Read kutep 1 Tesalonika 5 Bible Online

1 Tesalonika 5 - kutep bible

1 Tesalonika 5

¹Ira risu usir ti ushaen ti iken yine u nde, i si-yi ti ame u bae na kang ni ira risu iken yine be, ameinja.

²Ani ti risu-ni nung pu ni nyinyang baa, itiba na Itsekuru-ti Yesu na u pangma ana unde ti riyib ti ku ru ba uwog ande utitang, aba nung-ba kiye ti awu ru ku ba atang be.

³Kiye ti ande ku ri baa, “Ati som nyang pu ti, iken iki u nde-yi ati be,” si kiye ti ititwenji u ba purug ba. Ayi u si pangma umbae ti pwe ti ku tsoye unda ti site rishwu. A u nwang-ba be.

⁴Amaa ana-ni, ameinja, ani ta-ni uwae kufub be. Ayi u nde tu-yi ti usir wu u ba kpugfa ni fa pangma unde ti riyib be.

⁵Ikyaen ti, meme-ni si ande ti ku putsa uwog ti sisaen. Ucwe yae pu wu ani. Ani ku nde iken-ni ti usirtaen. Ati ande na Rimam si-ti ande ti ku kyang uwae kufub ko utitang be.

⁶Ikyaen yine, ti cwag-ti kicwag pangma ti ariki ku cwag be. Ti som usom ti ujwin, u ye su ijwe-ti nyinyang.

⁷Ikyaen ti, ande ti ku nae kicwag, a ku cwag yi utitang. Ti mbwe-yi ama uwog ande ti ku ngwa ku shishaen. Aba ku shaen ku kyang utitang.

⁸Amaa, ana-ti, ati si ande ti ta uwog ti sisaen, ame ku jwam baa, ti na ye su ijwe-ti nyinyang, u pu isu rika-ti si. Uwae kinjo ti ure ā si kupwa rika ti ti u pu takyi rukog-ti. Uwae ti tsi risu itinwangru-ti, ayine ti u si ubur rika-ti.

⁹Rimam tsab-wu ati ti ti na tu rinae-wu be. Awu ku sha ti ti na tu itinwangru uwog Itsekuru-ti Yesu Kristi.

¹⁰Awu cwu ricwu ikyaen ti, ikyaen ti ko asiti ati a tsi user ko ati a cwucwu, ati na te wu ta tetso kiye ti awu a kafe ru ba.

¹¹Ikyaen yine, ni ri bom atso utob ti ni ndeya atso ru fe yi uwe pangma ti ani ku nde tine.

¹²Ameinja, ati ku ri te ni, ni nda ande ti uwe-ni rurob. Aba ku nde na ni wande, u ku kwen na ni ira Rimam.

¹³Ni ye ure te ba ti ni kyen ba ikyaen wande tiyang ti aba ku nde. Ni som usom ti kujimshwur tetso.

¹⁴Ameinja, ati ku jwam ni ama baa, ni fwa ande ti ku nde-ba wande be kusen ti a na ya uyáng ti nde ta. Aba ande ti site utob ti kyen ricwu ama, ni ri bom ba utob. Ni ndeya ande ti bom-ba be ama, ti ni ye utob te ande meme.

¹⁵Uwae usom ti som-ni tetso, unde iki ā pae-wu ripab ikentitibi ti ikentitibi be. Ayi nyang skeb ti ni kwab ti ni nde na atso iken ti tinyang, fa te ande ti tsitsi meme.

¹⁶Ni tsen utob ko kiye titini.

¹⁷Ko kiye titini ama ni tsi kunn ti ku jwam Rimam.

¹⁸Iken ti a tu ni meme, ni nde fxaefa na Rimam. Ayine ti si iken ti Rimam ku sha uwog-ni ande ti ku putsa ira na Yesu Kristi.

¹⁹Ni nde-ni iken iki ti u byang kyi wande na Kusung na Rimam uwae utob-ni be.

²⁰Cwucwo ni sae ru-ni ande ti Rimam ku nda ba ri ira ti awu ku tatso ba be.

²¹Ira ti ande a ku ri meme, ni myae yi myae nyinyang. Asiti ayi a si ira ti tinyang, ni paembe yi.

²²Amaa ni tsi rurwen ti ikentitibi meme.

²³Rimam na kujimshwur ā jwosaen ni sisaen, awu ā nungkyi kusung-ni ti unyang-ni ti ijwe-ni ti yi ā si-yi te riraen kiye itikafe ba Itsekuru-ti Yesu Kristi be.

²⁴Rimam, awu ti kunn ni, u nde kang iken yine, ikyaen ti, awu si Rimam ti tsikunn ti kubenti.

²⁵Ameinja, ni jwam Rimam risu-ti.

²⁶Ni kunnji meme ameinja-ti ande na Yesu ira, ti ni ye atso bur utob uwae ure na Rimam.

²⁷Ame ku ri te ni yi rinyi na Rimam baa, ni na nùng putsa kutsingken wune na ande Rimam ti ta atang meme.

²⁸Rinyangwae na Itsekuru-ti Yesu Kristi ā te ni som tetso. Ayi ā si ahan.