ku yir iken ti tinyang ti tsitsi ne ti uwog kinjo u ku kumunn yi.

¹⁵Ni ya ta ti kujimshwur na Kristi ā nae ukwe uwae utob-ni. I si ikyaen kujimshwur wune nee Rimam kunn byir ni ti ni si kumbub kinjo. Ni nde fxaefa na wu ama.

¹⁶Ni ya ta ti ira na Kristi ā si rifunn ti ani site yi uwae utob-ni. Ni kwen na atso iken, ti ni fwa atso kusen ti ben-ayib meme ti ani site yi. Ni yang akyang ti tsotso ti si akyang na Rimam. Akyang ti Kusung Rimam ā nda ni meme, ni yang yi u ku nde fxaefa na Rimam uwae utob-ni.

¹⁷Uwae iken meme ti ani ku nde, ti uwae ira meme ti ani ku ri, ni nde iken-ni uwae rinyi na Itsekuru-ti Yesu. Yi rinyi-wu ayi ama, ni nde fxaefa na Itse-ti Rimam.

¹⁸Ani anda ti baen ande, ni nae risu riben na abaen-ni. Ayine si iken ti pang atang uwog anda ti si ande na Rimam.

¹⁹Ani arom, ni ye ure te awa-ni. Ni nde-ni iken ti kibyag ti kibyag te ba be.

²⁰Ani anyisu, ni nae risu riben na abitse-ni ti abiya-ni ko kiye titini. Ikyaen ti, Itsekuru-ti ku tsen utob te itso wande yine.

²¹Ani ande ti site anyisu, ni nda-ni anyisu-ni rinae be, be aba u sa uwae tika u ri baa, ayine na skeb pu yi risu.

²²Ani ande ti si apyi, uwae meme iken, ni nae risu riben na aba ti si itsekuru-ni uwae utense ike. Ni nde-ni nyáng kiye ti aba a ta riben atang amam be, pangma ande ti ku sha risu ti tinyang uwog unde. Ni nde yi ti utob kinjo rikaen ikyaen ti ani si ande ti ku kyen Itsekuru-ti Rimam.

²³Uwae meme wande ti ani ku nde, ni nde yi ti utob meme ikyaen ti, ayi si-yi nyang ikyaen unde ti ani ku nde wande yi be, ayi si ikyaen na Itsekuru-ti.

²⁴Ani nung pu ni baa, i si awu ti u ru ba nda ni kujwojang-ni. Awu u nda ni iken meme ti awu sa tsika ande ti si ana-wu. Awu ti si Itsekuru-ni Kristi ti kubenti.

²⁵Ande ti ku nde ikentitibi, a u byinn ba kimbab risu ikentitibi-ba. Rimam ku tsab wu unde iki be, u ku nung ande pang atso.