Read kutep Kolosi 4 Bible Online

Kolosi 4 - kutep bible

Kolosi 4

¹Ani ande ti site apyi, ni shi apyi-ni uwae fengo ti si kubenti ti ni nde ba nyinyang. Ni tangsom baa, ani ama na site Itsekuru apupwen ti ta risu-ni.

²Ni tsi kukunn ti Rimam ti jwam. Kiye ti ani a ku jwam Rimam, ni tsi ti ujwin u ku nde na Rimam fxaefa ama.

³Ni jwam Rimam risu-ti ama, ti awu ā nda ti riyae ti ti na sa ira-wu tsag te ande u mbubta na ba ira ti kitam risu Kristi. I si ikyaen ira yine nee a ye m cwunnkyi.

⁴Ni jwam wu ti m na ri ira-wu yi fengo ti pang atang ikyaen ti ira-wu ayi ā nae ise paenine.

⁵Ni som ti ben-ayib uwae iken ti ani ku nde te ande ti ru-ba kubenti be. Ni kwab ti ni nde tinyang te ba ko kiye titini.

⁶Ni ya ta ti ira unju-ni ā nyang ti fxen ko kiye titini, pangma rinwaen ijwe utong. Asiti unde a rang ni ira, ni kwab ti ni nung fengo ti ani u cwe ira-wu, yi fengo ti pang atang.

⁷Tikikus u tsag te ni ira usom ti som-m ike. Awu si inja-ti ti ku ndeya ti ti utob ti kubenti, u te m ku nde wande na ande ti Rimam ti utob-wu kinjo.

⁸Iken ti nde ne ame tom wu ku ru yi uwog-ni si ikyaen ti wu na tsag ira usom ti som-m te ni, ti wu na ri bom ni utob ama.

⁹Onesimu ti si kinjo uwae-ni te wu ku putsa atso kafe ru ku ba uwog-ni. Awu ama si inja-ti ti utob-ti u ku putsa Yesu Kristi ti utob-wu kinjo. Aba ande ifaen ne u tsag te ni meme iken ti ku nde ike.

¹⁰Aristarku ti te me ta tetso pursuna ike ku kunnji ni ira. Markus, inja Barnaba, ku kunnji ni ira ama. Ame bae mam pu m ira risu-wu ti kucang baa, asiti awu a ru ba uwog-ni, ni na paembe wu ti ajwo ifaen.

¹¹Yesu, ti a ku kunn wu baa, Yusitu, awu ama ku kunnji ni ira. I si nyáng ande ita bane ti si Mbayawuda uwae ande ti ku ndeya me uwae wande na Kujwokwe Rimam ike. Ame ku tu itindeya uwog-ba timambe.

¹²Epafira ti si kinjo uwae-ni, u si upyi Yesu Kristi, ku kunnji ni ira atang. Awu ku jwam Rimam ikyaen-ni ko kiye titini u ku jwam ti Rimam na u nda ni tsi ting ting, ti ani na kwen ben ayib uwae ira Rimam u nung nyang iken ti Rimam ku sha uwog-ni, ti ni na nae risu riben na na wu.

¹³Ame cwe uwe Rimam baa, awu kwab wande tiyang akwen ikyaen-ni, ti ikyaen ande ti ta Lodikeya, ti ande ti ta Iyerapoli.

¹⁴Unde ti kucin, Luka, unde ti ure-ti, ku kunnji ni ira fa ti Demas ama.

¹⁵Kunnji ameinja-ti ti ta Lodikeya nyinyang. Kunnji Nimfa ama nyinyang te kumbub ande ti ku fen Rimam uwae kununn-wu.

¹⁶Isim ti ani a sae tag pu ni kutsingken wune, ni nda ande Rimam ti ta Lodikeya ti a nung yi ama. Ani ama, ni sae kutsingken ti ande ti Lodikeya u tom ba na ni.

¹⁷Ni ri te Arkipu ti wu na nde tag wande ti Itsekuru nda wu kujwo.

¹⁸Ti kujwo-m ame Bulus ku bae kukunnji wune. Ni munnji-ni te uji kiser ti a yir me te yi be. Itinyang na Rimam ā te ni som tetso.