Read kutep 1 Tesalonika 4 Bible Online

1 Tesalonika 4 - kutep bible

1 Tesalonika 4

¹Ira-ti ti ricwunnkyi ta re, ameinja. Ani kwen mam pu ni uwog-ti itso usom ti som ti Rimam ku sha. Ani ku som ahan tine, amaa ati ku jwam ni u ku mbyae ajwo yi rinyi na Itsekuru-ti Yesu baa, ni kwab ti itso usom ti som wune ā ko fufa ru yi uwe.

²Ikyaen ti, ani nung pu ni ira ti ati ri te ni yi rinyi na Itsekuru-ti Yesu.

³Iken ti Rimam ku sha si ti ni na ru ba si ande ti sisaen, ti ni fxae amae ti nae, ti iyag ti nae.

⁴Awu ku sha ti unde titini uwae-ni na nung fengo ti awu u som te uwa-wu yi fengo ti pang atang uwe Rimam, ti fengo ti u nda wu kuko.

⁵Ni si-ni ande ti ku kyang ku sha anda be. Ayine si iken ti ande ti nung-ba Rimam be ku nde.

⁶Unde iki uwae-ni ā raen-wu inja-wu ira uwae ira anda yine be. Ande ti ku nde itso iken yine, Itsekuru u byib ba aku pangma ti ati ri te ni u fwa ni kusen risu-yi ti kucang.

⁷Rimam kunn-wu ati ira ti ati na u ba si ande ti ajib be. Awu kunn ti, ti ti na si ande ti ku som usom ti sisaen.

⁸Ikyaen yine unde titini ti a pyir ira yine, ayi si-yi unde ti awu sae ru be; awu ku sae ru Rimam, awu ti sa Kusung ti Sisaen na ni.

⁹Ira risu ure ti ani ande ti si ameinja uwae ira Yesu u ye tetso, Rimam ti risu-wu kwen na pu wu ani ti ni na ye ure tetso. Ayi si-yi ti unde iki u bae na kyi ni ira risu-yi be.

¹⁰Kubenti, ani ku ye ure te ameinja-ti ti ta uten Makedoniya meme. Ati ku ri bom ni utob tine, ni kwab ti ure-ni yine na ko fufa ru fife yi uwe.

¹¹Ati ku jwam meme-ni ti ni na kwab ti ni som usom ti kujimshwur, ti ni sa unju sang-ni ira na ande iki be. Ni nde wande ti ajwo-ni, pangma ti ati fwa ni kusen ti kucang.

¹²Yi fengo yine, ande ti tsitsi ti si-ba ande na Yesu be u nung ni ti rurob ama. Cwucwo, ani u nung fengo ti ani u ndeya ijwe-ni u sa ijwe konje-ni unde iki be.

¹³Ameinja, ati ku sha ti ti ri taen ira te ni risu ande ti cwucwu, ikyaen ti ni na ndembeb-ni utob risu-ba be. Ande ti site-ba ti iken ti a sa uwae tsi atang be, aba ti ku ndembeb utob risu ande ti cwucwu.

¹⁴Ati ru uwae kinjo baa, Yesu na cwu u kafe ba ti unyang-wu. Ikyaen iken ti awu nde ne, ati ru kubenti baa, usir ti awu na u kafe ba, Rimam u kunn nwunn ande-wu ti cwucwu, aba te wu u putsa atso ru ba.

¹⁵Ati ku ri te ni ira yine baa, Itsekuru-ti Yesu ti risu-wu kwen na ti baa, usir ti awu na kafe ru ba, ande-wu ti tsi ti user na u ta-ba uwe ande ti cwucwu be.

¹⁶Kiye wu, ati u fxen afxenjwin ti ribom ku ya iskin ira yi. Ukwe ande ti atom na Rimam u kunn ira. A u kunn kutumu na Rimam. Ama tiri, Itsekuru-ti Yesu ti risu-wu u si apupwen ba. Aba ande na Kristi ti cwu pu ba ti kucang-yi, aba ti tawe u shwur uwae iticwu.

¹⁷Isim ayine ati ande ti tsitsi ti tsi ti user, Rimam u pu ra ti tso, ikyaen ti ati te ba na putsa atso ru ka kyang te Itsekuru-ti uwae abyi ti apupwen. Sa ti usir wu, ati te wu u som tetso ru fife yi uwe.

¹⁸Ni sa ira-ti ayine ti ni ri bom atso utob atang.