Read kutep 1 Tesalonika 3 Bible Online

1 Tesalonika 3 - kutep bible

1 Tesalonika 3

¹Ikyaen yine, kiye ti ati som tu-ti cwucwo be, ati kab baa, ayi na nyang skeb ti m na som kinjo-m uwae uten ti Atena.

²Ati tom inja-ti Timoti ru ba uwog-ni. Awu si upyi Rimam ti te ti ku tsag Ira Tinyang na Kristi te ande. Ame tom wu ba ti wu na ye ni tsi u ndeya ni ti ni ru uwae kinjo uwog Yesu ru fife yi uwe.

³Awu ti u ri jim ni utob ikyaen ti ko unde kinjo uwae-ni na kafe-wu ti isim uwae rikaen ti ani ku ngwa ne be. Ani ti risu-ni ama nung pu ni baa, itso rikaen yine na u ba kang risu-ti.

⁴Kiye ti ati ta te ni, ati ri te ni baa, rikaen na ru ku ba risu-ti. Ara kuben, rikaen yi ba pu yi, pangma ti ani ku nung ne.

⁵Nee iken ti nde, isim ti ame som tu-m ti ira ti kab risu-ni cwucwo be, ame tom Timoti ru ba uwog-ni ti wu na ba ri te m ira risu ikyi ti kyang-ni yi fengo Yesu. Ame ku kyen ikyenricwu baa, iki be ukwe kukyaefa na kyaefa pu wu ani, ama itikwab ti ati kwab uwog-ni na u si ti ukaen.

⁶Amaa, tine Timoti sa ira ti tinyang ru uwog-ni ba ri te ti ike risu uwae kinjo-ni ti ure-ni. Awu ri baa, ani na ku tangsom te ti ko kiye titini ti utob ti tsen u ku sha ti ni na nung uwe-ti, pangma ti ati ama ku sha ti ti na u nung uwe-ni.

⁷Ameinja, uwae kinjo-ni yine nda ti utob ti nae riben, ko ti ati ta uwae rikaen ti tsotso.

⁸Ikyaen ti, ayi nda ti ati shwur uwae fengo Rimam, ama nung baa, ani na tsi ti kpakang yi uwog Itsekuru.

⁹Ati shanum ti itso fxaefa ti ati u nde na Rimam ikyaen-ni. I si ikyaen-ni ti ati site utob titsen uwe Rimam.

¹⁰Utitang ti usirtaen, ati ku jwam Rimam te utob-ti meme baa, awu na nda ti riyae ti ti na ba nung ni ayib ti ayib, u tu fengo ti ti ndeya ni ti uwae kinjo-ni ā kumumunn.

¹¹Rimam ti risu-wu, awu ti si Rimam-ti, u si Itse-ti, ti Itsekuru-ti Yesu, aba ā tae ti ru ba uwog-ni.

¹²Itsekuru-ti ama ā nda ni ti ure-ni ti ani ye tetso te ande meme ā ser u munn kyikyi pangma ti ure-ti ikyaen-ni munn kyikyi né.

¹³Yi fengo wune, Itsekuru-ti ā ye ni tsi, ikyaen ti, kiye ti awu a kafe ba ti ande-wu ti sisaen meme, ani u tsi uwe Itse-ti Rimam, a u tu-ba ani te riraen iki be.