Read kutep 1 Tesalonika 1 Bible Online

1 Tesalonika 1 - kutep bible

1 Tesalonika 1

¹Kutsingken wune ruye uwog-ti Bulus ti Silivanu ti Timoti, ru ba ku na ni ande ti Rimam ti ta uwae uten ti Tesalonika, ani ande ti si ana Itse-ti Rimam ti ana Itsekuru-ti Yesu Kristi. Rinyangwae na Rimam ti kujimshwur-wu ā te ni som tetso.

²Ko kiye titini ati ku nde fxaefa na Rimam ikyaen meme-ni. Ati ku tangsom kob te ni yi itijwam-ti ti ati ku jwam Rimam.

³Uwe Itse-ti Rimam, ati ku tangsom te wande ti tinyang ti ani ku nde ru ye uwae kinjo-ni ti ani ru uwog Yesu Kristi. Ure-ni ti ku nda ni kwab fengo Rimam si-yi ti ti ri be. Ati nung baa, ani sa uwae tsi risu-wu ku ru ru yi uwe uwe.

⁴Ameinja, ati nung baa, Rimam na site ure te ni u tsab sa pu wu ani ti ni na si ana-wu.

⁵Ikyaen ti, kiye ti ati sa Ira ti tinyang ba na ni, ayi si-yi ira unju-ti ti ukaen amam ti ru ba uwog-ni be. Ira ti ani fxen uwog-ti si te kpakang. Kusung Rimam nde wande te yi, u sa yi sang fe yi utob-ni. Ani ti risu-ni nung pu ni itso usom ti ati som kiye ti ati te ni ta tetso.

⁶Ama ani kyangte ira-ti ayi ti utob titsen ti ru uwog Kusung Rimam ba ko ti ira yi shir rikaen tiyang ba na ni. Yi uwog wune, ani putsa kufxen-ti ti ana Itsekuru-ti.

⁷Ikyaen iken ti ani nde ne, ande Rimam ti ta uwae uten ti Makedoniya ti uten ti Akaya meme sae ayib ijwe-ni u putsa kufxen-ni.

⁸Ayi si-yi uwae uten ti Makedoniya ti uten ti Akaya amam ti ande fxen ira na Itsekuru-ti Rimam uwog-ni be. Ko aka uwae utense tine ande ku fxen ira risu fengo ti ani ru uwae kinjo uwae ira yi. Ati ti risu-ti site-ti ti ira iki ti ti ri te ande risu-yi cwucwo be.

⁹Ikyaen ti, aba ti ku ri te ti fengo ti ani kyangte ti uwog-ni ti ajwo ifaen, ti fengo ti ani ya ira apxin ta u ba putsa ira Rimam, ama tine ani na ku fen Rimam, awu ti site unyang u si Rimam ti kubenti.

¹⁰Ani na som ku ji usir ti Umbae Rimam na u si apupwen ba, awu ti Rimam kunn nwunn wu uwae kuskab ti unyang, awu ti u nwangru ti uwae rinae na Rimam ti ku ba.